«ەرنازاردىڭ سەگىزى» ىرىكتەلدى

وسىدان ءتورت جىل بۇرىن رەسەيدە ۇيىمداستىرىلعان الەم چەمپيوناتىنىڭ توپتىق كەزەڭىندە ماروككو يسپانيانى توبىقتان قاعىپ، پلەي-وفف ساتىسىنا شىعارماي تاستاۋى مۇمكىن ەدى. الايدا سوڭعى مينۋتتاردا ياگو اسپاس تارازى باسىن تەڭەستىرىپ، يسپانيالىقتار دوپ ايىرماسىنىڭ ارقاسىندا عانا كەلەسى كەزەڭگە ءبىرىنشى ورىنمەن شىققان ەدى. ال ماروككو بولسا، جالعىز ۇپايمەن ۆ تو­بىندا سوڭعى ورىندا قالىپ قويعان-تىن. بىراق يسپانيا 1/8 فينالدا جارىس قو­جايىندارىنان پەنالتي سەرياسىندا جە­ڭىلىپ، شيرەك فينالدان تىس قالعان بولاتىن.

يسپانيا بيىلعى الەم بىرىنشىلىگىندە دە ءتورت جىل بۇرىنعى تاريحىن قايتالادى. ولار العاش دوپ ايىرماسىمەن پلەي-وفف كەزەڭىنە شىققان بولسا، 1/8 فينالدا ماروككودان پەنالتي سەرياسىنان جەڭىلدى. ءسويتىپ، بۇل جولى دا يسپانيا فۋتبولشىلارى شيرەك فينالدان تىس قالدى.

ماروككو قاتارداعى الەم چەمپيو­ناتىن وتە جوعارى دەڭگەيدە وتكىزىپ جات­قانىن ايتا كەتۋ كەرەك. توپتىق كەزەڭدە 2018 جىلعى دودانىڭ ەكى جۇلدەگەرى – حور­ۆاتيا مەن بەلگيا جانە 1986 جىلدان كەيىن الەم­دىك مۋنديالعا ءبىرىنشى رەت قاتىسقان كانادامەن ءبىر توپتا ويناپ، جەتى ۇپايمەن ءوز توبىندا ءبىرىنشى ورىنعا يە بولدى.

ءبىر قىزىعى، افريكالىقتار تۋرنير باستالاردان ءۇش اي بۇرىن باپكەر اۋىس­تىرىپ، فۋتبول ساراپشىلارى ولاردى اۋتسايدەرلەردىڭ قاتارىنا قوسىپ قويعان-دى. بىراق 47 جاستاعى جاتتىقتىرۋشى ۆاليد رەگراگي از ۋاقىتتىڭ ىشىندە بارلىق فۋتبولشىنى ءبىر ماقساتقا جۇمىلدىرا الدى. ادەتتە، مۇنداي قۇرامالار كۇتپەگەن جەردە سەنساتسيا جاساپ جاتاتىن. ونى چەمپيوناتقا قاتىسىپ جاتقان بىرنەشە كوماندا دالەلدەپ بەردى.

يسپانيا بولسا، توپتىق كەزەڭدە كوس­تا-ريكانى ءىرى ەسەپپەن جەڭىپ، سوڭعى تۋردا جاپونيادان جەڭىلىپ، ايتەۋىر جان­كۇيەرلەرىن زەرىكتىرە قويعان جوق ەدى. ال 1/8 فينالداعى يسپانيا – ماروككو ماتچى جانكۇيەرلەردىڭ ءىشىن ابدەن پىستىرعانى انىق. ارينە، ءبىر كوماندا 90 مينۋت بويى قورعانىپ، ەكىنشىسى قورعانىستىڭ كىلتىن تابا الماي، دەنى دۇرىس شابۋىل ۇيىم­داس­تىرا بىلمەسە، ونداي ويىندا قان­داي بەرەكە بولادى دەيسىز. اقىرى بىردە-ءبىر گول سوعىلماعان ماتچتىڭ جەڭىمپازىن ويىن سوڭ­ىنداعى پەنالتي سەرياسى انىق­تاپ بەردى.

لۋيس ەنريكە وسى ماتچىڭ الدىنداعى ءباسپاسوز ءماسليحاتىندا فۋتبولشىلارىنا مىڭ رەت پەنالتي تەپكىزىپ، فۋتبول لوتەرەياسىنا ابدەن دايىنداعانىن ايتىپ ەدى. بىراق جاۋاپتى ساتتە «قىزىل فۋريا» فۋتبولشىلارى تاعى دا ەسكى ادەتىنە باسىپ، بۇل جولى ماروككودان جەڭىلدى. يسپانيانىڭ ءۇش فۋتبولشىسى – كارلوس سولەر، سەرحيو بۋسكەتس جانە پابلو سارابيا 11 مەترلىك نۇك­تەدەن ءمۇلت كەتسە، ءتۋنيستىڭ جەڭىستى گولىن مادريدتە تۋىپ، كەزىندە يسپانيا قۇرا­ماسىنا كەرەك بولماعان اشراف حاكيمي سوقتى.

پورتۋگاليا قۇراماسىنىڭ باس جاتتىق­تىرۋشىسى فەرناندۋ سانتۋش شۆەي­تساريامەن بولعان ويىندا كريشتيانۋ رو­نالدۋدى قوسالقى قۇرامدا قالدىرىپ، ونىڭ ورنىنا ۇلتتىق قۇراما دەڭگەيىندە اسا تاجىريبەسى جوق «بەنفيكانىڭ» 21 جاستاعى شابۋىلشىسى گونسالۋ رامۋشتى شىعارعانى بارشا فۋتبول مامانىن تاڭ­عالدىردى. سانتۋش شۆەيتساريالىق ارىپتەسى مۇرات ياكينگە وسىنداي ۇلكەن توسىنسىي دايىنداعان ەكەن.

ماتچقا دەيىن كوپشىلىك فەرناندۋ سانتۋشتىڭ تاڭداۋىنا توسىرقاي قاراپ، پورتۋگاليا ءۇشىن الاڭداعان ەدى. ايتسە دە، ماتچتىڭ ەسەبى سانتۋشتىڭ تاكتيكاسى 100 پايىز جۇزەگە اسقانىن دالەلدەپ بەردى. ول رونالدۋدى العاشقى مينۋتتان باستاپ الاڭعا شىعارماعانىنا ەش وكىنگەن جوق. قايتا قۋانىشى باسىم بولدى. ماڭىزدى ويىندا سەنىم بىلدىرگەن شاكىرتى گونسالۋ رامۋش جەرگە قاراتپاي، 67 مينۋتتىڭ ىشىندە ءبىر ەمەس، ءۇش گول سوعىپ، پورتۋگاليانىڭ قاھارمانىنا اينالدى. سونداي-اق ماتچتىڭ 33-مينۋتىندا ەسەپتى ەسەلەگەن پەپە پورتۋگاليا قۇراماسى ساپىندا الەم چەمپيوناتتارىندا گول سوققان ەڭ ساقا فۋتبولشى اتاندى. ەكىنشى تايمدا پيرەنەي تۇبەگى ەلىنىڭ وكىلدەرىنەن گەررەيرۋ (55) مەن لەاۋ (90+2) ءبىر-ءبىر مارتە مەرگەندىك تانىتسا، شۆەيتساريانىڭ جالعىز گولىن 58-مينۋتتا اكانجي سالدى.

پورتۋگاليا قۇراماسى بەسىنشى گولىن سوققاننان كەيىن باس باپكەر سانتۋش ءۇش گول سوققان رامۋشتىڭ ورنىنا رونالدۋدى شىعاردى. 37 جاستاعى فۋتبولشى گول سو­عۋعا اجەپتاۋىر ۇمتىلعانىمەن، قان­جى­­­عاسىن مايلاي المادى. 83-مينۋتتا كريش­تيانۋ زوممەردىڭ قاقپاسىنان سا­ڭىلاۋ تاپقانىمەن، باس تورەشى گول ويىننان تىس جاعدايدا سوعىلدى دەپ ەسەپتەمەي قويدى.

وسىلايشا، شۆەيتساريا قاقپاسىنا التى گول سوققان پورتۋگاليا 10 جەلتوقسان كۇنى شيرەك فينالدا ماروككو قۇراماسىمەن وينايتىن بولدى. بۇل – ماروككو ءۇشىن الەم چەمپيوناتىنداعى ءبىرىنشى شيرەك فينال ماتچى بولسا، پورتۋگاليالىقتار وسىمەن ءۇشىنشى مارتە ¼ فينال مەجەسىنە جەتىپ وتىر. سول كۇنگى ەكىنشى ماتچتا 2018 جىلعى الەم چەمپيونى فرانتسيا بىلتىرعى ەۋ­روپا بىرىنشىلىگىنىڭ ۆيتسە-چەمپيونى ان­گليامەن جارتىلاي فينال جولداماسىن ساراپقا سالادى. بۇگىنگە دەيىن فرانتسيا مەن انگليا جاسىل الاڭدا 31 مارتە جو­لىعىپ، سونىڭ 17-سىندە اعىلشىنداردىڭ مەرەيى ۇستەم بولعان ەكەن. توعىز ماتچتا فرانتسۋزدار جەڭىسكە جەتسە، 5 كەزدەسۋ تەڭ ەسەپپەن اياقتالعان.

ال 9 جەلتوقسانعا جوسپارلانعان شيرەك فينالدىڭ العاشقى ماتچىندا نيدەرلاند – ارگەنتينا، ەكىنشىسىندە حورۆاتيا – برازيليا قۇرامالارى سىنعا تۇسەدى. فۋت­­بول جانكۇيەرلەرىنىڭ ەسىندە بولسا، ني­دەرلاند پەن ارگەنتينا 2014 جىلعى الەم چەمپيوناتىنىڭ جارتىلاي فينالىندا كەزدەسىپ، وڭتۇستىك امەريكا قۇر­لىعىنىڭ وكىلى ماتچ سوڭىنداعى پەنالتي سەرياسىندا جەڭىسكە جەتكەن ەدى. ەندى لۋي ۆان گال شاكىرتتەرى بۇل ويىندا ەسە قايتارۋدى كوزدەيتىنى انىق. بىراق باس جۇلدە ءۇشىن كەلگەن مەسسيدىڭ سەگىز جىل بۇ­­رىنعى جەڭىسىن قايتالاعىسى كەلەتىنى تۇ­سىنىكتى.

برازيليا مەن حورۆاتيا الەم چەمپيوناتتارى تاريحىندا وسىمەن ءۇشىنشى مارتە كەزدەسكەلى تۇر. العاشقى ەكەۋى توپ­تىق كەزەڭى اياسىندا وتسە، بۇل جولى شيرەك فينالدا جولدارى ءتۇيىستى. 2006 جىلى گەر­مانيادا ۇيىمداستىرىلعان بىرىن­شىلىكتە برازيليا قۇراماسى حورۆاتتاردى 1:0 ەسەبى­مەن تىزە بۇكتىرگەن بولسا، 2014 جىلى ءوز ەلىن­دە وتكەن دودادا 3:1 ەسەبىمەن جە­ڭىس­كە جەتكەن ەدى.