بيىلعى جىلدىڭ باستى جارىسى – بەيجىڭدە الاۋى تۇتانعان قىسقى وليمپيادا مەن پاراليمپيالىق ويىندار ەكەنى داۋسىز. وكىنىشكە قاراي, قىتاي جەرىندە ۇيىمداستىرىلعان اق قار, كوك مۇز ۇستىندەگى دودادا جەرلەستەرىمىز جوق دەگەندە كەيىنگى ەكى وليمپياداداعى جەتىستىگىمىزدى قايتالاي الماي (2014 جىلى سوچيدە دەنيس تەن جانە 2018 جىلى پحەنچحاندا يۋليا گالىشەۆا قولا جۇلدە ولجالاعان بولاتىن), ەلگە ابىرويسىز ورالدى. الەمنىڭ 91 مەملەكەتىنەن كەلگەن 3 مىڭعا تارتا سپورتشىنىڭ قاتىسۋىمەن وتكەن بايراقتى بəسەكەدە قازاقستاننىڭ 34 سپورتشىسى باق سىناعان ەدى.
ەسەسىنە, ءدال سول بەيجىڭدە وتكەن پاراليمپيادادا الەكساندر گەرليتس قازاقستان قۇراماسىنىڭ قورجىنىنا قولا مەدال سالدى. دۇنيە ءجۇزىنىڭ 46 مەملەكەتىنەن 600-گە جۋىق پارا سپورتشى قاتىسقان بايراقتى باسەكەدە پارابياتلوننان 10 شاقىرىمعا جارىستا وتانداسىمىزدىڭ جۇلدىزى جانىپ, مارە سىزىعىن 34:51.1 ۋاقىت كورسەتكىشىمەن ءۇشىنشى بولىپ كەستى.
2022 جىلى كوماندالىق سپورتتا دا وتانداستارىمىز اۋىز تولتىرىپ ايتارلىقتاي مول تابىسقا قول جەتكىزدى. اتاپ ايتار بولساق, بۇعان دەيىن جەڭىلىستەن كوز اشپاي, جانكۇيەرلەردى ۇنەمى جەرگە قاراتىپ جۇرەتىن فۋتبولدان قازاقستان ۇلتتىق قۇراماسى وسىدان بىرەر جىل بۇرىن تۇساۋى كەسىلگەن سۋ جاڭا تۋرنير – ۇلتتار ليگاسىنىڭ بيىلعى باسەكەسىندە اتوي سالىپ, بارشا فۋتبول جانكۇيەرىن قۋانتتى. اتالعان ءتۋرنيردىڭ س ليگاسىندا ونەر كورسەتكەن جەرلەستەرىمىز ەۋروپانىڭ الدىڭعى قاتارلى قۇراماسى – سلوۆاكيانى ەكى ماتچتا دا سان سوقتىرىپ, بەلارۋس, ازەربايجان سەكىلدى ورتا دەڭگەيدەگى قۇرامالاردان ۇپاي الىپ, كەلەسى جىلى ۆ ليگاسىندا وينايتىن بولدى. بۇل سىندا قازاقستان فۋتبولشىلارىن شۆەتسيا, اۋستريا, چەحيا, انگليا, ۋەلس سەكىلدى ەۋروپانىڭ ازۋلى قۇرامالارى كۇتىپ تۇر.
14 جاسقا دەيىنگى جاسوسپىرىمدەر قۇراماسى ەل تاريحىندا العاش رەت الەمدىك دوداعا قاتىسىپ, ۇزدىك ءتورت قۇرامانىڭ قاتارىنا ىلىكتى. جاس تەننيسشىلەرىمىز توپتىق باسەكەدە الەم چەمپيوندارى – يتاليا جاستارىن جولدان تايدىرسا, قولا جۇلدە ءۇشىن ماتچتا الەمنىڭ ەكى مارتە ەكس-چەمپيونى اقش قۇراماسىنا جول بەردى. ال ەلەنا رىباكينا قازاقستان تەننيسشىلەرى اراسىندا العاش بولىپ «ۇلكەن دۋلىعا» ءتۋرنيرىن جەڭىپ الدى.
بيىل قازاقستاندا العاش رەت ATP 500 سەرياسىنىڭ ءتۋرنيرى ۇيىمداستىرىلعانىن ايتا كەتۋ كەرەك. بۇل جارىستا «ۇلكەن دۋلىعا» ءتۋرنيرىنىڭ 21 دۇركىن چەمپيونى, الەمنىڭ 7-راكەتكاسى نوۆاك دجوكوۆيچ جەڭىمپاز اتاندى.
جەكەلەگەن سپورت تۇرلەرىنە كەلەر بولساق, موڭعوليانىڭ استاناسى – ۇلان-باتىردا وتكەن كۇرەس تۇرلەرىنەن ازيا بىرىنشىلىگىندە قازاقستاننىڭ بالۋاندارى 21 جۇلدەگە قول جەتكىزدى. ازامات داۋلەتبەكوۆ (86 كگ), مەيىرجان شەرماحانبەت (67 كگ), ءالىمحان سىزدىقوۆ (130 كگ) جانە ايەلدەر كۇرەسىنەن ءمادينا باقبەرگەنوۆا (68 كگ) مەن ءجاميلا باقبەرگەنوۆانىڭ (72 كگ) باق جۇلدىزى جانىپ, التىننان القا تاقتى. ءمادينا فينالدا توكيو وليمپياداسىنىڭ قولا جۇلدەگەرى, 2021 جىلعى الەم چەمپيونى قىرعىزستاندىق مەەريم جۋمانازاروۆانى سان سوقتىرعانىن ەرەكشە اتاپ وتكەن ءجون.
جەڭىل اتلەتيكادان وتكەن الەم چەمپيوناتىندا قازاقستان قۇراماسىنىڭ قورجىنىنا تاريحي التىن جۇلدە ءتۇستى. اقش-تىڭ يۋدجين قالاسىندا ۇيىمداستىرىلعان الەمدىك جارىستا قازاقستانداعى Altay Athletics كلۋبىنىڭ سپورتشىسى تەگى كەنيالىق نورا دجەرۋتو 3000 مەترگە كەدەرگىلەر ارقىلى جۇگىرۋدەن الدىنا جان سالعان جوق. 8:53.02 ۋاقىت كورسەتكىشىمەن ول 2022 جىلدىڭ ۇزدىك ناتيجەسىن تىركەپ, قازاقستاننىڭ الەم چەمپيوناتى تاريحىنداعى العاشقى التىنىن الىپ بەردى.
بيىل بوكستان əلەم چەمپيوناتى وتپەسە دە, بىلعارى قولعاپ شەبەرلەرى ازيا چەمپيوناتىندا ەرلىك جاسادى. 2019 جىلدان بەرى ەرلەر مەن ايەلدەردىڭ سارى قۇرلىق باسەكەسى بىرگە وتكىزىلىپ كەلەدى. يوردانيانىڭ اممان قالاسىندا وتكەن بوكسشىلاردىڭ باسەكەسىندە جەرلەستەرىمىز 21 جۇلدە (6 التىن, 7 كۇمىس, 8 قولا) جەڭىپ الدى. ونىڭ 12-ءسى (3 التىن, 6 كۇمىس, 3 قولا) ەرلەرگە, 9-ى (3 التىن, 1 كۇمىس, 5 قولا) قىزدار قۇراماسىنا تيەسىلى. ەرلەردەن سانجار تاشكەنباي (48 كگ), اسلانبەك شىمبەرگەنوۆ (71 كگ) جانە ايبەك ورالباي (92 كگ) امماندا ءانۇرانىمىزدى شىرقاتسا, قىزداردان الۋا بالقىبەكوۆا (48 كگ), جاينا شەكەربەكوۆا (54 كگ), كارينا يبراگيموۆا (57 كگ) ازيا چەمپيونى اتاندى.
دەسەك تە, بيىل «əتتەگەن-اي» دەگەن كەزدەرىمىز دە از بولعان جوق. مəسەلەن, جوعارىدا ايتىپ وتكەندەي, بەيجىڭدەگى قىسقى وليمپيادادان جەرلەستەرىمىزدىڭ جۇلدەسىز قالۋى جانكۇيەرلەردىڭ كوڭىلىنە كəدىمگىدەي سەلكەۋ ءتۇسىردى. سونىمەن قاتار بىلەكتى بالۋاندارىمىز بەن تاتامي ۇستىندە تايتالاسقا تۇسكەن دزيۋدوشىلارىمىز جانكۇيەرلەردىڭ التىننىڭ سىڭعىرىن ەستىسەك دەگەن ارمان-تىلەگىن ورىنداي المادى. تاشكەنت تاتاميىندە جەرلەستەرىمىزگە نەبارى ەكى-اق جۇلدە بۇيىردى. ايەلدەر اراسىنداعى باسەكەنىڭ اسا جەڭىل سالماعىندا بەلدەسكەن ءابيبا ابۋجاقىنوۆا قولا جۇلدە ولجالاپ, قازاق قىزدارى اراسىندا الەم چەمپيوناتىندا جۇلدە العان ءبىرىنشى بالۋان اتاندى. ال ەرلەر اراسىندا 60 كيلودا تاتاميگە شىققان ەلدوس سمەتوۆ ەكىنشى رەت الەم چەمپيوناتىنىڭ قولا مەدالىن كەۋدەسىندە جارقىراتتى.
بەلگرادتاعى (سەربيا) كۇرەس تۇرلەرىنەن الەم بىرىنشىلىگىندە ەركىن كۇرەستەن ازامات داۋلەتبەكوۆ (86 كگ) پەن گرەك-ريمنەن ايدوس سۇلتانعالي (60 كگ) قولاعا قول جەتكىزسە, ايەلدەر كۇرەسىنەن ءجاميلا باقبەرگەنوۆا (72 كگ) التىن جۇلدەگە سىنىق سۇيەم قالعاندا ءسۇرىنىپ, كۇمىس جۇلدەنى قاناعات تۇتتى. فينالدا ول جاستار اراسىنداعى الەم چەمپيوناتىنىڭ ەكى دۇركىن جەڭىمپازى 18 جاستاعى امەريكالىق ەلو اميتتان جەڭىلىپ قالدى.
