وقيعا ورنىنان تۇسىرىلگەن ۆيدەونى وقيعا كۋاگەرلەرى Instagram جەلىسىندە جاريالادى. كادرلاردان ءبىر بالانىڭ «جاياۋ جۇرگىنشىلەر وتكەلى» بەلگىسىنەن بىرنەشە مەتر جەردە قاردىڭ ۇستىندە جاتقانىن كورۋگە بولادى.
پاۆلودار وبلىسىنىڭ پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, 13 جەلتوقساندا پاۆلودار قالاسىنىڭ سولتۇستىك يندۋستريالىق ايماعىندا جول-كولىك وقيعاسى بولدى.
«زيل اۆتوكولىگىنىڭ 44 جاستاعى جۇرگىزۋشىسى رەتتەلمەيتىن جاياۋ جۇرگىنشىلەر وتكەلىندە جولدى كەسىپ ءوتىپ بارا جاتقان كامەلەتكە تولماعان ەكى بالانى قاعىپ كەتتى. قازىرگى تاڭدا اتالعان فاكتى بويىنشا تەرگەۋ امالدارى ءجۇرىپ جاتىر», دەپ حابارلادى وبلىستىق پد ءباسپاسوز قىزمەتىنەن.
ەكى بالا دا جاراقاتپەن اۋرۋحاناعا جەتكىزىلدى.
پاۆلودار وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتىنەن تۇسكەن مالىمەتكە قاراعاندا, 2012 جىلى تۋعان ۇل بالانىڭ وڭ جاق اياعىنىڭ سۇيەگى سىنعان. ول تراۆماتولوگيا بولىمشەسىنە جاتقىزىلدى, جاعدايى ورتاشا.
«2010 جىلى تۋىلعان ەكىنشى جاراقات العان وقۋشى جامباس سۇيەكتەرىنىڭ كوپتەگەن سىنىقتارى, ىشكى اعزالارىنىڭ زاقىمدانۋى, ىشكى قان كەتۋ جانە شاپ ايماعىنداعى كولەمدى جارالارمەن ءتۇستى. العان جاتارقاتتارىنا بايلانىستى بالا اۋرۋحاناعا جەتكىزىلگەننەن كەيىن 18 مينۋتتان سوڭ قايتىس بولدى», دەپ حابارلادى ۆەدومستۆودان.
