كاسىپورىننىڭ وندىرىستىك قۋاتى جىلىنا 50 مىڭ تونناعا دەيىن دايىن ءونىمدى شىعارۋعا قاۋقارلى. جوبانىڭ جالپى قۇنى 20 ملن دوللار.
مۇندا دايىندالاتىن تالشىق سينتەپون, توسەك تولتىرعىش, جۇمساق جيھاز, كيىم جانە تاعى باسقا ونىمدەردىڭ وندىرىسىندە قولدانىلماق. اتالعان زاۋىتتىڭ وكىلدەرى سينتەتيكالىق تالشىقتىڭ بۇل ءتۇرى ۇزاق ۋاقىتقا دەيىن ءوز ساپاسىن جوعالتپاي, جوعارى بەرىكتىگىن ساقتايتىنىن ايتتى. سونداي-اق ودان جاسالعان زاتتار جۇمساق, جۋعا جەڭىل ءارى تەز كەبەتىنىن اتاپ ءوتتى. بۇعان قوسا ولاردىڭ گيپواللەرگەندىلىگى جوعارى.
كومپانيا وكىلدەرى ايتقانداي, كاسىپورىندا وندىرىلەتىن ءونىمنىڭ 90%-دان استامى ەكسپورتقا جىبەرىلەدى. قازىر دايىن ءونىمدى وتكىزۋ نارىقتارى انىقتالىپ, شەتەلدىك ساتىپ الۋشىلارمەن الدىن الا كەلىسىمدەر جاسالدى. سونىمەن قاتار وسى جوبانىڭ اياسىندا 100-گە جۋىق جۇمىس ورنىن قۇرۋ جوسپارلانعان.
بۇل رەتتە 2019 جىلى پەت قالدىقتارىن جۋىپ, كەپتىرۋ جانە ۇساقتاۋ بويىنشا اتالعان زاۋىتتا ءوندىرىستىڭ ءبىرىنشى كەزەڭى ىسكە اسىرىلعانىن ايتا كەتەيىك. سودان بەرى 30 مىڭ توننادان ارتىق پەت بوتەلكە ۋتيليزاتسياعا جىبەرىلىپ, قايتا وڭدەلدى. تۇتاستاي العاندا, كاسىپورىننىڭ قازىرگى وندىرىستىك قۋاتى جىلىنا 25 مىڭ توننادان اسا پەت قالدىقتى ۋتيليزاتسيادان وتكىزىپ, كادەگە جاراتۋعا مۇمكىندىك بەرىپ وتىر.
وسى ورايدا جاڭا ءوندىرىس ورنىندا حيميالىق تالشىقتى بالقىتىپ, تارتۋعا ارنالعان زاماناۋي اۆتوماتتاندىرىلعان جەلىلەر ورناتىلعانىن ايتا كەتۋ كەرەك.
