فوتو: ktf.kz
قازاقستان تەننيس فەدەراتسياسى حابارلاعانداي, بۇگىن ەلىمىزدىڭ ءبىرىنشى راكەتكاسى, كوماندا كاپيتانى الەكساندر بۋبليك كورتقا شىعادى. ول شۆەيتساريانىڭ اسا تاجىريبەلى ويىنشىسى ستەن ۆاۆرينكامەن سىنعا تۇسەدى. ويىن شامامەن استانا ۋاقىتىمەن 13.30-دا باستالادى. جىبەك قۇلامباەۆا الەمنىڭ 35-راكەتكاسى جيل تايحمانمەن شەبەرلىك بايقاسادى. ەڭ سوڭعى باسەكە – ارالاس جۇپتا الەكساندر بۋبليك پەن يۋليا پۋتينتسەۆا ستەن ۆاۆرينكا – بەليندا بەنچيچپەن وينايدى.
جارىستىڭ ءبىرىنشى كۇنى قازاقستاندىقتار ءۇشىن ءساتسىز بولدى. يۋليا پۋتينتسەۆا الەمنىڭ 13-راكەتكاسى, توكيو وليمپياداسىنىڭ چەمپيونى بەليندا بەنچيچكە ەسە جىبەردى – 6:7(0:7), 3:6. ءبىرىنشى سەتتە قازاقستاندىق تەننيسشى 4:2 ەسەبىمەن الدا تۇردى. ەسەپ 5:4 بولعان مەزەتتە دە ەكى سەت-پوينتتى پايدالانا المادى. ەكىنشى پارتيادا دا 2:0 ەسەبىمەن العا شىققانىمەن, جەڭىلىس تاپتى.
تيموفەي سكاتوۆ الەمنىڭ 56-راكەتكاسى مارك-اندرە حۋسلەرگە تارتىستى ماتچتا جول بەردى – 6:4, 3:6, 3:6.
وسىلايشا, شۆەيتساريا 2:0 ەسەبىمەن الدا تۇر.
