«16 جەلتوقسان كۇنى ساعات 01:51-دە تەمىرتاۋ قالاسى اقتاۋ كەنتىندەگى 5 قاباتتى تۇرعىن ۇيدە ءورت شىققانى تۋرالى حابار ءتۇستى. العاشقى ءورت ءسوندىرۋ ءبولىمى وقيعا ورنىنا 02:25-تە جەتتى. 1-قاباتتاعى 3 بولمەلى پاتەردە 40 شارشى مەتر اۋماقتا ءورت شىققان. توتەنشە جاعدايلار دەپارتامەنتىنىڭ بولىمشەلەرى كەلگەنگە دەيىن تۇرعىندار 5 ادامنىڭ ءمايىتىن (2007, 2010 ج.ت. ۇلدار, 1983, 1991 ج.ت. ايەلدەر, 1991 ج.ت. ەرلەر) كىرەبەرىستەن كوشەگە الىپ شىقتى. زارداپ شەككەن ادامدار جوعارعى قاباتتارداعى پاتەرلەردەن ءتۇتىن باسقان كىرەبەرىس ارقىلى ءوز بەتىمەن ەۆاكۋاتسيالانباق بولعان», دەلىنگەن حابارلامادا.
باسپالداق الاڭىندا اشىق جانۋ بولماعان. الايدا ءتۇتىننىڭ كوپ مولشەردەگى كونتسەنتراتسياسى سالدارىنان تۇرعىندار دالاعا شىعىپ ۇلگەرمەگەن.
ءورت ءسوندىرۋ بولىمشەلەرى كەلگەن كەزدە بارلاۋ جانە جانىپ جاتقان پاتەردەگى ءورتتى ءسوندىرۋ بارىسىندا 6-شى مارقۇمنىڭ (1977 ج.ت. ەر ادام) دەنەسى تابىلدى. ءۇش ادام ءارتۇرلى دەنە جاراقاتتارىن العان.
سونداي-اق ءورت سوندىرۋشىلەر باسپالداق پەن تىنىس الۋ اپپاراتىنىڭ كومەگىمەن ءتۇتىن باسقان پاتەردىڭ كىرەبەرىسىنەن 10 ادامدى, ونىڭ ىشىندە 4 بالانى قۇتقاردى. قابىلدانعان شارالارمەن ءورت 03:10-دا وقشاۋلانىپ, 04:00-دە ءسوندىرىلدى.
ءورتتىڭ شىعۋىنا سەبەپ بولعان جاعدايلاردى زەردەلەۋ ءۇشىن وقيعا ورنىنا توتەنشە جاعدايلار مينيسترلىگى ورتكە قارسى قىزمەت كوميتەتىنىڭ توراعاسى نۇربولات دەربىسوۆ باردى. ءورتتى جويۋعا قاراعاندى وبلىسى توتەنشە جاعدايلار دەپارتامەنتىنىڭ 16 قىزمەتكەرى مەن 4 بىرلىك تەحنيكاسى جۇمىلدىرىلدى.
ءورتتىڭ شىعۋ سەبەبى انىقتالۋدا. وقيعا ورنىندا سىناق ءورت زەرتحاناسىنىڭ ماماندارى مەن تەرگەۋشىلەر جۇمىس ىستەپ جاتىر. ءورت فاكتىسى بويىنشا پوليتسيا قىزمەتكەرلەرى قر قىلمىستىق كودەكسىنىڭ 292-بابى بويىنشا قىلمىستىق ءىس قوزعادى.
