ايتۋلى شارانى استانا قالاسى اكىمدىگىنىڭ مادەنيەت باسقارماسى Amanat پارتياسىمەن بىرلەسىپ ۇيىمداستىردى. ءدۇبىرلى دوداعا تالاي بايگەدە توپ جارىپ, جۇرتشىلىقتىڭ ريزاشىلىعىنا بولەنىپ جۇرگەن ايبەك قاليەۆ, بەكارىس شويبەكوۆ, تولەگەن جامانوۆ, ءبىرجان بايتۋوۆ, رۇستەم اقىلبەكوۆ باستاعان ون ءتورت اقىن قاتىستى.
ايتىس تىزگىنىن ۇستاعان كورنەكتى اقىن, پارلامەنت ءماجىلىسىنىڭ دەپۋتاتى امانجول التاەۆ ءسوز سايىسىن تاماشالاۋعا كەلگەن اعايىنعا العىسىن ايتىپ, بايگەگە شاپقالى وتىرعان جۇيرىكتەرگە ساتتىلىك تىلەدى.
ءادىل قازىلار القاسىنىڭ قۇرامىندا قازاقستاننىڭ ەڭبەك سىڭىرگەن قايراتكەرى عالىم جايلىباي, اقىن ءاسيا بەركەنوۆا, فيلولوگيا عىلىمدارىنىڭ دوكتورى قويلىباي اسانوۆ, پارلامەنت سەناتىنىڭ دەپۋتاتى نۇرتورە ءجۇسىپ, ءماجىلىس دەپۋتاتى جاناربەك ءاشىمجان, حالىقارالىق «الاش» سىيلىعىنىڭ لاۋرەاتى داۋلەتكەرەي كاپ ۇلى مەن «حابار اگەنتتىگى» اكتسيونەرلىك قوعامىنىڭ باسقارما توراعاسى بەرىك ءۋالي بولدى.
«مەنىڭ كوتەرگەن ماسەلەم جاڭا قازاقستانعا بايلانىستى بولدى. ەلدە بىرقاتار وزگەرىس بولدى. وسى توڭىرەكتە «كوپ دۇنيەنىڭ اتىنا ەمەس, زاتىنا ءمان بەرەيىك» دەگەن تاقىرىپتا وزەكتى بولىپ تۇرعان ۇلىتاۋ, جاڭاارقا اۋدانىنداعى الەۋمەتتىك ماسەلەلەرگە نازار اۋدارايىق, جاڭعىرايىق دەگەن وي نەگىزگى ايتپاعىم بولدى. وزدەرىڭىز بىلەتىندەي, ۇلت كوسەمى احمەت بايتۇرسىن ۇلىنىڭ بيىل مەرەيتويى اتالىپ جاتىر. الاش ارىسى, ادەبيەتتىڭ اتاسى دەپ ايتىلعانىمەن, كوسەمنىڭ ساياسي قايراتكەرلىك قىرىن دا كورسەتۋگە تىرىستىم», دەدى ۇلىتاۋ وبلىسىنان كەلگەن اقىن تولەگەن جامانوۆ.
اتالعان ايتىستا وق بويى وزا شاپقان اقىندار ءۇشىن باس جۇلدەگە 3 ميلليون تەڭگە, I ورىنعا 2 ميلليون تەڭگە, II ورىنعا 1,5 ميلليون تەڭگە جانە III ورىنعا 1 ميلليون تەڭگە تىگىلدى.
بىرىنەن ءبىرى وتكەن ءسوز بارىمتاسىندا باس جۇلدەنى ءار ايتىسى ءبىر جاڭالىق, اتامۇرا ونەرىمىزدىڭ وزا شاپقان جۇيرىگى مەيىربەك سۇلتانحان يەلەندى.
I ورىندى ايتىستىڭ كوكجالى بەكارىس شويبەكوۆ يەلەنسە, II ورىن ۇلىتاۋ وبلىسىنىڭ سىرباز اقىنى تولەگەن جامانوۆقا بۇيىردى. III ورىندى ايبەك قاليەۆ, رۇستەم قايىرتاي, نۇربول جاۋىنباي, نۇرماحان جاقىپبەك الدى.
