اۋەلى قاراعاندى وبلىسىندا اۋا رايىنىڭ كۇرت وزگەرۋىنە بايلانىستى قالقامان – باياناۋىل – ۇمىتكەر – كەرنەي – بوتاقارا اۆتوجولى تولىعىمەن جابىلىپ, بارلىق تەحنيكانىڭ جۇرۋىنە تىيىم سالىندى. ودان سوڭ قىزىلوردا – پاۆلودار تاس جولىنىڭ شىدەرتى كەنتىنەن قاراعاندى وبلىسىنا دەيىنگى ارالىعىنا دا ۋاقىتشا بلوكبەكەت قويىلدى. ال سەيسەنبى كۇنى كەشكىلىك وبلىس ورتالىعىنان استانا باعىتىندا شىعاتىن اۆتوباننىڭ شىدەرتى اۋماعىنان اقمولا وبلىسىنا دەيىنگى بولىگى جابىلىپ قالدى.
وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى مالىمدەگەندەي, جولداردىڭ جابىلۋىنا بايلانىستى شىدەرتى كەنتىندە 118 كولىك جينالىپ قالعان. ولاردىڭ 87-ءسى جەڭىل كولىك جانە 5 اۆتوبۋس بار. بارلىعى 225 ادام, سونىڭ ىشىندە 15 بالا ءۇشىن ءۇش جىلىتۋ پۋنكتى ۇيىمداستىرىلدى. «سارۋحان», «اقجول» قوناق ۇيلەرىندە جانە اۋىل مەشىتىندە دەمالاتىن جەر قاراستىرىلدى. جەرگىلىكتى اتقارۋشى ورگاندار سۋىقتان جاۋراعان جاندار ءۇشىن شىدەرتى ورتا مەكتەبىنىڭ اسحاناسىندا ىستىق تاماق ۇيىمداستىردى.
«قازاۆتوجول» ۇك» اق قىزمەتكەرلەرى ءتورت قۇرامداستىرىلعان جول تەحنيكاسى مەن ءتورت ك-700 تراكتورىن جۇمىلدىرىپ, جولداردى تازالاۋدا. سونداي-اق ەكى ارنايى تەحنيكا مەن تج دەپارتامەنتىنىڭ بەس قىزمەتكەرى, جەتى پوليتسيا قىزمەتكەرى جولاۋشىلاردىڭ قاۋىپسىزدىگىن قامتۋ شارالارىنا تارتىلدى.
سارسەنبى كۇنى تۇستەن كەيىن جەلدىڭ ەكپىنى ءبىراز باسەڭدەپ, اۋا رايىنىڭ جاقسارۋىنا بايلانىستى اقمولا وبلىسىنىڭ شەكاراسىنا دەيىنگى (200-254 كم ارالىعى) شەكتەۋلەر الىنىپ تاستالدى. دەيتۇرعانمەن, لەنين – ەرتىس – رۋسسكايا پوليانا اۆتوجولىندا لەنين كەنتىنەن رەسەي فەدەراتسياسىنىڭ شەكاراسىنا دەيىن كولىك قۇرالدارىنىڭ بارلىق ءتۇرى ءۇشىن قوزعالىس توقتاتىلدى.
اتاپ وتەرلىگى, قازىر وبلىس ورتالىعىنداعى كوممۋنالدىق قىزمەتتەرى كۇشەيتىلگەن رەجىمدە جۇمىسىن جالعاستىرۋدا. تۇنگى ۋاقىتتا قالاداعى قار تازالاۋ جۇمىستارىنا 80-نەن استام ارنايى تەحنيكا جۇمىلدىرىلدى. ارنايى كولىكتەر اۋەلى نەگىزگى كوشەلەردى تازالاپ, ودان سوڭ وزگە اۋماقتاردى رەتكە كەلتىرۋگە كىرىستى. قار ۇدەي تۇسۋىنە بايلانىستى سارسەنبى كۇنى قالا كوشەلەرىندە قار تازالاۋ جانە شىعارۋ جۇمىستارىنا 160-تان استام ارنايى تەحنيكا جۇمىلدىرىلعانى حابارلاندى. سونداي-اق جولداردىڭ جيەكتەرىن, ايالداما پاۆيلوندارى مەن جاياۋ جۇرگىنشىلەر وتكەلدەرىن تازالاۋ ءۇشىن 200-دەن استام ادام ەڭبەك ەتۋدە.
سينوپتيكتەر وسى اپتا بويى قار جاۋىپ, جەلدىڭ ەكپىنى اۋىق-اۋىق كۇشەيەتىنىن حابارلاپ وتىر. جولاۋشىلار مۇنداي كەزەڭدە ساپارعا شىقپاعانى ابزال.
پاۆلودار وبلىسى
