«مارقۇم ۇلتتىق ۇلان ساپىندا 2021 جىلدان بەرى قىزمەت ەتەدى. ول اقتوبە وبلىسىنان كەلگەن. بايلانىس مامانى-ساپەر قىزمەتىن اتقارعان. جىگىت نەكەدە ەمەس. قايعىلى وقيعا تۋرالى تۋىستارىنا حابارلاندى. قازىر ناقتىلاۋ شارالارى جۇرگىزىلۋدە. بۇل جانتۇرشىگەرلىك وقيعا», دەدى اقتاۋ گارنيزونىنىڭ اسكەري پروكۋرورى ەرلان قۇتقوجا.
ەسكە سالايىق, ءماجىلىس دەپۋتاتى ناتاليا دەمەنتەۆا جاقىندا «اسكەري پوليتسيا ورگاندارى تۋرالى» زاڭ جوباسىن تالقىلاۋ بارىسىندا قورعانىس مينيسترلىگىنە جۇگىنگەن بولاتىن. ونىڭ ايتۋىنشا, قابىلدانعان شارالارعا قاراماستان, اسكەري ورتادا ءجيى جاۋىنگەرلىك ەمەس شىعىندارعا اكەلەتىن كۇش قولدانۋ, اسكەري قىزمەتشىلەردىڭ ار-نامىسى مەن قادىر-قاسيەتىن قورلاۋ فاكتىلەرى ءالى دە جويىلماي كەلەدى.
«بۇل فاكت قوعامدا ۇلكەن الاڭداۋشىلىق تۋعىزادى جانە وسى سەبەپتى كوپتەگەن اتا-انالار ۇلدارىنىڭ ءومىرى مەن دەنساۋلىعى ءۇشىن قاۋىپتەنىپ, ولاردى اسكەرگە جىبەرۋگە قورقاتىنىن مويىنداۋ كەرەك», دەدى ن.دەمەنتەۆا.
