«تۇرعىن ءۇي-كوممۋنالدىق شارۋاشىلىعى سالاسىنداعى ماسەلەلەردى شەشۋ قاجەت. نەگىزى, بۇل – اۋىل مەن قالانىڭ اۋقىمىندا شەشىلە بەرەتىن تۇرمىستىق ماسەلە. بىراق ءبىز ونى ۇكىمەتتىڭ دەڭگەيىندە قاراۋعا ءماجبۇرمىز. ويتكەنى وسى سالاداعى توتەنشە وقيعالار تىم كوپ بولىپ كەتتى», دەدى مەملەكەت باسشىسى.
وسى رەتتە ول پەتروپاۆلدا, تەمىرتاۋدا, ستەپنوگورسكىدە, بالقاشتا, قاراعاندىدا, اقتوبەدە جانە ريددەردە بولعان اپاتتاردى اتاپ ءوتتى.
«اتالعان اپاتتاردىڭ ەشقايسىسىنان اكىمدەر مەن مينيسترلەر, ەڭ باستىسى, مەنشىك يەلەرى ءتيىستى قورىتىندى جاساعان جوق. ال جاقىندا ەكىباستۇزدا بولعان توتەنشە جاعداي بۇل سالاداعى احۋالدىڭ قانشالىقتى كۇردەلى ەكەنىن ايقىن كورسەتتى. قىزمەتكەرلەردىڭ جاۋاپسىزدىعى, باقىلاۋ جۇيەسىنىڭ قاۋقارسىزدىعى مىڭداعان ادامدى جىلۋسىز قالدىردى. جاۋاپتى قىزمەتكەرلەر قىستى قالىپتى رەجيمدە, امان-ەسەن وتكىزەمىز دەپ ەسەپ بەرگەن. بىراق ءىس جۇزىندە جاعدايدىڭ قالاي بولىپ جاتقانىن كورىپ وتىرسىزدار», دەدى پرەزيدەنت.
بۇدان سوڭ, ول پاۆلودار وبلىسىنىڭ اكىمى ءوز وتىنىشىمەن قىزمەتىنەن بوساتىلعانىن ايتتى.
«قۇزىرلى مەملەكەتتىك ورگان – ەنەرگەتيكا مينيسترلىگىنىڭ ەشقانداي ارەكەتىن كورگەن جوقپىز, بۇل مەكەمە اپاتقا سەلقوس قاراپ, بەيتاراپتىق تانىتتى. سونداي-اق توتەنشە جاعداي قىزمەتتەرىنىڭ جۇمىسى دۇرىس جولعا قويىلماعان. ولار باياۋ قيمىلداپ, سالعىرتتىق تانىتتى», دەدى توقاەۆ.
