شايبالى حوككەيدەن حالىقارالىق تۋرنيرلەرگە بايلانىستى ەكى اپتالىق دەمالىسقا شىققان قحل كوماندالارى دۇيسەنبىدەن باستاپ تۇراقتى بىرىنشىلىكتەگى ماتچتارىن جالعاستىرا باستادى. نيجنەكامسكىدەگى «نەفتەحيم ارەنا» مۇز سارايىندا وتكەن ماتچتا اندرەي سكابەلكا شاكىرتتەرى قارسىلاستارىن 3:1 ەسەبىمەن تىزە بۇكتىرىپ, قاتارىنان ءۇشىنشى جەڭىسىنە قول جەتكىزدى. ءسويتىپ, استانا كومانداسى «شىعىس» كونفەرەنتسياسىنىڭ تۋرنير كەستەسىندە 8-ورىنعا كوتەرىلىپ, پلەي-وفف دەڭگەيىنە قايتا ورالدى.
كەزدەسۋدىڭ ءبىرىنشى كەزەڭىندە ەسەپ اشىلعان جوق. ۇزىلىستەن كەيىن جەرگىلىكتى حوككەيشىلەر ءوز ۇستەمدىگىن جۇرگىزە باستادى. سونىڭ ارقاسىندا ايدىن يەلەرى ماتچتىڭ ەسەبىن ءبىرىنشى اشتى. 33-مينۋتتا انسەل گاليموۆ يۋليۋس گۋداچەك قورعاعان قاقپادان ساڭىلاۋ تاپتى. ال ءۇشىنشى كەزەڭدە «بارىس» ويىنشىلارى باسەكەنىڭ تىزگىنىن ءوز قولىنا الدى. الدىمەن 42-مينۋتتا مايكل شاپيۋ تارازى باسىن تەڭەستىرسە, ارادا 12 مينۋت وتكەندە دجەرەمي براككو ەلوردا كلۋبىنا باسىمدىق سىيلادى. ويىننىڭ اياقتالۋىنا 53 سەكۋند قالعاندا مايكل شاپيۋ ەكىنشى رەت مەرگەندىگىمەن كوزگە ءتۇسىپ, ماتچتىڭ نۇكتەسىن قويدى – 3:1.
«بارىس» كەلەسى ويىنىن بۇگىن ەلورداداعى «بارىس ارەنادا» ومبىنىڭ «اۆانگارد» كلۋبىمەن وتكىزەدى.
