جولداماعا يە بولعان وقۋشىلاردىڭ الدىڭعى لەگىنە اتا-انالارىمەن بىرگە وبلىس باسشىسى اسايىن بايحانوۆ تا ساتتىلىك تىلەپ, شىعارىپ سالدى. ۇيىمداستىرۋشىلار جاسوسپىرىمدەردى تۇركىستان, اقمولا, الماتى, اباي جانە وزگە دە وبلىستاردا مادەني جانە ساۋىقتىرۋ باعدارلامالارى كۇتىپ تۇرعانىن جەتكىزدى.
كومىرلى شاھارداعى كىشكەنتاي تۇرعىنداردىڭ قىسقى دەمالىستى كوڭىلدى وتكىزۋىنە «amanat» پارتياسى مۇمكىندىك بەرىپ وتىرعانىن ايتقان ابزال. ساياسي ۇيىمنىڭ تۇركىستان وبلىستىق فيليالىنىڭ كەزەكتەن تىس كونفەرەنتسياسىندا پارتيا توراعاسى ەرلان قوشانوۆ بۇل جايىندا مالىمدەگەن بولاتىن. پارتيانىڭ ەرىكتىلەرى مەن بەلسەندىلەرى ەكىباستۇزداعى توتەنشە جاعدايدىڭ العاشقى كۇندەرىنەن باستاپ قالا تۇرعىندارىنا گۋمانيتارلىق كومەك كورسەتۋگە اتسالىسقانى ءمالىم. احۋال تۇراقتالىپ, قالاداعى ءومىر ءوز ورنىنا كەلگەن سوڭ جاس تۇرعىنداردى قۋانتۋعا باسىمدىق بەرىلدى.
– ەكىباستۇزدا توتەنشە جاعداي جاريالانعان ساتتەن باستاپ ءبىزدىڭ ۇيىمنىڭ مۇشەلەرى «جاستار رۋحى» جاستار قاناتىنىڭ بەلسەندىلەرىمەن, ەرىكتىلەرمەن بىرلەسىپ جىلىتقىشتار, جىلى كورپەلەر تاراتۋعا, ىستىق تاماقتى ۇيىمداستىرۋعا بەلسەنە قاتىستىق. ەندى, مىنە, «amanat» پارتياسى توراعاسىنىڭ باستاماسىمەن بالالاردى ساناتوريلەر مەن دەمالىس ۇيلەرىنە جىبەرۋ ۇيىمداستىرىلدى. ەكىباستۇز قالاسىنىڭ اكىمدىگىنە, دەنساۋلىق ساقتاۋ جانە ءبىلىم بەرۋ باسقارمالارىنا, اتا-انالارعا ۇلكەن العىس ايتامىز. ەڭ باستىسى, وقۋشىلاردىڭ قىسقى دەمالىستارى ويداعىداي ءوتىپ, بالالارىمىز ۇيلەرىنە امان-ەسەن ورالسىن, – دەدى «amanat» پارتياسىنىڭ پاۆلودار وبلىسىنداعى فيليالىنىڭ توراعاسى يليا تەرەنچەنكو.
قالا تۇرعىنى يرينا شابالدينانىڭ ايتۋىنشا, ونىڭ ەكى قىزى اقمولا وبلىسىنداعى «پارۋس» لاگەرىنە جولداما العان. قالانىڭ جىلۋ جۇيەسىندە اپات ورىن العان ۋاقىتتا جەر ۇيدە تۇراتىن بۇل وتباسى ۇلكەن قيىندىققا ۇرىنىپتى. ەرىكتىلەر جىلى كورپەلەر مەن ەلەكتر جىلىتقىشتار اكەلىپ, ۇلكەن كومەك كورسەتكەن. بالالارىنا جاڭا جىل مەرەكەسىندە وسىنداي قىزىقتى ساپار ۇيىمداستىرعان ازاماتتارعا اتا-انالار قاۋىمى اتىنان العىسىن جەتكىزدى.
جولداما جالپى سانى 1300 بالاعا بەرىلەدى دەپ جوسپارلانعان. سەيسەنبى كۇنگە دەيىن 841 وقۋشى قىسقى ساپارعا اتتانىپ ۇلگەردى.
پاۆلودار وبلىسى,
ەكىباستۇز قالاسى
