بەلگىلى رەجيسسەر سەرىك اپرىموۆتىڭ جۇمىسى XVI حالىقارالىق «ەۋرازيا» كينوفەستيۆالىنىڭ ۇلتتىق بايقاۋىنا قاتىسىپ جاتىر.
ايتا كەتەيىك, قازاقستاندىق جاس رەجيسسەرلەر تۇڭعىش رەت «ەۋرازيا» كينوفەستيۆالىنىڭ ماراپاتتارىنا ۇلتتىق بايقاۋ اياسىندا يە بولۋعا مۇمكىندىك الدى. جالپى, كينوفەستيۆالدىڭ ءتۇرلى باعدارلامالارىنا 50-گە جۋىق وتاندىق جانە شەتەلدىك فيلمدەر قاتىستى.
ۇلتتىق بايقاۋعا «اقىن» (رەج. دارەجان ومىرباەۆ), «سحەما» (رەج. فارحات ءشارىپوۆ), «دوس-مۇقاسان» (رەج. ايدىن ساحامان) جانە باسقا فيلمدەر ۇسىنىلعان. حالىقارالىق بايقاۋدا ء«مارمار تاستاي سۋىق»(ازىربايجان-فرانتسيا; رەج. اسيف رۋستاموۆ), «ەشقايدا اپارمايتىن جول»(وزبەكستان; رەج. كامارا كامالوۆا) جانە «قۇدايدىڭ شاقىرۋى» (ەستونيا – لاتۆيا – قىرعىزستان; رەج. كيم كي دۋك) جانە باسقا فيلم رەجيسسەرلەرى باق سىنايدى.
ەكى بايقاۋدا دا جەڭىمپازدار كەلەسى بەس نوميناتسيا بويىنشا ماراپاتتالادى: ۇزدىك فيلم, ۇزدىك رەجيسسەرلىك جۇمىس, ۇزدىك ەرلەر ءرولى, ۇزدىك ايەلدەر ءرولى جانە قازىلار القاسىنىڭ ارنايى جۇلدەسى.
كينوفەستيۆال اياسىندا ءتۇرلى كەزدەسۋلەر, دوڭگەلەك ۇستەلدەر مەن پرەزەنتاتسيالار ءوتتى. وندا سالا وكىلدەرى قازاقستاندىق كينەماتوگرافتىڭ وزەكتى ماسەلەلەرىن تالقىلادى, كەيىن قاتىسۋشىلار مەن سالا ساراپشىلارى ءۇشىن Work-In-Progress باعدارلاماسى ۇيىمداستىرىلدى.
ايتا كەتەيىك, بۇگىن, 18 جەلتوقساندا فەستيۆال جەڭىمپازدارىنىڭ ەسىمى بەلگىلى بولادى. 15:00-دە قوناقتار مەن قاتىسۋشىلار قىزىل كىلەم ارقىلى ءجۇرىپ وتسە, 16:00-دە ماراپاتتاۋ ءراسىمى باستالادى.
«ەۋرازيا فەستيۆالىنە مىقتى فيلمدەر ۇسىنىلعان. بۇگىن قازىلار القاسى ۇزدىكتەردى انىقتايتىن بولادى. قاتىسۋشىلارعا ساتتىلىك تىلەيمىن», دەدى داۋرەن اباەۆ.
