وڭىرلەردە جۇرگىزىلگەن كوشپەلى تەكسەرۋ قورىتىندىسى بويىنشا جىلۋ ەنەرگياسىن بەرۋدىڭ شەكتەلۋىنە, جىلۋدىڭ تۇراقتى بەرىلمەۋىنە, رەزەرۆتىك ەنەرگيا كوزدەرىنىڭ جانە جوندەۋ ماتەريالدارىنىڭ اپاتتىق قورى بولماۋىنا, ەنەرگيا قۇرال-جابدىقتارىنىڭ ابدەن توزۋىنا, سونداي-اق وڭىرلەرگە كومىردىڭ ۋاقتىلى جەتكىزىلمەۋىنە قاتىستى دەرەكتەر انىقتالدى. جەرگىلىكتى اتقارۋشى ورگانداردىڭ ەسەپتەرىنە قاراماستان, بىرقاتار نىسان جىلىتۋ ماۋسىمىنا دايىن بولماي شىقتى.
وسىعان بايلانىستى ۇكىمەتكە انىقتالعان بارلىق فاكتى بويىنشا شارالار قابىلداۋ جانە جەرگىلىكتى اتقارۋشى ورگاندار قىزمەتكەرلەرىنىڭ تارتىپتىك جاۋاپكەرشىلىگىن قاراستىرۋ تاپسىرىلدى.
سونىمەن قاتار ەلىمىزدەگى 37 جىلۋ ەلەكتر ورتالىعىنىڭ تەحنيكالىق جاعدايىنا كەشەندى تالداۋ جۇرگىزىلىپ, ولاردىڭ قانداي تاۋەكەل توپ ساناتىنا جاتاتىنى انىقتالدى. 19 جەو قاۋىپتىلىگى جوعارى «قىزىل», 11 جەو «سارى» جانە 7 جەو «جاسىل» ساناتقا كىردى.
ەنەرگەتيكالىق كەشەننىڭ تۇراقتى جۇمىس ىستەۋى ءۇشىن ۇكىمەت پەن اكىمدىكتەرگە مىناداي شارالاردى قابىلداۋ تاپسىرىلدى.
شۇعىل تۇردە:
- تۇيتكىلدى جىلۋ ەلەكتر ورتالىقتارى مەن جىلۋ جەلىلەرىندەگى جاعدايدى تۇزەتۋ ءۇشىن شۇعىل شارالار جوسپارىن ازىرلەۋ;
- «قۋات نارىعى» شەڭبەرىندە 2023 جىلى جەو-لاردى جوندەۋ ناۋقانىن جۇرگىزۋگە قاجەتتى 90 ميلليارد تەڭگەگە جۋىق قوسىمشا ينۆەستيتسيا تارتۋدى قامتاماسىز ەتۋ;
- جىلۋ ەنەرگەتيكالىق كومپانيالاردىڭ وندىرىستىك قىزمەتكەرلەرىنىڭ ەڭبەكاقىسىن ورتاشا نارىقتىق جالاقى دەڭگەيىنە دەيىن ارتتىرۋدى قامتاماسىز ەتۋ;
- جىلۋ جەلىلەرىنە تەحنيكالىق اۋديت جۇرگىزۋ جانە ەلەكتر جەلىلەرى اكتيۆتەرىنە, سونىڭ ىشىندە ولاردى جەكەشەلەندىرۋدىڭ زاڭدىلىعى مەن كوممۋنالدىق مەنشىككە بەرۋدىڭ تيىمدىلىگىن تەكسەرۋ;
- حالىقتىڭ الەۋمەتتىك وسال توپتارىنا كوممۋنالدىق قىزمەتتەرگە جۇمسالاتىن شىعىنداردى سۋبسيديالاۋ تۇرىندە اتاۋلى كومەك كورسەتۋدى قامتاماسىز ەتۋ;
- ەنەرگەتيكالىق كاسىپورىنداردىڭ قىزمەتىن باقىلاۋدى كۇشەيتۋ ماقساتىندا اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ اۋماقتىق دەپارتامەنتتەرىنىڭ شتاتىن كۇشەيتۋ.
جۇيەلى تۇردە:
- ەنەرگەتيكالىق نىساندار قىزمەتىنىڭ تاۋەكەلدەرىن باسقارۋ ءىسىن باعالاۋدى جەتىلدىرىپ, وبەكتىگە شىعاتىن ناقتى باقىلاۋ ينستيتۋتىن ەنگىزۋ ارقىلى قولدانىستاعى ەنەرگەتيكالىق باقىلاۋ جۇيەسىن كۇشەيتۋ;
- ەنەرگەتيكا مينيسترلىگىنە جىلۋمەن قامتۋ سالاسىندا ماگيسترالدى جانە تاراتۋشى جىلۋ جەلىلەرىن قاداعالاۋ فۋنكتسياسىن بەرۋ;
- جىلۋمەن جانە ەلەكترمەن قامتاماسىز ەتۋ نىساندارىنىڭ جاي-كۇيىن شىنايى باعالاۋ ءۇشىن تاۋەلسىز تەحنيكالىق اۋديت ينستيتۋتىن ەنگىزۋ;
- قولدانىستاعى زاڭناما تالاپتارىن بۇزعانى جانە قارجىنى ماقساتقا ساي پايدالانباعانى ءۇشىن اكىمشىلىك قۇقىقبۇزۋشىلىق كودەكسىندە اكىمشىلىك ايىپپۇلداردى ءوسىرۋ ارقىلى ەنەرگەتيكالىق كەشەن سۋبەكتىلەرى مەن ولاردىڭ ءبىرىنشى باسشىلارىنىڭ جاۋاپكەرشىلىگىن كۇشەيتۋ;
- جىلۋمەن جانە ەنەرگيامەن قامتاماسىز ەتۋ سۋبەكتىلەرىنە ارنالعان ءوزارا مىندەتتەمەلەردىڭ رەگلامەنتتەلۋىن زاڭناما دەڭگەيىندە قامتاماسىز ەتۋ;
- تاريف قارجىسىن ماقساتقا ساي پايدالانباۋدىڭ جانە كاپيتالدى سىرتقا شىعارۋدىڭ الدىن الۋ ءۇشىن ەنەرگەتيكالىق كاسىپورىندار مەن تابيعي مونوپوليا سۋبەكتىلەرىنىڭ ساتىپ الۋلارىنا مەملەكەتتىك باقىلاۋ ورناتىپ, پروتسەدۋرالاردىڭ اشىقتىعىن قامتاماسىز ەتۋ.
كوميسسيا بىرقاتار ەنەرگەتيكالىق كاسىپورىنعا قاتىستى قارجىنى جىلىستاتۋ, سونداي-اق قاراجاتتى ماقساتقا ساي جانە ءتيىمدى پايدالانباۋ دەرەكتەرى بويىنشا جيناقتالعان ماتەريالداردى فيسكالدىق جانە قۇقىق قورعاۋ ورگاندارىنا تەرگەۋ جۇرگىزىپ, پروتسەسسۋالدىق شەشىم قابىلداۋ ءۇشىن جولدادى.
