شاحمات جانكۇيەرلەرىنىڭ ەسىندە بولسا, بىلتىر دا جىل باسىن ءسۇيىنشى حابارمەن باستاپ, وقىرماندارىمىزدى قۋانتقان ەدىك. پولشانىڭ باس شاھارى – ۆارشاۆادا وتكەن شاحماتتىڭ بليتس تۇرىنەن ءبيبىسارا اساۋباەۆا تۇڭعىش رەت ايەلدەر اراسىنداعى الەم چەمپيوناتىندا توپ جارعان-دى. مىنە, ءبيبىسارا بيىل دا سول بيىگىنەن كورىنىپ, قاتارىنان ەكىنشى جىل شاحمات الەمىندەگى تەڭدەسسىز سپورتشى اتاندى. سونداي-اق ول بىلتىر قازاقستاندىق شاحماتشىلار اراسىنان ەرەسەكتەر اراسىنداعى دۇنيەجۇزىلىك دودادا دارالانعان تۇڭعىش سپورتشى اتانىپ, əلەم چەمپيوناتتارىندا ەڭ جاس چەمپيون اتانعان العاشقى شاحماتشى رەتىندە تاريحقا ءوز اتىن التىن ارىپتەرمەن جازدىردى.
حالىقارالىق شاحمات فەدەراتسياسى (FIDE) مەن قازاقستان شاحمات فەدەراتسياسى ۇيىمداستىرعان الماتىداعى الەم بىرىنشىلىگىنە دۇنيەجۇزىنىڭ 46 مەملەكەتىنەن 178 ەر مەن 98 ايەل شاحماتشى باق سىنادى. جەر-جاھاننىڭ ەڭ تاڭداۋلى گروسسمەيستەرلەرى جينالعان الەمدىك دودانىڭ سوڭعى تۋرىنا دەيىن ب.اساۋباەۆا راپيدتەن الەم چەمپيونى قىتايلىق تان چجۋنيمەن يىق تىرەستىرىپ, تۋرنير كەستەسىنىڭ ءبىرىنشى ورنىن ءوزارا ءبولىسىپ تۇرعان ەدى. شەشۋشى, سوڭعى تۋردا وتانداسىمىز جەڭىسكە جەتىپ, قىتايلىق شاحماتشى قارسىلاسىنا جول بەرگەننەن كەيىن, الەم بىرىنشىلىگىنىڭ جەڭىمپازى مەن كۇمىس جۇلدەگەرىنىڭ ەسىمى بەلگىلى بولدى. ال قولا جۇلدە رەسەيلىك پولينا شۋۆالوۆاعا بۇيىردى.
ەرلەر اراسىنداعى باسەكەدە نورۆەگيالىق ماگنۋس كارلسەن راپيد جانە بليتستەن الەم چەمپيونى اتانىپ, بىلتىرعى اتاعىن قورعاي ءبىلدى. ال راپيدتەن قىزدار اراسىنداعى التىندى قىتايلىق تان چجۋني يەلەنسە, كۇمىس جۇلدە وتانداسىمىز دينارا سادۋاقاسوۆاعا بۇيىرعان ەدى.
