اتاپ ايتار بولساق, جۋىردا نيدەرلاندتىڭ اسسەن قالاسىندا سپورتتىق بي جارىسىنان كەزەكتى الەم چەمپيوناتى ۇيىمداستىرىلدى. سول دودادا قازاقستاندىق ارمان تولەپبەرگەنوۆ پەن زەرىپ ماديقىزى جۇبى ونەر كورسەتىپ, «قىزعالداقتار ەلىنەن» كۇمىس جۇلدەمەن ورالدى. بۇل – ەلوردالىق جاس جەتكىنشەكتەردىڭ الەم بىرىنشىلىگىندەگى العاشقى جۇلدەسى. ارمان – سپورتتىق بيمەن جەتى جاسىنان باستاپ اينالىسسا, زەرىپ العاش رەت 4 جاسىندا سپورتتىق ءبيدىڭ الىپپەسىمەن تانىسقان. قازىرگى تاڭدا ولار ەلورداداعى starlight Balance سپورتتىق بي كلۋبىندا جاتتىعادى.
قازاقستاندىق جانە رەسەيلىك بىلىكتى باپكەرلەر – ەكاتەرينا رىبينا, رۋسلان جانە ۆالەريا ايداەۆتاردان ءتالىم الاتىن جەرلەستەرىمىز بۇگىنگە دەيىن ءبىرتالاي جارىستا ءوز مىقتىلىعىن دالەلدەپ ۇلگەردى. ولار استانا, الماتى, شىمكەنت, تاراز, قاراعاندى, كوكشەتاۋ قالالارىندا ۇيىمداستىرىلعان ەلىشىلىك دودالاردا بىرنەشە رەت توپ جارعان بولسا, رەسەيدىڭ ماسكەۋ, سانكت-پەتەربۋرگ قالالارىندا, بولگاريادا وتكەن حالىقارالىق جارىستاردىڭ بىرنەشە دۇركىن جۇلدەگەرى اتانعان.
