قازاقستان • 27 جەلتوقسان، 2022

ەلدەگى كارىز-تازارتۋ جۇيەلەرى جاڭعىرتىلادى

بۇل تۋرالى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ايتتى. ۆەدومستۆو باسشىسى قالالارداعى ءتيىستى جۇمىستاردى اتقارۋ ءۇشىن قارجىلاندىرۋدىڭ ەكى تەتىگى قاراستىرىلعانىن جەتكىزدى، دەپ حابارلايدى Egemen.kz.

ايانا توعانبەك

قازاقستانداعى 68 قالادا كارىز-تازارتۋ جۇيەلەرىن سالىپ، جاڭعىرتۋ قاجەت. بۇل باعىتتاعى جۇمىس قازىر سارىاعاش، اتىراۋ جانە فورت-شەۆچەنكو قالالارىندا جۇزەگە اسىرىلىپ كەلەدى. كەلەسى جىلى اقتاۋ، لەنگەر جانە شىمكەنتتە تاعى 3 جوبانى ىسكە اسىرۋ كوزدەلىپ وتىر.

«مەملەكەت باسشىسىنىڭ تاپسىرماسىنا سايكەس 2023-2028 جىلدار ارالىعىندا ەلىمىزدە كارىز تازارتۋ جۇيەسىن سالىپ، جاڭعىرتۋ جوسپارلانعان. قازىر رەسپۋبليكاداعى 89 قالانىڭ 27-ىندە كارىز-تازارتۋ جۇيەسى قاراستىرىلماعان. 41 قالادا ونىڭ توزۋ دەڭگەيى 60%-عا تاياۋ. مينيسترلىك وسى باعىتتا قارجىلاندىرۋدىڭ ەكى ءتاسىلىن پىسىقتادى. بىرىنشىدەن، مەملەكەتتىك كەپىلدىكتى ۇسىنا وتىرىپ، حالىقارالىق قارجى ۇيىمدارىنىڭ زايىمدارىن تارتۋ ارقىلى. اتالعان ءتاسىلدى حالقى 45 مىڭنان اساتىن 26 ءىرى قالادا جۇزەگە اسىرۋ كوزدەلگەن. ەكىنشىدەن، رەسپۋبليكالىق بيۋدجەتتەن بولىنەتىن ترانسفەرتتەر ەسەبىنەن ىسكە اسىرۋ. وسى ءتاسىل حالىق سانى 45 مىڭنان اسپايتىن 36 شاعىن قالادا جۇزەگە اسادى»، دەدى قايىربەك وسكەنباەۆ.

مينيستر زايىمدىق قاراجاتتى قايتارۋدىڭ ەكى كوزى بار ەكەنىن جەتكىزدى. اتاپ ايتقاندا، تاريف پەن رەسپۋبليكالىق جانە جەرگىلىكتى بيۋدجەتتەن سۋبسيديالار ءبولۋ. «الايدا رەسپۋبليكالىق بيۋدجەتتەن بولىنەتىن سۋبسيديالاردىڭ كولەمى نەگىزگى قارىزدىڭ جالپى سوماسىنان اسپايتىن بولادى»، دەدى يدم باسشىسى.

جوعارىدا ايتىلعانداي، حالىق سانى 45 مىڭنان اسپايتىن 36 شاعىن قالاداعى كارىز-تازارتۋ جۇيەسىنە بايلانىستى جوبالار رەسپۋبليكالىق بيۋدجەتتەن بولىنەتىن ترانسفەرتتەر ەسەبىنەن ىسكە اسىرىلماق.

قالالارداعى ەكولوگيالىق احۋالدى ەسكەرە وتىرىپ، كارىز-تازارتۋ جۇيەلەرىن جاڭعىرتۋدىڭ ىسكە اسىرۋ كەزەڭدەرى مەن قارجىلاندىرۋ كوزدەرىنە بايلانىستى اتالعان جوبالاردىڭ تىزبەسى قالىپتاستىرىلدى. قارجىلاندىرۋ ماسەلەسى بويىنشا، اسىرەسە، ەۋروپا قايتا قۇرۋ جانە دامۋ بانكى مەن ازيا دامۋ بانكىمەن بەلسەندى جۇمىس جۇرگىزىلىپ جاتىر.

«مينيسترلىك كتج جوبالارىن ۋاقىتىلى ىسكە اسىرۋ جونىندەگى بارلىق قاجەتتى شارانى قابىلدادى. اتاپ ايتساق، كارىز-تازارتۋ جۇيەلەرى جوبالارىن ىسكە اسىرۋدىڭ جولدارى تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2026 جىلعا دەيىنگى تۇجىرىمداماسىندا قاراستىرىلىپ، ۇلتتىق ەكونوميكا جانە قارجى مينيسترلىكتەرىمەن بىرلەسىپ، «مەملەكەتتىك كەپىلدىكتى كوزدەيتىن سۋ ارنالارىن سالۋعا حالىقارالىق قارجى ۇيىمدارىنىڭ زايىمى» تەتىگى بويىنشا جول كارتاسى بەكىتىلدى. سونداي-اق كارىز-تازارتۋ جۇيەلەرىن سالىپ، جاڭعىرتۋ بويىنشا جوبالاردى ىرىكتەيتىن ادىستەمە ايقىندالدى»، دەدى يندۋستريا جانە ينفراقۇرىلىمدىق دامۋ ءمينيسترى.