ايەلدەر اراسىنداعى قازاقستاننىڭ ءبىرىنشى راكەتكاسى ەلەنا رىباكينا 2022 جىلدى 21-ورىنمەن قورىتىندىلايدى. ول بيىلعى قاڭتار ايىندا جاريالانعان رەيتينگتە 14-ورىندا تۇرعان ەدى. ال يۋليا پۋتينتسەۆا الەمدىك رەيتينگتە ءۇش ساتى جوعارىلاپ, 51-ورىنعا كوتەرىلدى. پۋتينتسەۆا 2022 جىلدى 42-ورىنمەن باستاعان-دى. جۇپتىق سىندا ونەر كورسەتەتىن اننا دانيلينا رەيتينگتەگى 11-ورنىن ساقتاپ قالدى. اننا قاڭتار ايىندا ۇيىمداستىرىلعان «ۇلكەن دۋلىعا» ساناتىنداعى العاشقى ءىرى جارىس – اۋستراليا اشىق چەمپيوناتىنىڭ جۇپتىق باسەكەسىندە فينالعا دەيىن جەتكەنىن تەننيس جانكۇيەرلەرى ۇمىتا قويماعان بولار.
ەرلەر اراسىنداعى رەيتينگكە توقتالار بولساق, قازاقستاننىڭ ءبىرىنشى راكەتكاسى الەكساندر بۋبليك جىلدى 37-ورىنمەن اياقتادى. ول قاڭتار ايىنداعى تىزىمدە 36-ساتىدا تۇرعان ەدى. سونداي-اق جەرلەستەرىمىزدەن تيموفەي سكاتوۆ (142-ورىن), ميحايل كۋكۋشكين (188) جانە بەيبىت جۇقاەۆ (308) ءوز كورسەتكىشتەرىن جاقسارتتى.
