كەزدەسۋ بارىسىندا دەپۋتاتتار پرەزيدەنتتىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» اتتى سايلاۋالدى باعدارلاماسىن ىسكە اسىرۋ جونىندەگى ءىس-قيمىل جوسپارىنا جان-جاقتى توقتالدى. جوسپار شەڭبەرىندە ءماسليحات تاراپىنان دەپۋتاتتىق كورپۋستىڭ بەلسەندى جانە اشىق جۇمىسىن قامتاماسىز ەتۋ ءۇشىن بارلىق كۇش-جىگەرىن جۇمساپ, قالا تۇرعىندارىنىڭ سۇرانىستارى مەن ۋاقىت تالاپتارىن ەسكەرە وتىرىپ, بىرقاتار يننوۆاتسيا ەنگىزەدى.
ءماسليحات توراعاسى ستانيسلاۆ كانكۋروۆ مەملەكەت باسشىسىنىڭ تاپسىرماسىنا سايكەس مەملەكەتتىك ساياساتتى ىسكە اسىرۋ, بيۋدجەت قاراجاتىن ءتيىمدى جۇمسالۋىن باقىلاۋ جانە قالالىق باعدارلامالاردى ورىنداۋدى قامتاماسىز ەتۋ, ازاماتتاردىڭ ۇسىنىستارىن قاراستىرۋ جانە پروبلەمالارىن شەشۋ, قالانىڭ جۇيەلىك پروبلەمالارىن جويۋ جونىندە ۇسىنىستار ازىرلەۋ, مەگاپوليستى ودان ءارى دامىتۋ جونىندە باستامالار دايىنداۋ ءماسليحات جۇمىسىنداعى باستى باسىمدىقتار بولىپ تابىلاتىنىن اتاپ ءوتتى.
سونداي-اق ءىس-شارا بارىسىندا الماتى قالاسىنىڭ بىرقاتار ەكونوميكالىق, الەۋمەتتىك جانە ەكولوگيالىق پروبلەماسى تالقىلاندى. ءماسليحات دەپۋتاتتارى سەنات دەپۋتاتتارىنا ەرەكشە قاجەتتىلىكتەرى بار ادامدار ءۇشىن بۇقارالىق سپورتتى دامىتۋ, دارىلىك پرەپاراتتارعا باعانى تومەندەتۋ, اقىل-ەسى كەم بالالارعا مۇگەدەكتىك تاعايىنداۋ تەتىگىن قايتا قاراۋ, شاعىن جانە ورتا بيزنەستى قولداۋ باعدارلاماسى تۋرالى ماسەلەلەردى شەشۋدە قولداۋ كورسەتۋ تۋرالى وتىنىشپەن جۇگىندى.
ەستەرىڭىزگە سالا كەتەيىك, 2022 جىلعى 22 جەلتوقساندا پارلامەنت سەناتىنىڭ جالپى وتىرىسىندا دەپۋتاتتار «اگلومەراتسيالاردى دامىتۋ تۋرالى» زاڭىن, سونداي-اق وعان ىلەسپە تۇزەتۋلەر پاكەتىن قابىلداپ, پرەزيدەنتكە قول قويۋعا جولداعان بولاتىن. جاڭا 2023 جىلدىڭ 1 قاڭتارىندا مەملەكەت باسشىسى قاسىم-جومارت توقاەۆ «اگلومەراتسيالاردى دامىتۋ تۋرالى» زاڭعا قول قويدى. وسىعان بايلانىستى دەپۋتاتتار ەلىمىزدەگى ءىرى الماتى اگلومەراتسياسىن دامىتۋ ءۇشىن سەنات پەن ءماسليحات دەپۋتاتتارىنىڭ كۇش-جىگەرىن بىرىكتىرۋدىڭ ماڭىزدىلىعىن اتاپ ءوتتى.
