قاڭتار. قازاقستاندىق سپورتشىلار 2023 جىلدىڭ شىمىلدىعىن ساناۋلى كۇندەردەن كەيىن اقش-تىڭ لەيك-پلەسيد قالاسىندا الاۋى تۇتاناتىن XXX قىسقى ۋنيۆەرسيادا ويىندارىمەن اشادى. 12-22 قاڭتار ارالىعىندا ۇيىمداستىرىلاتىن ستۋدەنتتەر سايىسىندا الەمنىڭ 50 ەلىنەن كەلگەن 1500-گە تارتا سپورتشى سپورتتىڭ 12 تۇرىنەن 86 جۇلدە جيىنتىعىن ساراپقا سالادى. وسىدان ءتورت جىل بۇرىن كراسنويارسكىدە جالاۋى جەلبىرەگەن دودادا جەرلەستەرىمىز 4 كۇمىس, 3 قولا مەدال جەڭىپ العان ەدى.
16-27 قاڭتار ارالىعىندا بوكستان قازاقستان قۇراماسىنىڭ 22 جاسقا دەيىنگى بىلعارى قولعاپ شەبەرلەرى تايلاندتىڭ باس شاھارى – بانگكوكتە وتەتىن ازيا بىرىنشىلىگىنە قاتىسادى. سونداي-اق 16 قاڭتاردان باستاپ ەلەنا رىباكينا, الەكساندر بۋبليك باستاعان تەننيسشىلەرىمىز «ۇلكەن دۋلىعا» ساناتىنداعى جىلدىڭ ەڭ العاشقى جارىسى – «اۋستراليا وۋپەن» دوداسىندا باق سىنايدى.
اقپان. اقپان ايىنىڭ باسىندا تەننيستەن ەرلەر اراسىنداعى قازاقستان قۇراماسى 2023 جىلعى الەم چەمپيوناتىنىڭ فينالىنا بەرىلەتىن جولداما ءۇشىن چيلي سپورتشىلارىمەن كەزدەسەدى. باسەكە 4-5 اقپان كۇندەرى چيليدە وتەدى. دەۆيس كۋبوگىنىڭ ىرىكتەۋ ماتچتارى ءتورت جەكەلەي جانە ءبىر جۇپتىق كەزدەسۋدەن تۇرادى. 8-19 اقپان ارالىعىندا گەرمانيانىڭ وبەرگوف قالاسىندا بياتلوننان الەم چەمپيوناتى ۇيىمداستىرىلادى. سونداي-اق اقپاندا فۋتبولدان قازاقستان ۇلتتىق قۇراماسى جولداستىق ماتچ وتكىزۋدى جوسپارلاپ وتىر.
ناۋرىز. ناۋرىز ايىندا ادەتتەگىدەي فۋتبولدان قازاقستان پرەمەر-ليگاسى باستالادى. ەلىمىزدىڭ 14 قالاسىندا ىشكى بىرىنشىلىك ويىندارى ءوتىپ, فۋتبول ماۋسىمى رەسمي تۇردە اشىلادى. ايدىڭ العاشقى كۇندەرىندە (2-5 ناۋرىز) نيدەرلاندتىڭ حەرەنۆەن قالاسىندا كونكيمەن جۇگىرۋ سپورتىنان الەم چەمپيوناتى وتسە, 20-26 ناۋرىز ارالىعىندا جاپونيانىڭ سايتاما قالاسىندا مانەرلەپ سىرعاناۋشىلاردىڭ الەمدىك دوداسى ۇيىمداستىرىلادى. وعان قازاقستاندىق سپورتشىلار دا قاتىسادى دەپ كۇتىلۋدە. ال 23 ناۋرىزدا فۋتبولدان قازاقستان ۇلتتىق قۇراماسى ەۋرو-2024 ىرىكتەۋ كەزەڭى اياسىنداعى العاشقى ويىنىن ەلوردادا سلوۆەنيا قۇراماسىمەن وتكىزەدى. كەيىننەن اراعا ءۇش كۇن سالىپ دانيا فۋتبولشىلارىن قابىلدايدى.
ءساۋىر. ءساۋىر ايىندا تەننيستەن قازاقستان ايەلدەر قۇراماسى بيللي دجين كينگ كۋبوگى ءتۋرنيرىنىڭ ىرىكتەۋ ساتىسىندا پولشا قۇراماسىمەن شەبەرلىك بايقاسادى. اتالعان ماتچ 14-15 ءساۋىر كۇندەرى قازاقستاندا وتەدى. جەڭگەن كوماندا فينالدىق كەزەڭگە جولداما الادى. ىرىكتەۋ ماتچى ءتورت جەكەلەي جانە ءبىر جۇپتىق كەزدەسۋدەن تۇرادى.
مامىر. بۇل اي سپورتشىلار ءۇشىن دە, جانكۇيەرلەر ءۇشىن دە قىزىقتى بولماق. ويتكەنى مامىردا بىرنەشە الەم چەمپيوناتى وتەدى دەپ جوسپارلانعان. ماسەلەن, 1-14 مامىر ارالىعىندا وزبەكستان استاناسى – تاشكەنتتە بوكستان ەرلەر اراسىنداعى الەم بىرىنشىلىگى ۇيىمداستىرىلسا, دزيۋدوشىلار 7-14 مامىر ارالىعىندا قاتاردىڭ باس شاھارى – دوحادا باس قوسادى. ال 12-28 مامىردا تامپەرە (فينليانديا) مەن ريگادا (لاتۆيا) شايبالى حوككەيدەن الەم چەمپيوناتى وتەدى.
سونىمەن قاتار وسى ايدا قازاقستاندىق «استانا» ۆەلوكومانداسى يتالياداعى ايگىلى «دجيرو د’يتاليا» كوپكۇندىگىنە, تەننيسشىلەرىمىز 28 مامىر مەن 10 ماۋسىم ارالىعىنداعى «رولان گارروس» (پاريج) دوداسىنا قاتىسادى. 31 ماۋسىمدا فۋتبولدان ەۋروپا ليگاسىنىڭ فينالىن تاماشالايمىز.
ماۋسىم. ماۋسىمدا فۋتبولدان قازاقستان ۇلتتىق قۇراماسى ەۋرو-2024 ىرىكتەۋ سايىسىنداعى كەزەكتى تۋر ويىندارىن وتكىزەدى. 17 ماۋسىمدا سىرت الاڭدا سان-مارينو, 20 ماۋسىمدا سولتۇستىك يرلانديا قۇرامالارىمەن كەزدەسەدى. سونداي-اق بۇل ايدا كونفەرەنتسيا ليگاسىنىڭ (پراگا, چەحيا), چەمپيوندار ليگاسىنىڭ (ىستانبۇل, تۇركيا) جانە ۇلتتار ليگاسىنىڭ تورتتىك فينالى وتەدى.
شىلدە. قازاقستاندىق فۋتبول كلۋبتارى ەۋرودودا ويىندارىنىڭ ىرىكتەۋ ماتچتارىن باستايدى. «اقتوبە», «توبىل», «ورداباسى» كوماندالارى كونفەرەنتسيا ليگاسىنداعى جورىقتارىن باستاسا, ءىزىن الا «استانا» كومانداسى چەمپيوندار ليگاسىنداعى ويىندارىن وتكىزەدى. شىلدەنىڭ باسىندا ادەتتەگىدەي «تۋر دە فرانس» ۆەلوكوپكۇندىگى ۇيىمداستىرىلادى. جارىسقا «استانا» كومانداسى دا قاتىسادى. سونداي-اق 3-16 شىلدە ارالىعىندا تەننيستەن «ۋيمبلدون» دوداسى وتەدى. ەستەرىڭىزدە بولسا, بىلتىرعى جارىستا قازاقستاننىڭ ءبىرىنشى راكەتكاسى ەلەنا رىباكينا جەڭىمپاز اتانعان بولاتىن. سونىمەن قاتار شىلدەنىڭ سوڭىنا قاراي سۋ سپورتى تۇرلەرىنەن (فۋكۋوكا, جاپونيا) جانە ساداق اتۋدان əلەم چەمپيوناتىنىڭ (بەرلين, گەرمانيا) جالاۋى جەلبىرەيدى.
تامىز. تامىزدا دا سپورت جانكۇيەرلەرى ءۇش بىردەي الەم چەمپيوناتىنىڭ كۋاسى بولادى. 19-27 تامىز ارالىعىندا ماجارستاننىڭ باس شاھارى – بۋداپەشتە جەڭىل اتلەتيكادان الەمدىك دودانىڭ الاۋى تۇتانسا, 23-27 تامىزدا يسپانيانىڭ ۆالەنسيا قالاسىندا كوركەم گيمناستيكادان الەم بىرىنشىلىگى وتەدى. ال 25 تامىز بەن 10 قىركۇيەك ارالىعىندا باسكەتبولدان الەم چەمپيوناتى ۇيىمداستىرىلادى. وكىنىشكە قاراي, سوڭعىسىنا قازاقستان قۇراماسىنىڭ سپورتشىلارى قاتىسا المايدى. 28 تامىز – 10 قىركۇيەكتە تەننيسشىلەرىمىز «ۇلكەن دۋلىعا» ساناتىنداعى US Open تۋرنيرىنە قاتىسادى.
قىركۇيەك. بۇل ايدا قازاقستاندىق سپورت جانكۇيەرلەرى قىتايداعى ءدۇبىرلى دوداعا كوز تىگەدى. ويتكەنى حانچجوۋ قالاسىندا 2023 جىلدىڭ باستى باسەكەسى – جازعى ازيا ويىندارى وتەدى. بۇل – پاريج وليمپياداسى الدىنداعى سپورتشىلارىمىزدىڭ شاماسىن بايقايتىن ءسات. ازيا ويىندارى 23 قىركۇيەك پەن 8 قازان ارالىعىندا ۇيىمداستىرىلادى. سونداي-اق قىركۇيەكتە ۆەلوسپورتتان ەڭ ءىرى ءۇش گراند-تۋردىڭ سوڭعىسى – 21 كەزەڭنەن تۇراتىن «يسپانيا ۆۋەلتاسى» باستالادى. سونىمەن قاتار بۇل ايدا اۋىر اتلەتيكادان (ەر-رياد, ساۋد ارابيا), ەسكەك ەسۋدەن (بەلگراد, سەربيا) جانە كۇرەس تۇرلەرىنەن (بەلگراد, سەربيا) الەم چەمپيوناتتارى وتەدى.
فۋتبولدان قازاقستان قۇراماسى قىركۇيەكتە ەۋرو-2024 ىرىكتەۋ كەزەڭى اياسىندا ەكى ماتچ وتكىزەدى. 7 قىركۇيەكتە فينليانديا قۇراماسىن قابىلداسا, 10 قىركۇيەكتە سولتۇستىك يرلانديا فۋتبولشىلارىمەن جاسىل الاڭدا جولىعادى.
قازان. قازان ايىندا فۋتبولشىلارىمىز ەۋرو-2024 ىرىكتەۋ كەزەڭىندەگى تاعى ەكى ويىنىن وتكىزەدى. 15 قازاندا ماگومەد اديەۆ شاكىرتتەرى دانياعا ساپار شەكسە, 18 قازاندا فينليانديا قۇراماسىمەن وينايدى.
قاراشا. بۇل ايدا تەننيستەن ەرلەر جانە ايەلدەر قۇرامامىز بيللي دجين كينگ جانە دەۆيس كۋبوگىنىڭ فينالدىق كەزەڭىنە قاتىسۋى مۇمكىن. ول ءۇشىن جەرلەستەرىمىز جىل باسىنداعى ىرىكتەۋ سايىستارىندا ءساتتى ونەر كورسەتۋگە ءتيىس. ايەلدەر اراسىنداعى فينال ماتچتارى 8-13 قاراشادا شوتلانديانىڭ استاناسى – گلازگودا, ەرلەردىڭ فينالى 22-26 قاراشادا يسپانيانىڭ مالاگا قالاسىندا وتەدى دەپ جوسپارلانعان. سونداي-اق قاراشادا فۋتبولشىلارىمىز ەۋرو-2024 دوداسىنىڭ ىرىكتەۋ كەزەڭىن اياقتايدى. 17 قاراشادا جەرلەستەرىمىز استانادا سان-مارينو قۇراماسىمەن كەزدەسسە, 21 قاراشادا سىرت الاڭدا سلوۆەنيامەن جىلدى قورىتىندىلايدى.
جەلتوقسان. ادەتتەگىدەي جەلتوقسان ايى باستالىسىمەن 2023/2024 جىلعى قىسقى سپورت ماۋسىمى اشىق دەپ جاريالانادى. بۇل ايدا شورت-ترەك, كونكيمەن جۇگىرۋ, بياتلون جانە شاڭعىشىلاردىڭ الەم كۋبوگى كەزەڭدەرى شىمىلدىعىن تۇرەدى. سونداي-اق جىل بويى جەكەلەگەن جانە كوماندالىق سىندا ەل نامىسىن قورعايتىن سپورتشىلارىمىز ءتۇرلى دەڭگەيدەگى حالىقارالىق جارىستارعا قاتىسادى.
