قازىلار القاسىنىڭ توراعاسى, كورنەكتى ونەر قايراتكەرى ءاسانالى ءاشىموۆ تۇركى الەمىنىڭ رۋحاني استاناسىن دۇبىرگە بولەگەن ايتۋلى دودانىڭ ءمانى مەن ماڭىزىنا توقالىپ, جىلى لەبىزىن ءبىلدىردى.
«تۇركىستان – ەر تۇرىكتىڭ بەسىگى» دەپ ماعجان جۇماباەۆ جىرلاعان ۇلى, تاريحي قالادا «التىن دومبىرانى» وتكىزەيىك دەگەن شەشىم قابىلداندى. ونىسى دۇرىس. اتاعى مەن ابىرويى بار اقىنداردىڭ جاقسىلارى كەلىپ, حالىققا وسىندا ونەر كورسەتتى. تۇركىستان حالقىنىڭ ءال-اۋقاتى تۇزەلىپ, مادەنيەتى كوتەرىلسىن دەپ تىلەيمىن. ەل امان بولسىن!», دەدى ءاسانالى ءاشىموۆ.
ەكى كۇنگە سوزىلعان جىر بايگەسىندە اقىندار ۇلت قايراتكەرىنىڭ ورنەكتى ءومىر جولى مەن ەسەلى ەڭبەگىن, جانكەشتى قىزمەتىن جىرعا قوستى. كوزىقاراقتى كورەرمەننىڭ كوڭىلىن كوتەرىپ, ءسوز بارىمتاسى جاراسىمدى ءازىل, كەلىستى قالجىڭمەن ءورىلدى. ال تارتىستى دودانىڭ اقتىق كەزەڭىندە ءبىرجان بايتۋوۆ پەن رۇستەم قايىرتاي ۇلى جانە ەركەبۇلان قاينازاروۆ پەن شۇعايىپ سەزىمحان ونەر كورسەتتى.
ءسويتىپ, ءبىر كەزدەرى وسى تۇركىستان وڭىرىنەن تۇلەپ ۇشقان ەركەبۇلان قاينازاروۆ قازىلار القاسىنىڭ شەشىمىمەن «التىن دومبىرا-2022» يەگەرى اتاندى. جەڭىمپازعا «التىن دومبىرا» جانە 3 ملن تەڭگە كولەمىندە سىياقى تابىستالدى.
ال, جۇلدەلى ءى ورىندى الماتىلىق رۇستەم قايىرتاي ۇلى يەلەندى. ءىى ورىنعا ءبىرجان بايتۋوۆ پەن شۇعايىپ سەزىمحان لايىق دەپ تانىلدى. ءىىى ورىندى تالعات مىقي (بقو), حازىرەت بەردىحان (الماتى) جانە ءمولدىر ايتباي (قىزىلوردا) ءوزارا ءبولىستى. ارنايى جۇلدە نۇرلان ەسەنقۇلوۆقا (تۇركىستان), ارعىنبەك قالباەۆقا (ماڭعىستاۋ) جانە قاليجان بىلداشەۆكە (شىمكەنت) بۇيىردى. بارشا اقىنعا قارجىلاي سىي-سياپات جاسالدى.
ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ توراعاسى ءجۇرسىن ەرماننىڭ شەشىمىمەن ءبىرجان بايتۋوۆ پەن رۇستەم قايىرتاي ۇلى «ايتىستىڭ اقتاڭگەرى» اتاندى. ءوز كەزەگىندە, ەركەبۇلان قاينازاروۆ «التىن دومبىرانى» تۇركىستان قالاسىندا قالدىرۋ تۋرالى شەشىم قابىلدادى. ول « ۇلى دالا ەلى» ورتالىعى ەكسپوزيتسياسىنا قويىلادى.
