دروندار نىسانداردى دياگنوستيكالاۋدى قاۋىپسىز ەتىپ قانا قويماي, ءۇردىستى جىلدام, ارزان جانە تيىمدىرەك ەتەدى.
«كوپىرلەردى ءداستۇرلى تۇردە تەكسەرۋ كوپ ۋاقىتتى تالاپ ەتەدى. جولشىلار ۋاكىلەتتى ورگاندارعا حابارلايدى, جول پوليتسياسىنان رۇقسات الادى جانە اۆتوموبيل قوزعالىسىن ءىشىنارا نەمەسە تولىعىمەن توقتاتادى. بۇدان بولەك ارنايى كران مەن ەسكەرتۋ بەلگىلەرىن بىرنەشە رەت جىلجىتۋعا ءماجبۇر. ال تەكسەرۋ قيىنعا سوعاتىن جەرلەرگە ماماندار بەلدەرىنە ارقان بايلاپ تۇسەدى. دروندى قولدانۋ ارقىلى جۇمىس ايتارلىقتاي جەڭىلدەپ, تەكسەرۋ ۋاقىتى 3-4 ەسە قىسقارادى. وسىلايشا ءبىز كوپىرلەر مەن جول ايرىقتارىن كوبىرەك قامتي الامىز», دەپ اتاپ ءوتتى «قازجولعزي» اق جول كونسترۋكتسيالارى جانە جاڭا تەحنولوگيالار باسقارماسىنىڭ باس مامانى قايسار شالقار.
ايتا كەتەيىك, دروندار جول قوزعالىسىنا كەدەرگى كەلتىرمەيدى, ال قاشىقتان باسقارۋ جولاۋشىلاردىڭ ءومىرى مەن دەنساۋلىعىنا قاۋىپ توندىرمەۋگە مۇمكىندىك بەرەدى. ەندىگى كەزەكتە بيىكتىكتەن قۇلاپ كەتۋ, ءوتىپ بارا جاتقان كولىكتىڭ استىنا ءتۇسۋ سىندى قاۋىپ-قاتەردىڭ الدىن الۋعا بولادى.
«درون ارقىلى زەرتتەۋ جۇرگىزۋدىڭ بىرنەشە ارتىقشىلىعى بار, ول –جاسىرىن جەرلەردى تەكسەرۋ. كەيىن تۇسىرىلگەن بەينەجازبالاردى كومپيۋتەردە ەگجەي-تەگجەيلى تالداۋعا, ءجىتى تەكسەرۋگە بولادى. سونداي-اق بولاشاقتا تەحنولوگيانىڭ كومەگىمەن ءبىز بارلىق كوپىر قۇرىلىمىن تسيفرلاندىرا الامىز. بۇگىندە ەلىمىز بويىنشا 2 مىڭنان استام كوپىر بار», دەيدى ينستيتۋت قىزمەتكەرى.
كوپىرلەردى جۇيەلى تۇردە تەكسەرۋ قۇرىلىستاردىڭ توزۋى مەن اپاتتارعا الىپ كەلەتىن اقاۋلاردى ەرتە انىقتاۋعا ءارى جويۋعا مۇمكىندىك بەرەدى. امەريكالىق تاجىريبەگە سۇيەنە وتىرىپ, ق.شالقار ۋاقىتىلى دياگنوستيكا جاساۋ وبەكتىلەردى ۇستاپ-كۇتۋگە كەتەتىن شىعىنداردى ازايتۋعا ىقپال ەتەتىنىن اتاپ ءوتتى. ونىڭ ايتۋىنشا, جاڭا كوپىرلەردى 5 جىلدا ءبىر, ەسكىلەرىن 3 جىلدا ءبىر رەت تەكسەرۋ قاجەت. جىل سايىن «قازجولعزي» اق كەم دەگەندە 15 نىساندى زەرتتەيدى. جالپى 59 جىلدىڭ ىشىندە ينستيتۋت مىڭنان استامىنا دياگنوستيكا جاساعان.
