ساۋدا جانە ينتەگراتسيا ءبىرىنشى ۆيتسە-ءمينيسترى ارمان شاكقاليەۆتىڭ ايتۋىنشا, ۆەدومستۆو ساۋدا جەلىلەرىن اينالىم تىزبەگى بويىنشا قارجىلاندىرۋدان باس تارتتى جانە وندىرۋشىلەردى تىكەلەي قارجىلاندىرا باستايدى.
«بيىلدان باستاپ وتاندىق اۋىل شارۋاشىلىعى تاۋارىن وندىرۋشىلەر 2023 جىلعى اقپانعا دەيىن 2023 جىلعى كۇزگى ەگىنگە قاراجات الاتىن بولادى. فورۆاردتىق اقشا اگروونەركاسىپ كەشەندەرىنە الدىن الا كەلىسىمشارتتار جاساۋعا جانە ءوڭىردىڭ كوكونىستەرگە دەگەن ءۇش ايلىق قاجەتتىلىگىنەن ءونىم كولەمىنىڭ 30 پايىزىن قامتاماسىز ەتۋگە مۇمكىندىك بەرەدى. ياعني ءوندىرۋشىنىڭ ىشكى نارىققا كوكونىستەر مەن جەمىستەردى جەتكىزۋ بويىنشا قارسى مىندەتتەمەلەرى بولادى», دەدى ۆيتسە-مينيستر استانا قالاسىنىڭ بيزنەس-قوعامداستىق وكىلدەرىمەن كەزدەسۋدە.
تاعى ءبىر مىندەت – كوكونىستى ەرتە ساتىپ الۋدى قامتاماسىز ەتۋ. ونى ۋاقتىلى ساتىپ الۋ ماۋسىمارالىق كەزەڭدە باعانىڭ كۇرت اۋىتقۋىن بولدىرماۋعا كومەكتەسەدى. ۆيتسە-ءمينيستردىڭ ايتۋىنشا, تاجىكستان مەن وزبەكستاننان پياز, ءسابىز جانە قىرىققابات جەتكىزۋ بويىنشا الدىن الا كەلىسىمدەر جاسالعان. قازىر يران مەن پاكىستاننان كوكونىستى يمپورتتاۋ ماسەلەسى پىسىقتالىپ جاتىر.
وڭىرلىك تۇراقتاندىرۋ قورلارى ءساۋىر مەن ماۋسىم ارالىعىندا نارىقتى كوكونىسپەن قامتاماسىز ەتەدى. بۇل باعانىڭ ماۋسىمدىق اۋىتقۋىن بولدىرماۋعا سەپتەسۋگە ءتيىس. قانت باعاسىن تۇراقتاندىرۋ ءۇشىن استانا قالاسىنىڭ اكىمدىگى مەن ءتورت قانت زاۋىتى اراسىندا تىكەلەي شارتتار جاسالدى.
قازىر ءوندىرىس كولەمى حالىقتىڭ قاجەتتىلىكتەرىن وتەمەيتىن 19 الەۋمەتتىك ماڭىزى بار ازىق-ت ۇلىك تاۋارلارىنىڭ تىزبەسى انىقتالعان. بۇعان اتاپ ايتقاندا, ءسۇت جانە ءسۇت ونىمدەرى جانە تاۋىق ەتى كىرەدى.
ا.شاكقاليەۆتىڭ ايتۋىنشا, 2023 جىلى رەسپۋبليكالىق بيۋدجەت ناقتىلانعاننان كەيىن ءىرى تاۋارلى ءسۇت فەرمالارى مەن تاۋىق ەتىن ءوندىرۋدى ۇلعايتۋعا شامامەن 400 ملرد تەڭگە ءبولۋ جوسپارلانىپ وتىر. مەملەكەتتىك سۋبسيديانى ەڭبەك ونىمدىلىگى جوعارى جانە تاۋارلار اينالىمىن قاداعالاپ وتىراتىن بىلىكتى وندىرۋشىلەر الادى. مىندەتتى تالاپ – بارلىق ءونىم تەك ەلدىڭ ىشكى نارىعىنا جەتكىزىلۋى كەرەك.
مينيسترلىك وكىلى «سىزدەرگە ساپالى ءونىم الىپ, ونى ساتا الۋىڭىز ءۇشىن بارلىق جاعداي جاسالىپ جاتىر. جالعىز ءوتىنىش – الەۋمەتتىك جاۋاپتى, نەگىزدەلگەن ساۋدا ۇستەمەسى بويىنشا قارسى مىندەتتەمەلەردى ساقتاۋ, بۇل 10 پايىزدان اسپاۋعا ءتيىس», دەدى.
ۆەدومستۆو ساۋدا اينالىمىنىڭ ۇلعايۋىنا, وندىرۋشىلەر سانىنا جانە تاۋاردىڭ سورەلەرگە تۇسۋىنە تىكەلەي اسەر ەتەتىن زاماناۋي ساۋدا ينفراقۇرىلىمىن قۇرۋ بويىنشا جۇمىس جۇرگىزۋدە. اۋدانى 3-تەن 50 مىڭ شارشى مەترگە دەيىنگى ساۋدا ورتالىقتارىن قارجىلاندىرۋ باعدارلاماسى ازىرلەنىپ جاتىر. باعدارلاما شەڭبەرىندە 2023 جىلدان باستاپ 5 ملرد تەڭگەگە دەيىن نەسيەلەر بەرۋ جانە بيزنەس ءۇشىن پايىزدىق مولشەرلەمەلەردى جىلدىق 6 پايىزبەن سۋبسيديالاۋ ۇسىنىلادى. ءبىرىنشى كەزەڭدە بۇل ماقساتقا شامامەن 20 ملرد تەڭگە بولىنبەك.
مينيسترلىكتىڭ ەسەپتەۋىنشە, وركەنيەتتى ساۋدا فورماتتارىنىڭ وڭتايلى ۇلەسى 75 پايىزدى قۇرايدى. كوپتەگەن زاماناۋي ساۋدا ورتالىعىنىڭ بولۋى تاۋارلاردىڭ كولەڭكەلى اينالىمى ماسەلەسىن شەشۋگە مۇمكىندىك بەرەدى.
