سۋرەتتى تۇسىرگەن يۋري بەككەر
بالا كوڭىلدىڭ ۇدەسىنەن شىعاتىن شىعارما جازۋ كەز كەلگەن قالامگەردىڭ وڭتايىنا كەلە بەرمەيدى. دەسە دە بايگەدە باق سىناۋعا ەلىمىزدىڭ ءار ايماعىنان 200-گە تارتا ۇمىتكەر ءوتىنىم بىلدىرگەن. قازاقستان جازۋشىلار وداعى ۇيىمداستىرعان جوباعا «سامۇرىق-قازىنا» اق كومپانيالار توبى دەمەۋشىلىك تانىتتى. جالپى, جۇلدە قورى 12 300 000 تەڭگەنى قۇراعان بايقاۋعا پوەزيا, پروزا جانە دراماتۋرگيا باعىتتارى بويىنشا 6 قاتىسۋشىدان جەڭىمپاز دەپ تانىلىپ, ءار اتالىم بويىنشا ءى ورىن (بىرەۋ) – 1 000 000 تەڭگە, ءىى ورىن (ەكەۋ) – 800 000 تەڭگە, ءىىى ورىن (ۇشەۋ) – 500 000 تەڭگە تابىستالدى. 14 پەن 35 جاس ارالىعىنداعى قالامگەرلەر قاتىسقان بايقاۋ ەرەجەسىنە ساي, ءار قاتىسۋشىدان تەك ءبىر عانا اتالىم بويىنشا شىعارمالار قابىلدانىپ, جالپى العاندا 18 جەڭىمپاز ماراپاتتالدى.
اتاپ ايتقاندا, پروزا جانرى بويىنشا ءى ورىن ارمان ادىلبەككە, ءىى ورىن مەيىرجان جىلقىباي مەن نۇراسىل زياديبەككە جانە ءىىى ورىن ايساۋلە مەرەكە, دانا ءابدىماناپ, قارلىعاش سارباەۆاعا تابىستالدى.
پوەزيا جانرى بويىنشا ءى ورىندى مەرەي قارت, ءىى ورىندى ايدانا بەيسەن, اسىلان تىلەگەن جانە ءىىى ورىندى مۇقاعالي كەنجەتاي, ايدانا سەگىزباي, ءنۇربيبى ايازباي يەلەندى.
دراماتۋرگيا جانرىندا نازەركە قۇمارعاليەۆا كوش باسىنان كورىنسە, ءىى ورىن الىبەك بايبول مەن جانسەرىك قۇتتىباەۆتىڭ, ال ءىىى ورىن جانىبەك قويتاي, الىشەر راحات, ىقىلاس شالعىمبايدىڭ ەنشىسىنە بۇيىردى.
– اتالعان بايقاۋ بالالار جىلىنىڭ ەڭ وزىق ءىس-شارالارىنىڭ ءبىرى بولىپ وتىر. سوڭعى جىلدارى قازاق ادەبيەتىندە بالالار ادەبيەتى جانرىنىڭ كەنجە قالىپ بارا جاتقانى, ال ەرەكشە بالالار ءۇشىن ادەبيەتتىڭ ءتىپتى دە قولجەتىمسىزدىگى ءجيى ايتىلىپ ءجۇر. مۇنىمەن قوسا «مەنىڭ اتىم قوجا» سىندى تۇتاس بۋىندى تاربيەلەيتىن شىعارمالاردىڭ جوقتىعىنا زيالى قاۋىم وكىلدەرى قىنجىلىس ءبىلدىرىپ جاتادى. بۇل رەتتە قازاق رۋحانياتىنىڭ قارا شاڭىراعى قازاقستان جازۋشىلار وداعى ءتول ادەبيەتىمىزدى دامىتۋ باعىتىندا اۋقىمدى جوبالار ۇيىمداستىرىپ كەلەدى. «ايتۇمار» بالالار ادەبيەتى تۋىندىلارىنىڭ رەسپۋبليكالىق بايقاۋى وسىعان دالەل, – دەيدى قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت.
ماراپاتتاۋ راسىمىندە «Samruk-Kazyna Trust» قورى باس ديرەكتورىنىڭ ورىنباسارى سەرعوجا قالياسقاروۆ, «ايتۇمار» بالالار ادەبيەتى سايىسى جاس قالامگەرلەرگە شابىت, بالدىرعان وقىرمانعا رۋحاني ازىق سىيلاعانىن, يگىلىكتى ءىستى قولداۋ مەملەكەتتىك ءتىلدى دامىتۋعا, ۇلت رۋحانياتىنا قوسقان كومپانيانىڭ از-كەم ۇلەسى ەكەنىن اتاپ ءوتتى. ءوز كەزەگىندە بايگەگە قازىلىق ەتكەن ادەبي قاۋىم كەلىپ تۇسكەن شىعارمالاردىڭ مازمۇنى مەن ساپاسى جوعارى بولعانىن اتادى.
«مەن بايگەگە «تاريحتا قالعان تۇلپارلار» دەپ اتالعان تسيكلدى شىعارمامدى ۇسىندىم. بۇلار نەگىزىنەن كەزىندەگى ەرتارعىننىڭ تارلانى, قابانبايدىڭ قۋباس اتى, كەنەسارىنىڭ – اقتابانى سياقتى ەل اراسىندا اڭىزداي ايتىلاتىن ارعىماقتارعا ارناپ جازىلعان ولەڭدەر. قازىر قازاقي قالىپتاعى ۇلتتىق كونتەنتتەردىڭ ازدىعىنا بايلانىستى, بالالار وتكەن تاريحىمىزدى ءبىلىپ ءجۇرسىن ءارى باتىرلارىمىزعا رۋح بەرىپ, سەنىمدى سەرىك بولعان سايگۇلىكتەردى بىلسە, ولاردىڭ تاريحي تانىم كوكجيەگى كەڭەيە تۇسەر دەگەندى ماڭىزعا الدىم. ولارعا ارنالعان ۇلكەن پوەمالار, اڭىز-ءاپسانالار بولعانىمەن جەكە پوەتيكالىق شاعىن شىعارمالار جوقتىڭ قاسى. ماسەلەن, قۋباس اتتى قابانبايعا بورانباي ءبيدىڭ تاڭداپ بەرگەنى, ولاردىڭ وسكەن جايلاۋى, باتىرعا ساي بولۋ ءۇشىن ونى قالاي باپتاعانى تۋراسىندا مول مالىمەتتەردى قامتۋعا تىرىستىم», دەيدى «پوەزيا» اتالىمىنىڭ جەڭىمپازى مەرەي قارت.
جوبا بارىسىندا ۇيىمداستىرۋشىلار بايقاۋعا كەلىپ تۇسكەن شىعارمالاردى بالالارعا, ونىڭ ىشىندە ولاردىڭ مۇمكىندىگى شەكتەۋلى قاتارلاستارىنا كوبىرەك ناسيحاتتاۋعا باسىمدىق بەرىپ, شىعارمالار وڭاي وقىلۋ ءۇشىن اۋديو, ەلەكتروندى نۇسقالارى ازىرلەنەتىنىن جەتكىزدى. سونىمەن قاتار جەڭىمپاز اتانعان شىعارمالار جيناقتالىپ, كىتاپ بولىپ جارىق كورەدى. كىتاپ ەلىمىزدەگى 200-گە تارتا كىتاپحاناعا, ينكليۋزيۆتى ورتالىقتار مەن بالالار ۇيىنە تاراتىلماق. جەتكىنشەكتەردى كىتاپ وقۋعا باۋلۋ, ولارعا ارناپ ومىرشەڭ شىعارمالار جازۋ جاۋاپتى ءىس. بالالار ادەبيەتىن قولداۋ جىلى اياسىندا عانا ەمەس, بالدىرعاندار الەمىن باۋرايتىن تۋىندىلار قورجىنى جىل سايىن تارتىمدى دۇنيەلەرمەن تولىعا بەرسە يگى.
الماتى
