50 پاتەر قاتتى ب ۇلىنگەن
زارداپ شەككەن پاتەرلەردى جوندەۋ, رەتتەۋ جۇمىستارى ءۇشىن «ورتالىق-ازيا ەلەكترەنەرگەتيكالىق كورپوراتسياسى» (واەك) اق بۇگىننەن باستاپ ارنايى بريگادالاردى جۇمىلدىرماق.
توتەنشە جاعداي كەزىندە جارىلعان ۇيىشىلىك قۇبىرلار مەن رەگيسترلەردەن ىستىق سۋ اتقىلاپ, جۇزدەن اسا پاتەر قاتتى ب ۇلىنگەن ەدى. «واەك» اق باسقارما توراعاسىنىڭ ورىنباسارى لەونيد يانۋشكونىڭ ايتۋىنشا, 12 جەلتوقساننان باستاپ كاسىپورىننان جالپى سانى 70 ادام ب ۇلىنگەن پاتەرلەردى جوندەۋگە شىعادى.
– ايازدا قاتىپ, كەيىن جىلۋ قوسا باستاعاندا جارىلعان باتارەيالار مەن پاتەرارالىق قۇبىرلاردان اققان ىستىق سۋ پاتەرلەردىڭ تۇسقاعازدارىن, ەدەنى مەن توبەسىن, تۇرمىستىق تەحنيكالارىن, جيھازدارىن بۇلدىرگەن. ءبىز ەڭ اۋەلى جوندەۋدى قاجەت ەتىپ تۇرعان 50 پاتەرگە جوندەۋ جۇرگىزىپ بەرمەكپىز. اپات كەزىندە سۋىقتان ابدەن تيتىقتاپ قالعان ادامداردىڭ جايلى ومىرگە ورالۋىن نازارىمىزدا ۇستاپ وتىرمىز. دۇيسەنبىدەن باستاپ ءبىزدىڭ بريگادالارىمىز پاتەرلەرگە كىرە باستايدى. ال توتەنشە جاعداي ۋاقىتىندا زاقىمدانعان وزگە ۇيلەردىڭ شىعىندارى قازىر ەسەپتەلىپ جاتىر. ەگەر دە كوميسسيا تۇرمىستىق تەحنيكا اپات سالدارىنان ىستەن شىققانىن راستاسا, شىعىننىڭ وتەلەتىنىنە ءۇمىت ارتۋعا بولادى. بارلىعى ەسەپكە الىنىپ, قورىتىندىلانعان سوڭ پاتەر يەلەرىمەن شىعىننىڭ ورنىن تولتىرۋ بويىنشا ەسەپ ايىرىسامىز, – دەپ اتاپ ءوتتى ل.يانۋشكو.
توتەنشە جاعداي كەزىندە زارداپ شەككەن پاتەرلەردىڭ يەلەرى بارلىق شىعىنىن «واەك» اق ەسەبىنەن ءوندىرىپ الا الادى. ول ءۇشىن ارنايى ۇيىمداستىرىلعان پۋنكتتەردە ءوتىنىش قالدىرۋى كەرەك. اقاۋلاردى انىقتايتىن بريگادالار قازىر جۇمىس ىستەپ, بارلىعىن قاعازعا تۇسىرۋدە.
جىلۋ ءۇشىن تولەمەيدى
پاۆلودار وبلىسىنىڭ اكىمى اسايىن بايحانوۆ زارداپ شەككەن ۇيلەردىڭ تۇرعىندارى قاراشا مەن جەلتوقسان ايلارىندا جىلۋ ەنەرگياسى تولەمدەرىنەن بوساتىلعانىن حابارلادى. جۇرتشىلىق سۋىق پاتەرلەرىن جىلىتۋ ءۇشىن ەلەكتر جىلىتقىشتاردى كۇنى-ءتۇنى قوسۋعا ءماجبۇر بولعان ەدى.
«ەندىگى كەزەكتە ەلەكتر ەنەرگياسىنىڭ ءماجبۇرلى تۇردە وسكەن شىعىندارىن وتەۋ ماسەلەسى تۋىنداپ وتىر. مەملەكەت باسشىسىنىڭ تاپسىرماسى بويىنشا بۇل ماسەلە ءبىرىنشى ۆيتسە-پرەمەر رومان سكلياردىڭ قاتىسۋىمەن جانە «ەكىباستۇزتەپلوەنەرگو» جشس يەلەرىمەن بىرگە شەشىلدى. تج كەزەڭىندە, ياعني 27 قاراشادان 8 جەلتوقسانعا دەيىن 48 957 ابونەنت ءۇشىن پايدالانعان ەلەكتر ەنەرگياسىنا وتەماقىنى اتاۋلى ەسەپتەۋ تۋرالى كەلىسىمگە قول جەتكىزدىك. ەندى ءبىز ەسەپتەۋلەردى جانە تولەمنىڭ بىرىڭعاي مولشەرىن انىقتايمىز ءارى ونى تۇتىنۋشىلاردىڭ جەكە شوتتارىنا اۋدارۋ جولدارىن قاراستىرامىز. بارلىق شىعىندى «ەكىباستۇز جىلۋ-ەنەرگو» جشس يەلەرى ءوز موينىنا الادى», دەدى ا.بايحانوۆ.
ىستىق جانە سۋىق سۋمەن قامتۋ بويىنشا شارالار شاھاردا ءالى دە جالعاسۋدا. سەنبى كۇنى ءماشھۇر ءجۇسىپ كوشەسى, 52-ءۇي (20 كىرەبەرىستەن تۇرادى) سۋ جۇيەسى تولىقتاي قالپىنا كەلتىرىلدى. ال ساتباەۆ كوشەسى, 8-ۇيدە كەشە كارىز جۇيەسىن, سۋىق جانە ىستىق سۋ قۇبىرلارىن جاڭارتۋ جۇمىستارى تۇيىندەلدى. التى كورپۋستان, 20 كىرەبەرىستەن تۇراتىن كوپقاباتتى ءزاۋلىم باسپانادا جالپى ۇزىندىعى 1 شاقىرىم بولاتىن سۋىق سۋ جۇيەسى تولىقتاي اۋىستىرىلعان.
تەڭگەرىمسىزدىك ساقتالىپ تۇر
ال جەكە ۇيلەردى جىلۋمەن قامتۋ بويىنشا جوندەۋ بريگادالارىنىڭ جۇمىسى دا ءوز مارەسىنە تاياپ كەلە جاتىر. بۇرناعى كۇنى توتەنشە جاعداي كەزىندە جىلۋ جۇيەسى قاتىپ قالعان 90 ءۇيدىڭ كوبى رەتكە كەلتىرىلگەنى, تەك 20-دان اسا ءۇي قالعانى بەلگىلى بولدى.
بۇل تۋرالى قالا باسشىسى ايان بەيسەكين ارنايى بريفينگتە مالىمدەدى. ول قازىرگى كۇنى جوندەۋ-رەتكە كەلتىرۋ بريگادالارىندا شامامەن 400 ادام جۇرگەنىن, ماماندار اپاتتى جويۋمەن عانا ەمەس, جىلۋ جۇيەسىنىڭ تەڭگەرىمىن قالپىنا كەلتىرۋ شارالارىمەن اينالىسىپ جاتقانىن اتاپ ءوتتى.
– كوپ ۇيلەر ءالى دە بولسىن جىلۋدىڭ جەتكىلىكسىز ەكەنىنە شاعىمدانۋدا. مۇنىڭ بارلىعى جەلىلەردەگى تەڭگەرىمسىزدىك سالدارىنان ورىن العانىن ءتۇسىندىرىپ جاتىرمىز. جۇيەنى رەتتەۋ ءۇشىن پاۆلوداردان ارنايى مامانداردى شاقىرتتىق, 5 توپ وسى ىسپەن اينالىسۋدا. قالانىڭ وڭتۇستىك بولىگىندە جىلۋ تەمپەراتۋراسىنىڭ تومەن ەكەنى, قىسىمنىڭ السىزدىگى انىقتالعان. جەلىلەردىڭ توزۋ كورسەتكىشى جوعارى بولۋى سەبەپتى جۇيەنى اسىقپاي رەتتەۋ قاجەت. جىلۋ-ەنەرگو ورتالىعى كاسىپورىننان شىعاتىن سۋدىڭ ىسىراپ مولشەرىن قازىر 570-580 تونناعا دەيىن تومەندەتتى. بىراق بۇل كورسەتكىش ءالى دە كوپ, ول كەمى 440 تونناعا ءتۇسۋى كەرەك. بۇل ءۇشىن ءبىز جاڭادان ورىن الۋى مۇمكىن زاقىمدانۋلاردى ىزدەپ, تۇرعىنداردان جەلىدەگى سۋدى اعىزباۋدى سۇراپ وتىرمىز. جىلۋ ماگيسترالدارىنان كەلەتىن سۋدىڭ تەمپەراتۋراسى مەن قىسىمى نورماعا ساي, بارلىق پروبلەما ورامىشىلىك جانە ۇيىشىلىك جۇيەلەردەن تۋىنداپ تۇر, – دەيدى اكىم.
ايان ۋاحيت ۇلىنىڭ سوزىنە سۇيەنسەك, توتەنشە جاعداي رەجىمى ۋاقىتىندا قالانىڭ تج قورىنان شامامەن 18 ملن تەڭگەدەي قاراجات بولىنگەن. ول جوندەۋ بريگادالارىنداعى جۇمىسكەرلەردىڭ تاماعى مەن جاتىن ورنىن قارجىلاندىرۋعا جۇمسالىپتى. ال باسقاداي شىعىنداردى «واەك» پەن قالا قۇراۋشى ۇلكەن كاسىپورىندار ءوز موينىنا العان.
اكىم الداعى ءبىر اپتانىڭ ىشىندە جىلۋ جانە سۋمەن قامتۋ جۇيەسىندەگى بارلىق زاقىمدانۋ جويىلىپ, قالا تولىقتاي قالىپتى ومىرگە ورالادى دەدى. ودان سوڭ جىلۋ ورتالىعىنىڭ قىزمەتكەرلەرى قىسقى ۋاقىتتا جەلىلەردە اپاتتى بولدىرماۋ شارالارىنا كىرىسەدى. جىلۋ گەنەراتسياسىن ارتتىرۋعا, ىقتيمال اپات كەزىندە ارنايى قوردىڭ بولۋىنا زور كوڭىل ءبولىنىپ وتىر. بۇل بويىنشا كاسىپورىن باسشىلىعى مەن اكىمدىك اراسىندا تۇراقتى بايلانىس ورناعان. جۋىق ۋاقىتتا جەلىلەرگە تەحنيكالىق اۋديت جۇرگىزىلىپ, قاتتى توزعان اۋماقتاردىڭ كورسەتكىشى زەردەلەنىپ, سمەتالار تۇزىلەدى.
پاۆلودار وبلىسى,
ەكىباستۇز قالاسى
