وسىدان ءبىر اپتا بۇرىن ءدال وسى قالادا وتكەن ءبىرىنشى تۋرنيردە وتانداسىمىز العاشقى اينالىمدا الەمنىڭ 14-ءشى, سول جارىستىڭ 5-راكەتكاسى رەتىندە تىركەلگەن امەريكالىق دانيەل كوللينزبەن كەزدەسىپ, ءۇش سەتتە – 5:7, 6:2, 6:3 ەسەبىمەن باسىم تۇسكەن بولاتىن. الايدا ەكىنشى كەزەڭدە الەمدىك رەيتينگتە 69-ورىندا تۇرعان 20 جاستاعى ۋكراينالىق مارتا كوستيۋككە 6:7, 6:2, 6:3 ەسەبىمەن جول بەرگەن ەدى.
اراعا اپتا سالىپ ءدال سول قالادا ۇيىمداستىرىلىپ جاتقان جۇلدە قورى 239 مىڭ 477 اقش دوللارىن قۇرايتىن WTA 500 ساناتىنداعى ەكىنشى جارىستىڭ باستاپقى باسەكەسىندە ەلەنا رىباكينا الەمنىڭ 8-راكەتكاسى, رەسەيلىك داريا كاساتكينامەن شەبەرلىك بايقاسادى. ەكى تەننيسشى بۇعان دەيىن كورتتا ءۇش مارتە كەزدەسىپ, بىرەۋىندە – رىباكينانىڭ, ەكەۋىندە رەسەيلىك تەننيسشىنىڭ مەرەيى ۇستەم بولعان. ەڭ كەيىنگى رەت ولار بىلتىر اقش-تىڭ سان-حوسە قالاسىنداعى WTA 500 ءتۋرنيرىنىڭ ءبىرىنشى اينالىمىندا كەزدەسىپ, د.كاساتكينا 1:6, 6:2, 6:0 ەسەبىمەن باسىم تۇسكەن.
