اتالعان كىتاپ مادەنيەت جانە سپورت مينيسترلىگى «مادەنيەت جانە ونەر سالاسىنداعى باسەكەلەستىكتى جوعارىلاتۋ, قازاقستاندىق مادەني مۇرانى ساقتاۋ, زەردەلەۋ مەن ناسيحاتتاۋ جانە ارحيۆ ءىسىنىڭ ىسكە اسىرىلۋ تيىمدىلىگىن ارتتىرۋ» باعدارلاماسى «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ, باسىپ شىعارۋ جانە تاراتۋ» كىشى باعدارلاماسى بويىنشا جارىق كوردى.
بۇل 2005 جىلى شىققان, وقىرمان قاۋىمنىڭ ەرەكشە ىقىلاسىنا بولەنگەن, ءرامىزتانۋ سالاسىنداعى اسا قۇندى ەڭبەكتىڭ ەكىنشى باسىلىمى. العاشقى باسىلىم شىققاننان بەرى وتكەن جىلدار ىشىندەگى ەلىمىزدە, ءارى الەم مەملەكەتتەرىندە ورىن العان وزگەرىستەر ەسكەرىلىپ, كىتاپتا بەرىلگەن كەيبىر اقپارات سايكەسىنشە جاڭارتىلىپ, تولىقتىرىلدى.
ەل - ۇلتتىق دۇنيەتانىمىمىزداعى ۇلى ۇعىمداردىڭ ءبىرى. ارعىقازاق سوزىنەن باستاپ بۇگىنگە شەيىن ەش وزگەرىسسىز قاۋىم, قاعانات, ەل-جۇرت, وتان, مەملەكەت ماعىناسىندا قولدانىلىپ كەلەدى. ەلدىك مىنەز, ەلدىك ءداستۇر, ەلدىك مۇرات, ەلدىك نامىس, ەلجاندىلىق, وتانشىلدىق ءتارىزدى رۋحاني قۇندىلىقتاردىڭ وزەگى دە وسى ءسوز, وسى ۇعىم.
كىتاپ قازاقستان رەسپۋبليكاسى مەملەكەتتىك رامىزدەرى تۋرالى جان-جاقتى عىلىمي-كوركەم پايىمداۋ ارقىلى زامانداستارىمىزدىڭ بويىندا مەملەكەتتىك مۇراتتارعا ادالدىق, ەلدىك اڭسارلارعا سۇيىسپەنشىلىك جانە وتانشىلدىق سەزىمدەرىن وياتۋعا باعىتتالعان. ءتىلى - شۇرايلى, ءدىلى - تازا, ءدىڭى - مىقتى. ەلدىگىمىزگە قاتىستى كەڭ ماعلۇمات بەرەتىن تەرەڭ ينتەللەكتۋالدىق ەڭبەك دەپ باعالاۋعا لايىق تۋىندى. جۇرەك قاينارىندا سۋعارىلعان سەزىم ءسوزى رەتىندە اجارلى ءھام اسەرلى.
تاۋەلسىز قازاقستاننىڭ نىعايىپ, دامۋى ءۇشىن تىنىم تاپپاي ەڭبەك ەتكەن, مەملەكەتتىك رامىزدەرىمىزدىڭ دۇنيەگە كەلىپ, قابىلدانۋىنىڭ باسى-قاسىندا بولعان بەلگىلى اقىن, جازۋشى-پۋبليتسيست, قوعام قايراتكەرى, تاۋەلسىز قازاقستان تاريحىنداعى تۇڭعىش ءرامىزتانۋشى ەربول شايمەردەنوۆتىڭ بۇل باعالى ەڭبەگى ستۋدەنتتەر مەن وقۋشىلارعا, پەداگوگتەرگە, ساياساتتانۋشىلارعا, رامىزتانۋشىلارعا, جۇرەگى ەلىم دەپ سوققان بارشا وقىرمان قاۋىمعا ارنالعان.
