بۇل داۋ 2020 جىلى مامىر ايىندا ورال قالالىق اكىمدىگىنىڭ قالانىڭ باس جوسپارىن بەلدەن باسىپ, «كۋبلەي» زاۋىتىنىڭ سانيتارلىق قورعاۋ ايماعىنا «تسيولكوۆسكي» تۇرعىن ءۇي كەشەنىن سالۋعا رۇقسات بەرەتىن قاۋلى شىعارىپ بەرگەن كۇننەن باستالعانىن ەسكە سالا كەتەيىك.
وسىعان دەيىن قر اۋىل شارۋاشىلىعى مينيسترلىگى دە زاۋىتقا اراشا ءتۇسىپ, ارنايى مالىمدەمە جاساعانىن ەسكە سالا كەتۋ كەرەك.
بيىل 23 قاراشا كۇنى ورال قالاسىنىڭ №2 قالالىق سوتى «كۋبلەي» داۋىنا قاتىستى نۇكتەنى قويا الماي, تاراپتاردىڭ ىمىراعا كەلۋىن سۇراپ, ءىستى بەلگىسىز مەرزىمگە توقتاتقان ەدى. ەكى جاق ماسەلەنى مەدياتسيا جولىمەن شەشپەيتىنىن ايتقان سوڭ بۇگىن قايتا ەكىنشى رەت ءسوزجارىس ءوتتى.
ءسوزجارىستىڭ باسىندا «كۋبلەي» زاۋىتىنىڭ زاڭدى وكىلدەرى قر يندۋستريا جانە ينفراقۇرىلىمدىق دامۋ مينيسترلىگى مەن قر دەنساۋلىق ساقتاۋ مينيسترلىگىنىڭ جىبەرگەن جاڭا جاۋابىن ءىس ماتەريالدارىنا قوسۋدى سۇرادى. «يرمەنوۆا» جەكە كاسىپكەرلىگىنىڭ زاڭگەرلەرى مەن ورال قالاسى اكىمدىگىنىڭ وكىلدەرى كەرىسىنشە سۋدياعا جاڭا مالىمەتتەردى ىسكە قوسۋدىڭ قاجەتى جوق ەكەنىن ايتىپ, قارسى شىقتى. بىراق ۇكىمەتكە ساۋالحاتتى جولداعان بقو ەكونوميكالىق سوتى بولعاندىقتان سۋديا ۆەدومستۆولاردىڭ جولداعان جاۋابىن ءىس ماتەريالدارىنا قوستى.
ال سانيتارلىق-ەپيدەميولوگيالىق باقىلاۋ كوميتەتىنىڭ سوتقا جىبەرگەن جاڭا جاۋابىندا «كۋبلەي» زاۋىتىنىڭ سانيتارلىق قورعاۋ ايماعى بار, ول اۋماق كەمىندە 100 مەتر بولۋى ءتيىس جانە وندا تۇرعىن ۇيلەردى سالۋعا تىيىم سالىنعان دەگەن جاۋاپ جولداعان.
«كۋبلەي» زاۋىتىنىڭ وكىلدەرى جەرگىلىكتى بيلىك قۇجاتتاردى زاڭسىز راسىمدەۋدەن بولەك بيۋدجەتتىڭ قاراجاتىن تالان-تاراجعا تۇسىرگەنىن, ويتكەنى زاڭسىز سوعىلعان ۇيلەرگە كوممۋنالدىق-ينجەنەرلىك جۇيەلەردى تارتىپ ءارى قوسۋعا رۇقسات بەرگەنىن, وسىلايشا پايدالانۋعا بەرىلمەگەن ۇيلەرگە قونىستانۋعا مۇمكىندىكتى ادەيى بەرىپ وتىرعانىن العا تارتىپ وتىر.
«بۇعان قاتىستى بولەك قىلمىستىق ءىس قوزعاۋعا بولادى. زاڭسىز سوعىلعان ۇيگە مەملەكەت ەسەبىنەن كوممۋنالدىق قىزمەت تۇرلەرىن قوسىپ بەرۋ – بيۋدجەتتىڭ اقشاسىن شاشۋ. سەبەبى 2020 جىلدىڭ 28 جەلتوقسانى كۇنى بقو سوتىنىڭ شەشىمى شىققان. وندا ورال قالاسىنىڭ 3 قاۋلىسى دا زاڭسىز شىعارىلعانى ايتىلعان. دەمەك سول قاۋلى شىققان ساتتەن باستاپ, كوممۋنالدىق جۇيەلەردى ورناتاتىن مەكەمەلەر جۇمىسىن سول ساتتە توقتاتۋى كەرەك. سوتتىڭ شەشىمىن ورىنداماسا زاڭنىڭ ۇستەمدىگىنىڭ ءمانى نەدە؟
ەلەكتر ەنەرگيا, ىستىق جانە سۋىق سۋ, كارىز جۇيەسى زاڭسىز تارتىلعان ءارى قوسىلعان. وكىنىشكە قاراي بۇعان جەرگىلىكتى پروكۋراتۋرا دا ءلام-ميم دەي الماعان. كوممۋنالدىق قىزمەت تۇرلەرى بەرىلگەندىكتەن, سونى پايدالانعان قۇرىلىس كومپانياسى ءارى قاراي پاتەرلەردى ساتا باستاعان.
بۇگىن سوتتا «تسيالكوۆسكي» تۇرعىن ءۇي كەشەنىنىڭ تەك ءبىر عانا ۇيىنە قاتىستى داۋدىڭ ءوربىپ جاتقانى, ويتكەنى باس-اياعى 4 ءۇيدىڭ تەك بىرەۋىنە ادامدار زاڭسىز قونىستانىپ العانى, ال تاعى ءبىر ءۇي سانيتارلىق قورعاۋ ايماعىنا كىرمەيدى, قالعان ەكى ءۇي بولسا جارىم-جارتىلاي عانا سالىنعانى ايتىلدى.
«نەگىزى بۇل سوتتاسپاي-اق شەشىلەتىن ماسەلە. ويتكەنى, ەرمەنوۆانىڭ قاراماعىنداعى جەر تەلىمى ءبولىپ, راسىمدەۋگە بولاتىن جەر. سوندىقتان, سوتقا كەلىپ شۋ شىعارىپ جۇرگەن 1-ءۇيدىڭ تۇرعىندارىنا بۇل ماسەلەنىڭ قاتىسى جوق. ويتكەنى, ولار 100 مەترلىك اۋماققا كىرمەيدى. تەك 2-ۇيگە قاتىستى. ال 3 جانە 4-ءۇيدىڭ قۇرىلىسى مۇلدەم بىتپەگەن. ال سوت پروتسەسىنە كەلىپ جۇرگەندەردىڭ باسىم بولىگى – وسى 1-ءۇيدىڭ تۇرعىندارى. نەگىزى ەرمەنوۆا جەردى ءبولىپ, الدەقاشان ول ازاماتتارعا ۇيىنە زاڭدى تۇردە قۇجات بەرۋگە مۇمكىندىگى بار ەدى. مۇنى تۇرعىنداردىڭ ءوزى دە, كومپانيا دا تالاپ ەتپەيتىن بولىپ تۇر. ەرمەنوۆا وسى تۇرعىنداردى پايدالانۋ ارقىلى زاڭسىز سالىنعان وزگە دە ۇيلەردى زاڭداستىرعىسى كەلەدى. «كۋبلەي» زاۋىتىنىڭ جاعدايى بارلىق ادىلەتسىزدىكتىڭ دەتونارى بولۋى مۇمكىن», دەدى زاڭگەر باقىتجان بازاربەك.
