قاتارداعى ىرىكتەۋ سايىسىندا قازاقستان قۇراماسىنان ۇستەل تەننيسى سپورتىنىڭ ۇزدىكتەرى كيريلل گەراسيمەنكو مەن الان قۇرمانعاليەۆ, سونداي-اق ايدوس كەنجەعۇلوۆ, يسكەندەر حاركي, زاۋرەش اقاشەۆا, سارۆينوز ميركاديروۆا, اناستاسيا لاۆروۆا, ايا الىمباەۆا جانە انگەلينا رومانوۆسكايا سىنعا تۇسەدى. تۋرنير 7-13 قاڭتار ارالىعىندا وتەدى. جەرلەستەرىمىز جەكەلەي سىندا, جۇپتا جانە ارالاس باسەكەلەردە جولدامالار ءۇشىن تالاسادى.
ال الەم چەمپيوناتى وسى جىلدىڭ 20-28 مامىر ارالىعىندا وڭتۇستىك افريكانىڭ دۋربان قالاسىندا ۇيىمداستىرىلادى. وڭتۇستىك افريكا رەسپۋبليكاسى تاريحتا العاش رەت ۇستەل تەننيسىنەن الەم چەمپيوناتىن قابىلدايتىنىن ايتا كەتكەن ءجون. افريكا قۇرلىعىندا اتالعان سپورت تۇرىنەن الەم بىرىنشىلىگى سوڭعى رەت 1939 جىلى مىسىردا وتكەن ەكەن.
