بەلگىلى سۋرەتشى-رەستاۆراتور قىرىم التىنبەكوۆتىڭ 70 جىلدىعىنا ارنالعان شارا اياسىندا عالىمدار ەلىمىزدىڭ ارحەولوگيا رەستاۆراتسيا سالاسىنداعى وزىق جەتىستىكتەردى سارالاپ, قازاقستان سۋرەتشىلەر اكادەمياسىنىڭ پرەزيدەنتى اماندوس اقاناەۆ, مارعۇلان اتىنداعى ارحەولوگيا ينستيتۋتىنىڭ ديرەكتورى اقان وڭعار جانە ورتالىق مەملەكەتتىك مۋزەيدىڭ, «تاڭبالى» قورىق-مۋزەيىنىڭ, «ەسىك» مۋزەيىنىڭ, «بەرەل» مۋزەيى عالىمدارى مازمۇندى باياندامالار جاسادى.
كونفەرەنتسيا قاتىسۋشىلارى قىرىم التىنبەكوۆ جاڭارتقان تاريحي-مادەني جادىگەرلەر كورمەسىن تاماشالادى. ەلىمىزدىڭ ەجەلگى جانە ورتاعاسىرلىق تاريحىنان سىر شەرتەر ارحەولوگيالىق قۇندى جادىگەرلەردى «قىرىم ارالى» عىلىمي زەرتحاناسى ماماندارى اسقان شەبەرلىكپەن زاماناۋي سيپاتتا كوپشىلىك نازارىنا ۇسىنىپ كەلەدى.
كوركەم-تاريحي جادىگەرلەردىڭ اراسىنان «تاقساي حانشايىمى» مەن ء«ۇرجار ساۋەگەيى» ەرەكشە كوزگە تۇسەدى. 2012-2013 جىلدارى ورال قالاسىنان ون بەس شاقىرىم جەردە تاقسايدان تابىلعان قورىمنان حانشايىممەن بىرگە كوپتەگەن جادىگەر ارشىلىپ الىنىپ, وتاندىق ارحەولوگياداعى تىڭ جاڭالىق ءارى ماڭىزدى ەكسپوزيتسيا رەتىندە ءمالىم بولعانى بەلگىلى. ءبىزدىڭ زامانىمىزعا دەيىن IV-III عاسىرلاردا ءومىر سۇرگەن «ۇرجارلىق ساۋەگەي ايەل» 2013 جىلى شىعىس قازاقستان وبلىسى ءۇرجار اۋدانى اۋماعىندا ارحەولوگ تيمۋر سماعۇلوۆتىڭ جەتەكشىلىگىمەن جۇرگىزىلگەن قازبا جۇمىستارى كەزىندە تابىلىپ, «قىرىم ارالى» ماماندارى ساۋەگەي ايەلدىڭ سىرت كيىمى مەن باس كيىمىن تولىقتاي قالپىنا كەلتىرگەن بولاتىن. اشەكەيلەر ىشىندە ساۋكەلەگە ۇقساس باس كيىم دە ەرەكشە نازار اۋدارتادى. عالىمدار التىن ء«مۇيىز» ويۋ-ورنەكپەن بەزەندىرىلىپ, باعالى تاستارمەن كومكەرىلگەن قۇندى جادىگەر حانشايىمنىڭ باس كيىمى بولعان دەگەن تۇجىرىم ايتادى.
الماتى
