بيىلدان باستاپ بوكسشىلاردى بۇعان دەيىن ۇلتتىق قۇرامادا ون جىلعا جۋىق جاتتىقتىرعان مىرزاعالي ايتجانوۆ دايىندايتىن بولدى. 52 جاستاعى ماماننىڭ الدىنداعى باستى ماقسات – مامىر ايىندا تاشكەنتتە الاۋى تۇتاناتىن الەم چەمپيوناتىندا, كۇز مەزگىلىندەگى ەڭ ماڭىزدى دودانىڭ ءبىرى – ازيا ويىندارىندا ءساتتى ونەر كورسەتۋ. سونداي-اق 2024 جىلعى پاريج وليمپياداسىندا دا الدىڭعى دودالارداعى جەتىستىكتى قايتالاۋ, مۇمكىندىك بولسا, سيدنەيدەگى ناتيجەنى جاقسارتۋ تاپسىرماسى قويىلعان.
جالپى, قازاقستان ۇلتتىق قۇراماسىنىڭ تاريحىنا كوز جۇگىرتەر بولساق, بۇگىنگە دەيىن ۇلتتىق قۇراما تىزگىنىن جەتى باپكەر ۇستاعان ەكەن. ءبىر قىزىعى, سولاردىڭ ىشىندە تەك قايرات ءساتجانوۆ قۇرامانى وليمپيا ويىندارىنا باستاپ بارا المادى. ماسەلەن, قازاقستان بوكس قۇراماسىنىڭ تۇڭعىش باس باپكەرى بولعان ءابدىسالان نۇرماحانوۆ 1993-1997 جىلدار ارالىعىندا ءبىر وليمپيادا, ەكى الەم چەمپيوناتىنا جىگىتتەردى باستاپ باردى. كەيىننەن قۇراما تىزگىنىن ۇستاعان تۇرسىنعالي ەدىلوۆ تە وزىنە بەرىلگەن بەس جىلدىڭ ىشىندە سيدنەي وليمپياداسى مەن ءۇش الەم بىرىنشىلىگىنە بوكسشىلاردى باپتادى. افينىدا ەرماحان ىبىرايىموۆ باس باپكەر بولسا, بەيجىڭ وليمپياداسى تۇسىندا دامير بۋدانبەكوۆ قۇرامانى جاتتىقتىردى. ال لوندون مەن ريودا مىرزاعالي ايتجانوۆ, توكيوداعى ساتسىزدىكتىڭ تۇسىندا عالىمبەك كەنجەباەۆ قىزمەت ەتتى.
جالپى وسى باپكەرلەر اراسىندا ناتيجە كورسەتۋ جاعىنان مىرزاعالي ايتجانوۆتىڭ شوقتىعى بيىك. ونىڭ شاكىرتتەرى وليمپيا ويىندارى مەن ءتورت الەم بىرىنشىلىگىندە 27 جۇلدە ولجالادى. ارينە, بۇل جەردە وزگە باپكەرلەرگە قاراعاندا م.ايتجانوۆ ۇلتتىق قۇرامادا ۇزاق (9 جىل) ۋاقىت ەڭبەك ەتكەنىن ەسكەرۋ كەرەك.
قازىر قوعام اراسىندا مىرزاعالي ايتجانوۆتىڭ باسشىلىق قىزمەتىنە كەلۋى قىزۋ تالقىلانىپ جاتىر. ءبىرىنشى تاراپ قازاق بوكسىنا بەرگەنىنەن بەرەرى مول جاتتىقتىرۋشىنى تاعايىنداۋ كەرەك ەدى دەسە, ەكىنشىلەرى الدىمىزدا وليمپيادا دەيتىن ماڭىزدى جارىس كەلە جاتقاندا تاجىريبەلى ماماننىڭ تىزگىندى ۇستاعانى دۇرىس دەپ ەسەپتەيدى.
وسى تۇستا م.ايتجانوۆتىڭ 2009-2018 جىلدار ارالىعىندا قول جەتكىزگەن ناتيجەلەرىنە ءبىر توقتالىپ وتكەندى ءجون كورىپ وتىرمىز. مىرزاعالي قۇلان ۇلىنىڭ باس باپكەر رەتىندەگى العاشقى ءىرى جارىسى 2010 جىلى قىتايدىڭ گۋانجوۋ قالاسىندا ۇيىمداستىرىلعان جازعى ازيا ويىندارى بولدى. ۇلتتىق قۇرامانىڭ تاجىريبەلى بوكسشىلار شوعىرى قالىپتاسقان تۇستا جامان ناتيجە كورسەتكەن جوق. اتاپ ايتار بولساق, سول جولى سەرىك ساپيەۆ (69 كيلو) پەن دانيار ەلەۋسىنوۆ (64 كيلو) التىننان القا تاقسا, ءبىرجان جاقىپوۆ (49 كيلو), يۆان دىچكو (+91 كيلو), دانابەك سۋجانوۆ (75 كيلو) جۇلدەگەرلەر قاتارىنان كورىندى. ءسويتىپ جالپىكوماندالىق ەسەپتە ءۇشىنشى ورىندى يەلەندى.
اراعا ەكى جىل سالىپ ۇلىبريتانيا استاناسى – لوندونداعى وليمپيا ويىندارىندا جەرلەستەرىمىز ءبىر التىن, ءبىر كۇمىس جانە ءبىر قولا مەدالعا يە بولدى. ازيا جانە الەم چەمپيوناتىنىڭ ەكى دۇركىن جەڭىمپازى اتانعان سەرىك ساپيەۆ تۇماندى البيوندا دا تۇعىردىڭ ەڭ بيىك ساتىسىنان كورىنسە, ادىلبەك نيازىمبەتوۆ كۇمىس جۇلدەنى موينىنا ءىلدى. اسا اۋىر سالماقتاعى يۆان دىچكو قولاعا قول جەتكىزدى.
ال 2013 جىل ايتجانوۆ ءۇشىن دە, قازاق بوكسشىلارى ءۇشىن دە تابىستى جىل بولدى. الدىمەن امماندا وتكەن ازيا چەمپيوناتىندا جەتى ورەنىمىز قۇرلىق چەمپيونى اتانسا, الاتاۋ باۋرايىنداعى الەم چەمپيوناتىندا تۇڭعىش رەت ءتورت بوكسشىمىز التىن تۇعىردان كورىندى. ءسويتىپ جىلدىڭ ەڭ ءىرى ەكى باسەكەسىندە قازاقستان قۇراماسى جۇلدە جەڭىپ الۋ جاعىنان رەكورد ورناتتى.
قازاق بوكسشىلارى 2014 جىلعى ينچحونداعى XVII جازعى ازيا ويىندارىنان دا, 2016 جىلعى وليمپيادادان دا ەلگە التىنسىز ورالعان جوق. كورەيادا ءىلياس سۇلەيمەنوۆ (52 كيلو) پەن دانيار ەلەۋسىنوۆ (69 كيلو) چەمپيون بولسا, ريو وليمپياداسىندا د.ەلەۋسىنوۆ قازاق ەلىنىڭ ءانۇرانىن شىرقاتتى. وكىنىشكە قاراي, كەيىنگى دودالاردا قازاقستاندىق بوكسشىلاردان باق تايا باستادى. تەك 2017 جىلعى گەرمانيادا ۇيىمداستىرىلعان الاماندا مىرزاعالي ايتجانوۆتىڭ ءتول شاكىرتى قايرات ەراليەۆ (57 كيلو) قارسىلاستارىن قوعاداي جاپىرىپ, باس جۇلدەنى ولجالادى. بۇل – ايتجانوۆتىڭ الەم چەمپيونى اتانعان ەكىنشى شاكىرتى ەدى. وعان دەيىن 2014 جىلى جەڭىل سالماقتاعى ءبىرجان جاقىپوۆتىڭ الماتىدا اتوي سالعانى بارشاعا بەلگىلى. سونداي-اق 2021 جىلى سەربيادا ۇيىمداستىرىلعان الەمدىك دودادا ساكەن بيبوسىنوۆ دارا شىعىپ, ايتجانوۆتىڭ ءۇشىنشى شاكىرتى الەم چەمپيونى اتاندى.
سونداي-اق مىرزاعالي ايتجانوۆ 2013 جىلعى الەم جانە ازيا بىرىنشىلىگىندە ايتۋلى تابىسىنان كەيىن ايبا شەشىمىمەن الەمنىڭ ەڭ ۇزدىك باپكەرى اتانسا, كەلەسى جىلى دا ءدال سونداي زور قۇرمەتكە يە بولدى. بۇل دا قازاق باپكەرلەرىنىڭ اراسىندا قاتارىنان ەكى رەت الەمنىڭ ۇزدىك باپكەرى اتانعان جالعىز جاتتىقتىرۋشى. مىنە, ايتجانوۆتىڭ توعىز جىلدا جەتكەن جەتىستىگى وسىنداي. ءتورت جىلدان كەيىن بۇرىنعى قىزمەتىنە ورالعان مىرزاعالي ايتجانوۆ سول جەتىستىكتەرىن قايتالاي الا ما, جوق پا ونىڭ الداعى ۋاقىتتا بىلە جاتارمىز.
