اقپارات جانە قوعامدىق دامۋ ءمينيسترى دارحان قىدىرالى مەملەكەتتىك «دارىن» سىيلىعىنىڭ يەگەرلەرىن قۇتتىقتاپ, ماراپاتتادى.
– تاۋەلسىزدىك العان جىلدان باستاپ مەملەكەت تاراپىنان جاستارعا ءۇنىمى قولداۋ كورسەتىلىپ كەلە جاتقانىن بىلەسىزدەر. وسى ورايدا وزدەرىڭىزگە ايتار ءسۇيىنشى جاڭالىعىمىز بار. پرەزيدەنت قاسىم-جومارت توقاەۆتىڭ جاستار جىلى اياسىندا بەرگەن تاپسىرماسىنا ساي پارلامەنت سەناتى «مەملەكەتتىك جاستار ساياساتى تۋرالى» زاڭ جوباسىن ماقۇلدادى. بۇل زاڭ ەرەجەسى مەملەكەت باسشىسىنا قول قويۋعا جولدانادى. زاڭ جوباسىندا كورسەتىلگەن باستى ماسەلەلەردىڭ ءبىرى – جاستاردىڭ جاسىن 35 جاسقا دەيىن كوتەرۋ بويىنشا ۇسىنىسىمىز قابىلداندى. ونىڭ يگىلىگىن جاستاردىڭ بارلىعى كورەدى دەپ ويلايمىن. سوندىقتان بۇگىنگە دەيىن «دارىن» سىيلىعىنا جاس شەكتەۋىنە بايلانىستى قاتىسا الماي قالعان تالانتتى جاستارىمىزعا دا مۇمكىندىك بەرىلەدى. جاستاردىڭ جاعدايىن قاراستىراتىن وسى زاڭ جوباسى قۇتتى بولسىن! بيىل «دارىن» مەملەكەتتىك جاستار سىيلىعىنا 30 جىل تولىپ وتىر. وسى وتىز جىلدىڭ ىشىندە ەلىمىزدەگى 300-دەن استام تالانتتى جاس اتالعان سىيلىقتىڭ يەگەرى اتانعان ەكەن. «دارىن» سىيلىعىنىڭ بارشا لاۋرەاتتارىن وتىز جىلدىق مەرەيلى بەلەسپەن قۇتتىقتايمىن!
الداعى ۋاقىتتا سىيلىقتىڭ كولەمىن جوعارىلاتۋ بويىنشا ماسەلەنى قاراستىرىپ جاتىرمىز. جىل سايىن كونكۋرسقا كەلىپ تۇسەتىن وتىنىشتەر سانى ارتىپ كەلەدى. بۇل جاستاردىڭ وسى سىيلىققا قىزىعۋشىلىعىنىڭ وسكەنىن كورسەتەدى. «دارىن» سىيلىعى جاڭا دارىنداردى جارقىراتا بەرسىن! – دەدى مينيستر.
مينيستر كونكۋرستىق ىرىكتەۋ ناتيجەسىندە 10 اتالىم بويىنشا 19 جەڭىمپاز انىقتالعانىن, ولاردىڭ قاتارىندا اتى الەمگە تانىمال جانسايا ابدىمالىك پەن ءبيبىسارا اساۋباەۆا سىندى شاحماتشى قىزدار بار ەكەنىن اتاپ ءوتتى. سونىمەن مەملەكەتتىك «دارىن» سىيلىعىنىڭ «ەسترادا» اتالىمى بويىنشا ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ ءارتىسى اقبوتا قۇسنادين مەن عازيزا جۇبانوۆا اتىنداعى اقتوبە وبلىستىق فيلارمونياسىنىڭ ءارتىسى نۇرتاس وماروۆ ماراپاتتالدى. «حالىق شىعارماشىلىعى» اتالىمى بويىنشا قۇرمانعازى اتىنداعى قازاق ۇلتتىق كونسەرۆاتورياسىنىڭ وقىتۋشىسى تاڭات سادەنوۆ پەن روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ءارتىسى اياۋلىم قاماجان لايىق دەپ تانىلدى. سول سەكىلدى «ادەبيەت» اتالىمى بويىنشا شەرحان تالاپوۆ پەن فايزوللا ءتولتاي, «تەاتر جانە كينو» اتالىمى بويىنشا نازەركە سەرىكبولوۆا مەن ميراس ءابىل, «ديزاين جانە بەينەلەۋ ونەرى» اتالىمى بويىنشا الماس تولەپ پەن ارنۇر جاباعين, «جۋرناليستيكا» اتالىمى بويىنشا شەرحان ابدەليەۆ, «قوعامدىق قىزمەت» اتالىمى بويىنشا وكسانا نابيەۆا, تيمۋر جۇمىرباەۆ, سونداي-اق «عىلىم» اتالىمى بويىنشا كاميلا ەگىزبەك جانە فارۋح ماشۋروۆ لايىق دەپ تانىلدى. وسى تىزىمدە «كلاسسيكالىق مۋزىكا» اتالىمى بويىنشا شىڭعىس راسىلحان, ايگەرىم التىنبەك, «سپورت» اتالىمى بويىنشا ءبيبىسارا اساۋباەۆا, جانسايا ابدىمالىك سىندى مىقتىلار بار. وسى تۇستا «دارىن» مەملەكەتتىك جاستار سىيلىعىنا ءار اتالىم بويىنشا 600 مىڭ تەڭگە سوماسىندا اقشالاي سىيلىق تاعايىندالعانىن ايتا كەتكەن ءلازىم.
مەملەكەتتىك «دارىن» سىيلىعىنىڭ «عىلىم» سالاسى بويىنشا لاۋرەاتى فارۋح ماشۋروۆ جاستاردى ىنتالاندىرۋ ماقساتىندا تاعايىندالعان سىيلىقتىڭ يەگەرى بولعانىنا ءدان ريزا ەكەنىن ايتادى.
– ءوزىم سۇلەيمەن دەميرەل اتىنداعى ۋنيۆەرسيتەتتىڭ اعا وقىتۋشىسىمىن. ناق قازىر Phd بويىنشا وقۋدى اياقتاپ, دوكتورلىق ديسسەرتاتسيا قورعاۋعا دايىندالىپ جاتىرمىن. سونىمەن قاتار عىلىمي جوبالارمەن اينالىسىپ, جوبالارعا جەتەكشىلىك ەتىپ تە ءجۇرمىن. جوعارى وقۋ ورنىندا جەتەكشىم اكادەميك اسقار جۇمادىلداەۆتىڭ ارقاسىندا ۇلكەن جۇمىس اتقاردىق. جەتەكشىمنىڭ دەمەۋىمەن ءوزىم بالا كەزدەن قىزىققان ماتەماتيكا ءپانىن تەرەڭىرەك بىلۋگە مۇمكىندىك اشىلدى. العاشىندا عىلىم جولىنا تۇسكەن سوڭ, جۇمىسىمدى ورتا جولدا توقتاتۋدى دا ويلاعان كەزدەرىم بولدى. بىراق ماتەماتيكا پانىنە دەگەن قىزىعۋشىلىعىمنىڭ ارقاسىندا مۇنداي كەزەڭدەردى وڭاي ەڭسەردىك. سونىڭ ناتيجەسىندە تالماي ەڭبەكتەنۋ كەرەكتىگىن ءتۇسىندىم. بۇگىن, ارينە, مەملەكەتتىك «دارىن» سىيلىعىنىڭ لاۋرەاتى اتانعانىما ءدان ريزامىن. ەندى الدا دوكتورلىق ديسسەرتاتسيامدى ءساتتى قورعاپ, عىلىم سالاسىنا ۇلەس قوسۋدان تانبايمىن دەگەن ويدامىن, – دەيدى فارۋح ماشۋروۆ.
