«ASTANA يۋتاريا ltd» وندىرىستىك يننوۆاتسيالىق كومپانيانىڭ الاڭىندا ۇيىمداستىرىلعان ءىس-شاراعا مەملەكەتتىك ورگانداردىڭ, QazTextileIndustry جەڭىل ونەركاسىپ كاسىپورىندارى ۇلتتىق بىرلەستىگىنىڭ, سونداي-اق وندىرىستىك كومپانيالاردىڭ وكىلدەرى جانە مەكتەپ وقۋشىلارىنىڭ اتا-انالارى جينالدى.
يدم يندۋستريالىق دامۋ كوميتەتىنىڭ توراعاسى ءىلياس وسپانوۆتىڭ ايتۋىنشا, قازىر ەلىمىزدەگى مەكتەپ وقۋشىلارىن وتاندىق ونىممەن قامتاماسىز ەتۋ – باستى ماقساتتاردىڭ ءبىرى سانالادى.
«قازىر ەلىمىزدە كيىم ءوندىرىسى سالاسىندا 800-دەن استام كاسىپورىن جۇمىس ىستەپ كەلەدى. كوبىنەسە وتاندىق كيىم نارىعى نەگىزىنەن قاداعالاناتىن ساتىپ الۋلار مەن مەملەكەتتىك تاپسىرىس قاجەتتىلىكتەرىنە باعىتتالعان. 2021 جىلدىڭ قورىتىندىسى بويىنشا كيىم ءوندىرىسىنىڭ كولەمى 54,4 ملرد تەڭگەگە جەتىپ, ناقتى كولەم يندەكسى 102,3% دەڭگەيىندە بايقالدى. بۇل رەتتە 38 تىگىن كاسىپورنىندا مەكتەپ فورماسىن وندىرۋگە ارنالعان يندۋستريالىق سەرتيفيكات بار ەكەنىن ايتا كەتەيىك», دەدى ءى.وسپانوۆ.
سونىمەن قاتار كوميتەت توراعاسى قازىر «الەۋمەتتىك ءاميان» پلاتفورماسى ارقىلى اتا-انالارعا بەلگىلى ءبىر دۇكەندەردە مەكتەپ فورماسىن ساتىپ الۋ ءۇشىن ۆاۋچەر بەرۋ ماسەلەسى پىسىقتالىپ جاتقانىن جەتكىزدى. بۇدان بولەك وتاندىق تاۋار وندىرۋشىلەرگە مەكتەپ فورماسىن ساتۋ ءۇشىن جەڭىل شارتتارمەن ساۋدا نۇكتەلەرىن ۇسىنۋ قاراستىرىلىپ جاتىر. وسىعان بايلانىستى ۆەدومستۆو وكىلدەرى وتاندىق تاۋار وندىرۋشىلەردىڭ ءتىزىمىن قالىپتاستىرۋ قاجەت ەكەنىن ايتتى. ونىڭ باستى تالاپتاردىڭ ءبىرى – وندىرۋشىلەردىڭ كيىم ءوندىرۋ پروتسەسى ۇلتتىق ستاندارتتارعا سايكەس بولۋى ءتيىس.
الداعى ۋاقىتتا مۇنداي كەزدەسۋلەر جالعاسىن تاۋىپ, وسى ارقىلى بارلىق تاراپتىڭ سۇرانىسىنا ساي كەلەتىن مەكتەپ فورماسىنىڭ ۇلگىسىن ناقتىلاۋ كوزدەلگەن.
