ۇلتتىق بانك باسشىسى ءپىرماتوۆ دەپۋتاتتىڭ ساۋالىنا بەرگەن جاۋابىندا وتاندىق ەكونوميكاداعى اقشانىڭ قۇنسىزدانۋىنىڭ باستى ولشەمى ۆاليۋتا باعامى ەمەس, ەلدەگى ينفلياتسيا دەڭگەيى ەكەنىن, زەينەتاقى اكتيۆتەرىن ينۆەستيتسيالاۋدىڭ نەگىزگى ماقساتى ۇزاق مەرزىمدى پەرسپەكتيۆادا ينفلياتسيا دەڭگەيىنەن جوعارى تابىس الۋ ەكەنىن ايتتى.
«ماكروەكونوميكالىق جاعدايدىڭ قيىندىعىنا قاراماستان, بيىلعى جىلدىڭ باسىنان بەرى بجزق زەينەتاقى اكتيۆتەرىنىڭ كىرىستىلىگى وڭ بولدى. بۇل رەتتە تۇتاستاي العاندا, بجزق-دا زەينەتاقى اكتيۆتەرىن شوعىرلاندىرۋدان كەيىنگى كەزەڭدە (2014 جىلعى ءساۋىر – 2022 جىلعى قاراشا) جيناقتالعان ينفلياتسيا 111,2 پايىزعا, زەينەتاقى اكتيۆتەرىنىڭ جيىنتىق كىرىستىلىگى 114,2 پايىزعا جەتتى. وسىلايشا, بەلگىلى ءبىر قىسقا مەرزىمدە الىنعان كىرىستىلىك نەگىزىندە جاسالعان بجزق زەينەتاقى اكتيۆتەرىن باسقارۋدىڭ تيىمسىزدىگى تۋرالى تۇجىرىمدار دۇرىس ەمەس», دەدى ءپىرماتوۆ.
ول جيناقتاۋشى زەينەتاقى جۇيەسىنىڭ تۇراقتىلىعى تۇرعىسىنان تابىستىلىق پەن ينفلياتسيا كورسەتكىشتەرىن ۇزاق ۋاقىت كوكجيەگى بويىنشا قاراستىرعان ورىندى دەپ ءتۇسىندىردى.
ۇلتتىق بانك باسشىسى قارجىلىق رەتتەۋشىنىڭ بجزق زەينەتاقى اكتيۆتەرىن قالاي جانە قايدا ينۆەستيتسيالايتىنى تۋرالى دا ايتتى.
«ۇلتتىق بانكتىڭ ينۆەستيتسيالىق ساياساتى ۆاليۋتالار, ەلدەر, سەكتورلار مەن ەميتەنتتەر بويىنشا قارجى قۇرالدارىنىڭ ءارتۇرلى تۇرلەرىنە ينۆەستيتسيالاۋدى كوزدەيدى. بجزق زەينەتاقى اكتيۆتەرى تەك نارىق جاعدايىندا ينۆەستيتسيالانادى, بۇل سالىمشىلاردىڭ زەينەتاقى جيناقتارىنىڭ ءادىل قايتارىلۋىن قامتاماسىز ەتەدى», دەدى ول.
ۇلتتىق بانك باسشىسى جەرگىلىكتى نارىقتاعى زەينەتاقى اكتيۆتەرىنىڭ نەگىزگى بولىگى سەنىمدى ەميتەنتتەردىڭ: قارجى مينيسترلىگىنىڭ, كۆازيمەملەكەتتىك كومپانيالاردىڭ جانە حالىقارالىق قارجى ۇيىمدارىنىڭ باعالى قاعازدارىنا ينۆەستيتسيالانعانىن قوستى. بۇل بجزق زەينەتاقى اكتيۆتەرىنىڭ ساقتالۋى مەن تابىستىلىعىن قامتاماسىز ەتەدى. زەينەتاقى اكتيۆتەرىنىڭ ءبىر بولىگى قارجى قۇرالدارىنىڭ گەوگرافياسى مەن ءتىزىمىن كەڭەيتۋ, سونداي-اق پورتفەلدىڭ ساپاسىن, وتىمدىلىگىن جانە ۇزاق مەرزىمدى تابىستىلىعىن ارتتىرۋ ءۇشىن سىرتقى نارىقتارعا ينۆەستيتسيالانادى.
بۇل رەتتە تەڭگەدە نوميناتسيالانعان قارجى قۇرالدارىنىڭ اعىمداعى ۇلەسى شەتەل ۆاليۋتاسىنداعى زەينەتاقى اكتيۆتەرىنىڭ جالپى كولەمىنىڭ 71,5 پايىز – 28,5 پايىزى دەڭگەيىندە.
«بجزق زەينەتاقى اكتيۆتەرىنىڭ ۆاليۋتالىق بولىگىن ءتيىمدى ينۆەستيتسيالاۋ ماقساتىندا تاۋەكەل مەن تابىستىلىقتىڭ وڭتايلى اراقاتىناسىن قامتاماسىز ەتەتىن جاڭا ستراتەگيالىق ءبولۋ ازىرلەندى. ۆاليۋتالىق اكتيۆتەردى باسقارۋ يندەكستىك نەگىزدە جۇزەگە اسىرىلادى, ول حالىقارالىق تاجىريبەدە كەڭىنەن قولدانىلادى جانە جاھاندىق اكتسيالار, دامىعان جانە دامۋشى ەلدەردىڭ وبليگاتسيالارى, ينۆەستيتسيالىق دەڭگەيدەگى ەميتەنتتەردىڭ كورپوراتيۆتىك وبليگاتسيالارى سياقتى شەتەلدىك اكتيۆتەردىڭ نەگىزگى سىنىپتارىنا ينۆەستيتسيالاۋدى كوزدەيدى», دەدى عالىمجان ءپىرماتوۆ.
