ايماقتار • 08 جەلتوقسان، 2022

بارلىق ۇيگە جىلۋ بەرىلدى

47 رەت كورسەتىلدى

27 قاراشا كۇنى بولعان اپاتتان زارداپ شەككەن ۇيلەردىڭ بارلىعىنا جىلۋ بەرىلدى. شاھاردىڭ جىلۋ جۇيەسىندەگى تەڭگەرىمسىزدىككە بايلانىس­تى تەحنوگەندىك سيپاتتاعى توتەنشە جاعداي ءالى دە بولسىن ساقتالۋدا.

پرەزيدەنت قاسىم-جومارت توقاەۆ ەكىباستۇزداعى جوندەۋ جۇمىستارىنىڭ بارىسىن نازاردا ۇستاپ وتىر. كەشە پرەمەر-ءمينيستردىڭ كومىرلى شاھارداعى اپاتتى جويۋ جۇمىستارى بويىنشا بايانداماسىن تىڭداي كەلىپ، مەملەكەت باسشىسى ۇكىمەتكە قالالاردى قىسقى جىلىتۋ ماۋسىمىنا دايىنداۋ كەزىندە جىبەرىلگەن قاتەلىكتەرگە مۇقيات تالداۋ جۇرگىزۋ مىندەتىن جۇكتەدى.

جەدەل شتاب باسشىسى، پرەمەر-ءمينيستردىڭ ءبىرىنشى ورىنباسارى رومان سكلياردىڭ ايتۋىنشا،
7 جەلتوقسان كۇنى بارلىق زارداپ شەككەن ۇيلەرگە جىلۋ بەرىلدى. جەلىلىك سۋدىڭ پارامەترلەرى كەلەسىدەي: قىسىمى 8،8 كگ/سم2، ءتۇزۋ باعىتتاعى جىلۋ جەتكىزۋ 83 گرادۋس جانە كەرى باعىتتا 56 گرادۋستى قۇرايدى.

«ەنەرگيا كوزى – ستانسا شتاتتىق رە­جىمدە جۇمىس ىستەپ تۇر. ەكىباستۇز جەو قالاداعى جىلۋمەن قامتۋدى قال­پى­نا كەلتىرۋ ءۇشىن بارلىق كۇشتەردى جۇ­مىل­­دىرۋدا. وكىنىشكە قاراي، سوڭعى كۇندەرى ورىن العان وقيعالاردىڭ ناتي­جەسىندە بولعان گيدراۆليكالىق رەجىم­نىڭ تەڭگەرىمسىزدىگى، سونىڭ ىشىندە تۇ­تى­نۋ­-
شىلار مەن پيك-تەردىڭ جىلۋ تاسى­مالداعىشتاعى سۋدى رۇقساتسىز اعىزۋى بۇل جۇمىستى قيىنداتتى. بارلىق تۇرعىندارعا شىدامدىلىق تانىتقاندارى ءۇشىن العىس بىلدىرەمىز جانە الداعى 2-3 كۇندە بىرلەسكەن كۇش-جىگەردىڭ ارقاسىندا جىلۋ­مەن قامتۋ تولىعىمەن قالپىنا كەلەدى دەپ ويلايمىز»، دەلىنگەن جەدەل شتابتىڭ اقپاراتىندا.

شاھاردا بارلىعى 689 كوپقاباتتى ءۇي بار. اپات سالدارىنان كوپقاباتتى 149 ءۇي جانە 114 جەر ءۇي، سونداي-اق 15 الەۋمەتتىك نىسان قاقاعان قىستا جىلۋ­دان اجىراپ قالعان ەدى. جوندەۋ-قالپى­نا كەلتىرۋ جۇمىستارىنا ەكىباستۇز، پاۆ­لودار، استانا، قاراعاندى، پەتروپاۆل قالالارىنان 851 ادام جۇمىلدىرىلدى.

جەدەل شتابتىڭ ۇيعارىمىمەن بۇرناعى كۇنى ءماشھۇر ءجۇسىپ كوشەسىنىڭ بويىندا، 5ا شاعىن اۋدانىندا جاڭادان جالپى ۇزىندىعى 120 مەتر جىلۋ قۇبىرى سالىناتىن بولىپ شەشىم قابىلداندى.

– بۇل ورامداعى جەلىلەردە زاقىمدانۋلار كوپ كەزدەسۋى سەبەپتى بەلگىلى ءبىر ۋچاسكەدە جاڭادان جەلى سالۋعا شەشىم قابىلداندى. شتاب قۇبىردى جەردىڭ بەتىمەن توسەۋدى قۇپ كورىپ وتىر. وسىلايشا، بۇل جەردەگى ماگيسترالعا قوسىلعان ۇيلەردى جىلۋ­دان ۋاقىتشا اجىراتۋ كوپ ۋاقىتتى المايدى، نەبارى 5 ساعاتتى قۇرايدى. ماماندار ەسەپتەگەندەي، ەگەر جەردىڭ استىمەن جۇرگىزسەك، تۇرعىن ۇيلەردى شامامەن 20 ساعاتتاي جىلۋدان ايىرۋعا تۋرا كەلەر ەدى. سەبەبى جەردىڭ استىندا بۇعان دەيىن پايدالانىلعان قۇبىرلاردى تولىقتاي كەسىپ الۋ قاجەت بولادى. ال جاڭا جەلى سول ەسكى قۇبىرلاردىڭ ۇستىمەن تارتىلادى. قازىر دايىندىق شارالارى باستالىپ كەتتى، – دەپ حابارلادى پاۆلودار وبلىسى اكىمىنىڭ مىندەتىن اتقارۋشى ولەگ كرۋك.

جاڭا قۇبىردى جەلىلەرگە قايتا قوسۋ ءۇشىن بۇگىن ساعات 08.00-13.00 ارالىعىندا بۇل اۋماقتاعى كوپقاباتتى 17 ءۇي جىلۋدان ۋاقىتشا اجىراتىلادى.

جالپى، جوندەۋ بريگادالارى ساتباەۆ كوشەسى، №8 جانە ءماشھۇر ءجۇسىپ كوشەسى، №52 تۇرعىن ۇيلەرگە جىلۋ كىرگىزۋدە ۇلكەن قيىندىقتارعا ۇرىنىپتى. سەبەبى مۇنداعى بارلىق پاتەرلەردىڭ جىلۋ باتارەيالارى مەن ىشكى قۇبىرلارى ايازدا تولىقتاي قاتىپ قالعان.

«ورتالىق-ازيا ەلەكتروەنەرگەتيكالىق كورپوراتسياسى» (واەك) اق باسقارما توراعاسى باعدات ورالدىڭ سوزىنە قاراعاندا، كومپانيا اپاتتى قالپىنا كەلتىرۋ شارالارىنا قازىردىڭ وزىندە 891 ملن تەڭگە بولگەن. اپات ايماعىندا بولعان ۇيلەر بويىنشا قاراشا جانە جەلتوقسان ايلارى ءۇشىن جىلۋ تولەماقىسى قايتا ەسەپتەلەدى. ال مۇلدە جىلۋسىز قالعان ۇيلەردىڭ تۇرعىندارى جىلۋ ەنەرگياسى ءۇشىن اتالعان كەزەڭدە اقى تولەمەيدى.

– ءبىز الدىن الا ەسەپتەۋلەر جاسادىق. بۇگىنگى تاڭدا قارجىلىق كومەك شامامەن 891 ملن تەڭگەنى قۇرادى. بۇل جۇمىستى مىندەتتى تۇردە جالعاستىرامىز. جۇمىس كولەمىنە ءۇيدىڭ كىرەبەرىسى، پاتەرلەردى قالىپقا كەلتىرۋ، كارىز جانە سۋمەن جابدىقتاۋ جۇيەسى دە كىرەدى. قازىر كوبى ءتاريفتى كوتەرەسىزدەر مە دەپ سۇراپ جاتىر. ول ماسەلە اپاتقا دەيىن تالاي رەت ايتىلدى. ءتاريفتى كوتەرۋ تۋرالى ءتيىستى مەكەمەلەرگە ۇسىنىس حات جازعانبىز. بيىل تەك 600 مەتر قۇبىردى عانا اۋىستى­را الدىق. ال جىل سايىن كەمى 25-30 شاقىرىم قۇبىردى جاڭارتۋ قاجەت. سوندىقتان ماسەلە تەك ءتاريفتى كوتەرۋمەن شەكتەلمەيدى. جوندەۋ جۇمىسىنا جانە جۇمىسشىلاردىڭ جالا­قى­سىن كوتەرۋ ءۇشىن قوسىمشا قارجى كوزىن تابۋ كەرەك، – دەدى ول.

ەكىباستۇزداعى جىلۋ جەلىلەرىنىڭ – 91، سۋ قۇبىرلارىنىڭ – 66 پايىزى، كارىز جۇيەسىنىڭ 60 پايىزدان استامى توزىپ تۇر. تەك جىلۋ جەلىلەرى بويىنشا كونەرگەن اۋماقتاردىڭ 30 پايىزىن جاڭارتۋ ءۇشىن كەمىندە 120 ملرد تەڭگە قاراجات قاجەت كورىنەدى. «واەك» بۇل رەتتە بيۋدجەت قارا­جاتىنان دامەلەنىپ وتىر.

جوندەۋ بريگادالارى بۇگىندە اپات كۇندەرى قاتىپ قالعان جەر ۇيلەردەگى جىلۋ قۇبىرلارىن جانە كوپقاباتتى ۇيلەردە­گى اۋىز­سۋ جەلىلەرىن جىبىتۋدە. تەڭگەرىمسىزدىككە بايلانىستى كوپ پاتەرلەردە جىلۋ قىسىمى ءماز ەمەس. كەيبىر تۇرعىندار باتارەيالاردا قانجىلىم عانا جىلۋ بارىن ايتادى. بريگادالار قازىرگە دەيىن 2،5 مىڭنان اسا جىلۋ رادياتورىن اۋىستىرعان.

پاۆلودار وبلىسى،

ەكىباستۇز قالاسى

سوڭعى جاڭالىقتار

جسدپ ۇمىتكەرلەرىن انىقتادى

ساياسات • بۇگىن، 00:08

ۇلت ءۇمىتىن اقتاعان

رۋحانيات • كەشە

يكەمدى باعام رەجىمى

قارجى • كەشە

ابە

ادەبيەت • كەشە

Enbek.kz ءبارىن جەڭبەك

قوعام • كەشە

«حات قورجىن»

ەگەمەن قازاقستان • كەشە

ابىگەرگە تۇسىرگەن تولاسسىز جاۋىن

توتەنشە جاعداي • كەشە

باۋكەڭنىڭ كوپ قىرى

ادەبيەت • كەشە

ۇقساس جاڭالىقتار