«ەڭبەك ميگراتسياسى ماسەلەسىنە دە ەرەكشە نازار اۋدارۋ قاجەت دەپ ەسەپتەيمىن. قازىرگى سىن-قاتەرلەر بۇل سالانىڭ ماڭىزدى ەكەنىن ايقىنداي تۇسەدى. ءبىر ورىندا تۇرىپ قالماي, جاڭا تاسىلدەردى ۇسىنۋ ماڭىزدى. سونىڭ ىشىندە جۇمىس ىزدەۋ, جۇمىسقا ورنالاستىرۋ راسىمدەرىن جەڭىلدەتۋ, ەڭبەك ميگرانتتارى مەن ولاردىڭ وتباسىلارىنا الەۋمەتتىك كەپىلدىكتەر بەرۋ ىسىنە جاڭا تاسىلدەر كەرەك», دەدى قاسىم-جومارت توقاەۆ.
ونىڭ ايتۋىنشا, ازاماتتار ينتەگراتسيالىق جوبانىڭ پايداسىن تولىق سەزىنۋى كەرەك. بۇدان بولەك, پرەزيدەنت دامىتۋدى قاجەت ەتەتىن تاعى ءبىر سالانى اتادى.
«تاعى ءبىر سالا – تۋريزم. بۇل باعىتتا وداقتىڭ الەۋەتى زور, ءتۋريزمنىڭ بارلىق ءتۇرى بىزگە قولجەتىمدى. حالىقتار اراسىندا ينتەگراتسيانى ىلگەرىلەتۋگە جاعداي جاسايىق. كوميسسيا ۇكىمەتتەرمەن بىرلەسە وتىرىپ, وسى سالادا ماڭىزدى ءارى شىنايى جوبالاردى ازىرلەي الادى», دەدى ول.
