سايلاۋ تۇعىرناماسى اياسىندا ەنەرگەتيكا مينيسترلىگى سەگىز تاپسىرمانى جۇزەگە اسىرۋدا. ۇكىمەتتىڭ كەڭەيتىلگەن وتىرىسىنىڭ قورىتىندىسى بويىنشا مەملەكەت باسشىسى جاريالاعان ءۇش تاپسىرما ورىنداۋعا قابىلداندى.
ءمينيستردىڭ ايتۋىنشا, ءادىل ەكونوميكا سەكتسياسىندا ءىرى مۇناي-گاز جوبالارىنىڭ سەرىكتەستەرىمەن رەسپۋبليكاعا ەكونوميكالىق تيىمدىلىكتى ارتتىرۋ ماقساتىندا ولاردى دامىتۋدىڭ كەشەندى جوسپارىن قابىلداۋ جۇمىستارى جۇرگىزىلەدى.
2029 جىلعا قاراي شىمكەنت مۇناي وڭدەۋ زاۋىتىن 9 ميلليون تونناعا دەيىن كەڭەيتۋ جوباسىن اياقتاۋ جوسپارلانۋدا. بۇل وڭدەۋ كولەمىن جىلىنا 21 ميلليون تونناعا دەيىن ارتتىرۋعا مۇمكىندىك بەرەدى.
«ەكسپورتتىق باعىتتاردى ءارتاراپتاندىرۋ جونىندەگى تاپسىرما اياسىندا مۇناي ەكسپورتىنىڭ بالامالى باعىتتارىن دامىتۋ بويىنشا جول كارتاسىنىڭ جوباسى ازىرلەندى. وسىلايشا, ازەربايجان, گرۋزيا جانە تۇركيا پورتتارى باعىتىندا ترانسكاسپي حالىقارالىق كولىك باعىتىن دامىتۋعا, سونداي-اق قىتاي مەن يرانعا ەكسپورتتىق باعىتتارعا باسا نازار اۋدارىلادى», دەدى ب.اقشولاقوۆ.
سونىمەن قاتار 2023 جىلى «جايىقمۇناي» گاز وڭدەۋ زاۋىتىندا قاراشىعاناق گازىن وڭدەۋ تۋرالى شەشىم قابىلدانادى, بۇل گاز وڭدەۋدى 4 ميلليارد تەكشە مەترگە ارتتىرادى.
مەملەكەت باسشىسى كوتەرگەن ماڭىزدى ماسەلەلەردىڭ ءبىرى – حالىقتى گازبەن قامتاماسىز ەتۋ. مينيسترلىك 2029 جىلعا قاراي حالىقتى گازداندىرۋ دەڭگەيىن 65 پايىزعا دەيىن ارتتىرۋدى جوسپارلاپ وتىر, بۇل 12 ميلليون ادامدى تابيعي گازبەن قامتاماسىز ەتەدى.
