ۇكىمەت باسشىسى يندۋستريا جانە ينفراقۇرىلىمدىق دامۋ مينيسترلىگىنىڭ ۇجىمىنا مارات قاراباەۆتى تانىستىرا وتىرىپ, ونىڭ جاڭا تەحنولوگيالار, يندۋستريا جانە يننوۆاتسيالىق دامۋ سالالارىندا جۇمىس تاجىريبەسى مول, ءوزىن ماقساتقا قول جەتكىزۋدە قاجەتتى رەسۋرستاردى جۇمىلدىرا الاتىن جوعارى بىلىكتى مامان رەتىندە كورسەتكەنىن اتاپ ءوتتى.
«مەملەكەت باسشىسى وڭدەۋ ونەركاسىبىنىڭ ءوسۋ قارقىنىن جانە قوسىمشا قۇنى جوعارى قايتا وڭدەۋ ونىمدەرىن شىعارۋدى ىنتالاندىرۋ, سونداي-اق يندۋستريانىڭ بازالىق سالالارىن, لوگيستيكالىق الەۋەتتى جانە كولىك ينفراقۇرىلىمىن دامىتۋ جونىندە ماڭىزدى مىندەتتەردى بەلگىلەدى», دەدى ءاليحان سمايىلوۆ.
پرەمەر-مينيستر ەكولوگيا جانە تابيعي رەسۋرستار مينيسترلىگىنىڭ ۇجىمىنا ءزۇلفيا سۇلەيمەنوۆانى تانىستىرا وتىرىپ, ۆەدومستۆو بۇرىنعى ەكولوگيالىق ماسەلەلەردى, ونىڭ ىشىندە ارال تەڭىزى مەن سەمەي وڭىرىنە قاتىستى ماسەلەلەردى شەشۋ, سونداي-اق سۋ رەسۋرستارىن باسقارۋ جانە تابيعات پەن جانۋارلار الەمىن قورعاۋ جونىندەگى مىندەتتەرگە قول جەتكىزۋ بويىنشا جۇمىستى جانداندىرۋى ءتيىس ەكەنىن اتاپ ءوتتى.
ء«ىرى كاسىپورىنداردىڭ زياندى قالدىقتارىن كەزەڭ-كەزەڭمەن تومەندەتۋگە قول جەتكىزۋ جانە ولاردى جاڭا تەحنولوگيالاردى ەنگىزۋگە ىنتالاندىرۋ قاجەت, ويتكەنى بۇل ازاماتتارىمىزدىڭ دەنساۋلىعىنا تىكەلەي بايلانىستى», دەدى ءاليحان سمايىلوۆ.
ادىلەت مينيسترلىگىنىڭ ۇجىمىمەن كەزدەسۋدە پرەمەر-مينيستر جاڭا باسشى ازامات ەسقاراەۆ پەن ۆەدومستۆو قىزمەتكەرلەرى جاقىندا قابىلدانعان بارلىق زاڭدار بويىنشا زاڭعا تاۋەلدى اكتىلەردى ازىرلەۋدى جانە وسى ماسەلەدە ءتيىستى ۆەدومستۆوارالىق ۇيلەستىرۋدى قامتاماسىز ەتۋى ءتيىس ەكەنىن ايتتى.
سونىمەن قاتار, ونىڭ ايتۋىنشا, نورماتيۆتىك-قۇقىقتىق اكتىلەردى ساراپتاۋ ساپاسىن ارتتىرۋ, جالپى ساراپشىلار قوعامداستىعىمەن بەلسەندى ءوزارا ءىس-قيمىل جاساۋ جانە «مودەلدىك» زاڭدار نىسانىندا جاڭا زاڭنامالىق بازانى قالىپتاستىرۋ بويىنشا جۇمىستى جالعاستىرۋ قاجەت.
«ەل پرەزيدەنتى مەملەكەتتىك باسقارۋدىڭ بارلىق دەڭگەيلەرىندە شەشىم قابىلداۋ پروتسەسىن جەدەلدەتۋ مىندەتىن قويىپ وتىر. مۇنداي ءتاسىل قاجەتتى الەۋمەتتىك جانە ەكونوميكالىق رەفورمالاردى جەدەل جۇرگىزۋگە مۇمكىندىك بەرەدى», دەدى ءاليحان سمايىلوۆ.
وقۋ-اعارتۋ ءمينيسترى عاني بەيسەمباەۆتىڭ الدىندا تۇرعان باسىم مىندەتتەردى اتاپ وتكەن ۇكىمەت باسشىسى «جايلى مەكتەپ» ۇلتتىق جوباسىن ساپالى ىسكە اسىرۋ, وقۋ ورىندارىنىڭ قاۋىپسىزدىگىن قامتاماسىز ەتۋ, سالانى وقىتۋ مەن تسيفرلاندىرۋدىڭ وزىق ادىستەمەلەرىن ەنگىزۋ قاجەتتىگىنە نازار اۋداردى.
ونىڭ ايتۋىنشا, مەكتەپكە دەيىنگى جانە مەكتەپتەن تىس, كاسىپتىك ءبىلىم بەرۋ جۇيەسىن ودان ءارى دامىتۋ قاجەت.
ء«بىلىم بەرۋدىڭ باستاپقى كەزەڭدەرىندە ادامي كاپيتالدىڭ جانە تۇتاستاي مەملەكەتىمىزدىڭ ودان ءارى دامۋىنىڭ نەگىزى قالانادى. ۇكىمەت تاراپىنان ءبىلىم بەرۋ سالاسىنا كوپ كوڭىل بولىنەدى: مۇعالىمدەردىڭ جالاقىسى كوتەرىلۋدە, جاڭا مەكتەپتەر مەن بالاباقشالار اشىلۋدا, وقىتۋدىڭ زاماناۋي فورماتتارى ەنگىزىلىپ جاتىر. ءبىز سالانىڭ بارلىق پروبلەمالىق ماسەلەلەرىن جوسپارلى تۇردە قاراپ, شەشىم قابىلداۋدى جالعاستىرامىز», دەپ ءاليحان سمايىلوۆ بۇرىنعى وقۋ-اعارتۋ ءمينيسترى اسحات ايماعامبەتوۆكە اتقارعان جۇمىسى ءۇشىن العىس ءبىلدىردى.
ۇكىمەت باسشىسى مادەنيەت جانە سپورت مينيسترلىگىنىڭ ۇجىمىنا جاڭا باسشى اسحات ورالوۆتى تانىستىرا وتىرىپ, ۆەدومستۆونىڭ باسىم مىندەتتەرى قازاقستاننىڭ تاريحي-مادەني مۇراسىن ساقتاۋ جانە دارىپتەۋ, رەسپۋبليكانىڭ حالىقارالىق ارەناداعى بەدەلىن ارتتىرۋ, سونداي-اق سپورتتى دامىتۋ تاسىلدەرىن وزگەرتۋ بولىپ تابىلاتىنىن اتاپ ءوتتى.
«بۇقارالىق سپورتتى دامىتۋعا باسا نازار اۋدارىپ, كاسىبي سپورتشىلاردىڭ جاڭا بۋىنىن دايارلاۋ دەڭگەيىن كوتەرۋىمىز كەرەك. بارلىق كۇش-جىگەر وسىعان جۇمسالۋى ءتيىس», دەدى ءاليحان سمايىلوۆ.
