قازاقستاننىڭ ءار وڭىرىنەن كونكۋرستىق نەگىزدە ىرىكتەلىپ الىنعان 50 قاتىسۋشى ءبىر اپتا ىشىندە قارقىندى وقۋ كۋرسىنان ءوتتى. بۇل – كوپشىلىك الدىندا ءسوز سويلەۋ, ساياسي كوممۋنيكاتسيا, جوبالاردى باسقارۋ, كوشباسشىلىق بويىنشا ترەنينگتەر, سونداي-اق قازاقستاننىڭ قازىرگى ساياسي قۇرىلىمى تۋرالى دارىستەر.
ءدارىستىڭ سوڭعى كۇنىندە «Amanat» پارتياسىنىڭ اتقارۋشى حاتشىسى اسحات ورالوۆ قاتىسۋشىلارمەن كەزدەسىپ, مەكتەپتىڭ باستى مىندەتتەرى, مامان دايارلاۋ ماسەلەسىنە قاتىستى كوزقاراسىمەن ءبولىستى.
– مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس بيىل ناۋرىز ايىنان باستاپ اكادەميا ساياسي مامانداردى دايارلاۋ ءىسىنىڭ جاڭا تاسىلدەرىن ەنگىزە وتىرىپ, ءوز جۇمىسىن تۇبەگەيلى وزگەرتتى. بۇدان بىلاي ماماندار تەك ونلاين رەجىمدە عانا ەمەس, سونىمەن قاتار وفلاين فورماتتا دا وقىتىلادى. نەگىزىنەن, وقۋ جۇمىسى وڭىرلەردە وتكىزىلەدى. مىسالى, سايلاۋ الدىندا اكادەميا بازاسىندا 30 مىڭنان استام بايقاۋشى وقىتىلدى. بۇعان دەيىن ءبىز ەكى مىڭنان استام اۋىل اكىمىن وقىتتىق. كوشباسشى ايەلدەرگە ارنالعان «Tomiris» ساباق باعدارلاماسىن ىسكە قوستىق. وقىتۋ پروتسەسى توقتامايدى. پارتيالىقتاردىڭ ۇزدىكسىز دامۋىنا, زاماناۋي بىلىمگە, داعدىعا يە بولۋىنا مۇددەلىمىز, – دەدى اسحات ورالوۆ.
وقۋ باعدارلاماسىنا سەمەي قالاسىنان كەلىپ قاتىسقان قورلان تۋعامباەۆا العان ءبىلىمى بولاشاقتا وزىنە مانساپ قۇرۋعا كومەكتەسەدى دەپ سانايدى.
– وقۋ بارىسىندا كاسىبي ترەنەرلەر, بەلگىلى ساياسي, قوعام قايراتكەرلەرى ءوز تاجىريبەسىمەن ءبولىستى. ولار قازىرگى ۋاقىتتا جاس ساياساتكەردىڭ بويىندا قانداي قاسيەتتەر بولۋى كەرەك ەكەنىن ءتۇسىندىرىپ, كوپشىلىك الدىندا قالاي سويلەگەن دۇرىس دەگەن تاقىرىپ توڭىرەگىندە ءوز ويىن جەتكىزدى, – دەدى ول.
راۋان بايعابىل ەسىمدى الماتىدان كەلگەن قاتىسۋشى دا جوبا تۋرالى ءوز پىكىرىن ءبىلدىردى.
– ساباق وتە قىزىقتى فورماتتا ءوتتى. ءبىز بىرنەشە توپقا ءبولىنىپ, ءارتۇرلى تاقىرىپ بويىنشا تاپسىرما ورىندادىق. ەلىمىزدىڭ ساياسي قۇرىلىمى جانە وندا بولىپ جاتقان رەفورمالار تۋرالى قىزىقتى دارىستەر تىڭدادىق, – دەدى ول.
جوباعا قاتىسۋشىلار پارلامەنت ماجىلىسىندە بولىپ, دەپۋتاتتارمەن, پارتيا فراكتسياسىنىڭ مۇشەلەرىمەن كەزدەستى.
بۇعان دەيىن, جوباعا قاتىسۋشىلار وقۋ-اعارتۋ ءمينيسترى اسحات ايماعامبەتوۆپەن كەزدەستى. سالا باسشىسى مينيسترلىك قىزمەتىنىڭ نەگىزگى باعىتتارىن ءتۇسىندىرىپ, قاسىم-جومارت توقاەۆتىڭ سايلاۋالدى باعدارلاماسىنىڭ ءبىلىم بەرۋ سالاسىن ىسكە اسىرۋ جۇمىسىنا ەگجەي-تەگجەي توقتالدى.
