ءاۋ باستا كوماندالار جەرەبەگە ساي ەكى توپقا ءبولىندى. «ا» توبىندا «7 ارنا», «ايقىن» گازەتى, «Qazcontent» اگەنتتىگى مەن «كوممەنتاتور» كوماندالارى وينادى. ال «ۆ» توبىندا «Egemen Qazaqstan» كومانداسىنان بولەك, ءار ماۋسىمدا باق ليگانىڭ چەمپيونى اتانىپ جۇرگەن «Atameken business» تەلەارناسى, «حابار» اگەنتتىگى مەن «قازمەديا» ورتالىعى ونەر كورسەتتى. جەرەبەدەن كەيىن «اجال توبى» اتانعان توپتاعى مىقتى ۇجىمدارعا ەگەمەندىكتەر ايتارلىقتاي قارسىلىق كورسەتتى. وكىنىشكە قاراي, اسكەر پيريەۆ باستاعان ەگەمەندىكتەر ءوز مۇمكىندىكتەرىن ءتيىمدى پايدالانا الماي, قارسىلاستارىنىڭ ەسەپتە العا شىعۋىنا جول بەردى. مىسالى, «Atameken business» ۇجىمىنا قارسى شىققان اسكەر پيريەۆ, ورالحان احماديا, بانۋ ءادىلجان, ريزا اباي سىندى ارىپتەستەرىمىز وتە كۇردەلى پارتيالاردا اسقان شەبەرلىكپەن وينادى. ال «حابارعا» قارسى ويىندا امانگەلدى قياس, الماس ماناپ, فارحات قايرات ۇلى, ساۋلە مەڭدىقۇلوۆا, جۇپار دارمەنبەكوۆا باستاعان ەكىنشى قۇرامامىزدىڭ العاشقى ۇپاي ەنشىلەۋىنە مۇمكىندىگى بولىپ ەدى. اتتەڭ, بۇل جولى ەگەمەندىكتەرگە جەرەبە جولداس بولمادى.
وسىلايشا, قوس توپتان جارتىلاي فينالعا «قازمەديا», «7 ارنا», «Qazcontent» جانە «Atameken business» كوماندالارى سۋىرىلىپ شىقتى. ال باس جۇلدەگە «قازمەديا» مەن «Qazcontent» تالاستى. وتە تارتىستى وتكەن ويىن ەكى سەتپەن اياقتالسا دا, كوماندالار ايانىپ قالعان جوق. سوڭىنا دەيىن قاي-قايسىسىنىڭ جەڭىمپاز بولارى بەلگىسىز بولدى. دەگەنمەن باس كۋبوك «قازمەديا» ۇجىمىنا بۇيىردى. ەكىنشى ورىندى «Qazcontent» ويىنشىلارى ەنشىلەسە, ءۇشىنشى ورىندى «Atameken business» كومانداسى يەلەندى. ال جۇبانىش جۇلدەسىن «7 ارنا» مىسە تۇتتى.
باق وكىلدەرىنىڭ باسىن قوسقان تۋرنيردە ەشبىر كوماندا قۇرالاقان قالعان جوق. چەمپيوندار – 300 مىڭ تەڭگەگە, 2-ورىن يەگەرى – 200 مىڭ تەڭگەگە, ال ۇزدىك ۇشتىكتى تۇيىندەگەن ۇجىم 100 مىڭ تەڭگەگە يە بولدى. ءتىپتى 4-ورىن العان كومانداعا دا جۇبانىش رەتىندە 70 مىڭ تەڭگەنىڭ سەرتيفيكاتى بەرىلدى. سونداي-اق التى اتالىم بويىنشا ەرلەر اراسىنداعى ۇزدىك ويىنشى – ەسەنبول يمانعازى («حابار»), قىزدار اراسىنداعى ۇزدىك ويىنشى – اسەم ابدرايموۆا («قازمەديا»), «قۇرمەت» اتالىمى «Egemen Qazaqstan» گازەتى باس ديرەكتورىنىڭ ورىنباسارى اسكەر پيريەۆكە بۇيىردى. ال ۇزدىك شابۋىلداۋشى اياۋلىم قاناعاتقا («كوممەنتاتور») بۇيىرسا, ۇزدىك توسقاۋىلشى دەپ ەلدار امانباەۆ («Qazcontent») تانىلدى. ۇزدىك پاس شىعارۋشى انار قونىس («ايقىن») بولسا, زەينوللا سانىك اتىنداعى ارنايى جۇلدەنى فاريزا سارجانوۆا («قازمەديا») يەلەندى.
