ۇكىمەت • 22 جەلتوقسان، 2022

اگلومەراتسيالاردى دامىتۋ تۋرالى زاڭ قابىلداندى

بۇگىن سەنات سپيكەرى ماۋلەن اشىمباەۆتىڭ توراعالىعىمەن كەزەكتى پالاتا وتىرىسى ءوتتى، دەپ حابارلايدى Egemen.kz.

مەملەكەت باسشىسى قاسىم-جومارت توقاەۆ 2022 جىلعى 16 ناۋرىزداعى جولداۋىندا ەلىمىزدىڭ ينستيتۋتسيونالدىق نەگىزىن نىعايتۋ ماقساتىندا پارلامەنتتىڭ ءرولىن ايتارلىقتاي ارتتىرۋ مىندەتىن جۇكتەگەنى بەلگىلى. سوعان بايلانىستى كونستيتۋتسياعا جانە پارلامەنتتىڭ جالپى رەگلامەنتىنە وزگەرىستەر ەنگىزىلدى. وسىعان وراي پالاتا وتىرىسىنىڭ كۇن تارتىبىندە سەنات رەگلامەنتىنە ءتيىستى تولىقتىرۋلار ەنگىزۋ ماسەلەسى قارالدى.

سەناتورلار «اگلومەراتسيالاردى دامىتۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگلومەراتسيالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردى قاراپ، قابىلدادى. اتالعان زاڭدار اگلومەراتسيالاردى قالىپتاستىرۋ جانە دامىتۋ ءۇشىن قاجەتتى قۇقىقتىق، ينستيتۋتسيونالدىق ورتا قالىپتاستىرۋعا ارنالعان.

«وسى زاڭ ارقىلى ەلدى مەكەندەردى اگلومەراتسياعا جاتقىزۋدىڭ ولشەمشارتتارى، ۇكىمەتتىڭ، ۋاكىلەتتى جانە جەرگىلىكتى ورگانداردىڭ وكىلەتتىكتەرى بەكىتىلەدى. سونداي-اق بەس جىلدىق كەزەڭگە ازىرلەنەتىن اگلومەراتسيالاردى دامىتۋدىڭ كەشەندى جوسپارى قابىلدانادى. جاڭا نورمالار حالىقتى قونىستاندىرۋ جانە وندىرىستىك كۇشتەردى ورنالاستىرۋ جۇيەسىن جەتىلدىرۋگە، ينجەنەرلىك، كولىكتىك، الەۋمەتتىك ينفراقۇرىلىمدى ءتيىمدى پايدالانۋعا وڭ اسەرىن تيگىزەدى. مۇنىڭ ءبارى اگلومەراتسياعا جاتاتىن ەلدى مەكەندەردە ءومىر ءسۇرۋ دەڭگەيىن جاقسارتۋعا ىقپال ەتەدى دەپ سەنەمىز»، دەدى ماۋلەن اشىمباەۆ.

سونداي-اق سەناتورلار «وسىمدىكتەر دۇنيەسى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر دۇنيەسى جانە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردى قابىلدادى. اتالعان قۇجاتتار وسىمدىكتەر دۇنيەسىن قورعاۋ، قالپىنا كەلتىرۋ جانە پايدالانۋ سالاسىنداعى قوعامدىق قاتىناستاردى رەتتەۋگە باعىتتالعان.