ايعاق-كىتاپتىڭ ءتورتىنشى تومىندا دا جەلتوقسان كوتەرىلىسى الەم نازارىن اۋدارعان تاريحي وقيعا ەكەندىگى ايتىلادى. كوتەرىلىس قاھارماندارى سول كەزدەگى رەسپۋبليكا استاناسى الماتىدا عانا ەمەس, باسقا كوپتەگەن وبلىس, اۋدان ورتالىعىندا, ءتىپتى اۋىلداردىڭ وزىندە وشپەس ءىز قالدىرعانى باياندالادى. ەسىمدەرى ەلگە ايگىلى ح.ورالتاي, ف.ءالي, م.مىرزاحمەت ۇلى, ب.ءىلياسوۆ, ك.ءتابي, ك.بايجان, ج.انەس ۇلى, ب.قاناپيانوۆ, م.قويگەلديەۆ, ج.بابالىق ۇلى, ۋ.قاليجان, م.رىسداۋلەت, س.جاقىپوۆ, ع.قابىش ۇلى, ءا.كىشكەنەباەۆ, م.قالدىباي جانە باسقا دا زيالى قاۋىم وكىلدەرى مەن جەلتوقسان ۇيىمى جەتەكشىلەرىنىڭ ماتەريالدارى جيناقتىڭ سالماعىن ۇستەي تۇسكەن. سونداي-اق كوتەرىلىس اقيقاتىن اشۋ ءۇشىن قۇرىلعان كوميسسياعا ەنىپ, ازاماتتىق قاسيەتىن كورسەتە بىلگەن زاڭگەرلەر مەن قوعام قايراتكەرلەرىنىڭ ماقالا, سۇحباتتارى دا قامتىلعان.
«جەلتوقسان كوتەرىلىسى ءالى كۇنگە دەيىن ءوز باعاسىن الا الماي كەلەدى. وعان تۇبەگەيلى ساياسي-قۇقىقتىق باعاسى قاي كەزدە بەرىلەدى؟ بۇل ءبارىمىز ءۇشىن بەلگىسىز ساۋال. دەگەنمەن ارەكەتسىز قالمايىق دەپ, ءوز تاراپىمىزدان ۇزبەي ەڭبەكتەنۋدەمىز. وسىدان التى جىل بۇرىن ايعاق-كىتاپتاردىڭ العاشقى ەكى تومى جارىق كورگەن. وتكەن جىلى ءۇشىنشى تومى ءۇش مىڭ تارالىممەن شىقتى. ەندى مادەنيەت جانە سپورت مينيسترلىگىنىڭ «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ, باسىپ شىعارۋ جانە تاراتۋ» كىشى باعدارلاماسى بويىنشا ء«داۋىر» باسپاسىنان ءتورتىنشى تومى جارىق كورىپ وتىر. ءالى دە ءتورت تومعا جۇك بولاتىن دۇنيە باسپادا جاتىر. اقيقات جولى اۋىر, شىندىقتىڭ سوقپاعى شىرعالاڭ ەكەنىنە ەلىمىزدە عانا ەمەس, كەشەگى كەڭەس وداعىندا, ءتىپتى الەمدىك اۋقىمدا ايرىقشا بەتبۇرىس نىشانى بولعان 1986 جىلعى جەلتوقسان كوتەرىلىسى ايقىن دالەل», دەيدى تالعات ايتباي.
بۋىرقانعان جاستاردىڭ اساۋ تولقىنى, ءامىرشىل-اكىمشىل جۇيە كەزىندەگى باسشىلىقتىڭ ادام قۇقىن اياققا تاپتاعان وكتەم ىستەرى جيناققا ەنگەن ماقالالاردا جان-جاقتى سارالانادى. كىتاپتاعى تىڭ اقپاراتتار, جەلتوقسان كوتەرىلىسىنە قاتىسۋشىلاردىڭ ەستەلىكتەرى كىم-كىمدى دە قىزىقتىرا تۇسەتىنى ءسوزسىز.
الماتى
