سپورتتى دامىتۋ ديرەكتسياسىنىڭ ءباسپاسوز قىزمەتى, مۇحيتتىڭ ارعى بەتىندەگى دودادا قازاقستان قۇراماسىنان ەكى وكىل باق سىنايتىنىن مالىمدەدى. اتاپ ايتار بولساق, قىزدار اراسىنداعى 72 كيلوعا دەيىنگى سالماقتاعى الەم رەيتينگىنىڭ كوشباسشىسى ءجاميلا باقبەرگەنوۆا مەن ەرلەر اراسىنداعى بيىلعى ازيا بىرىنشىلىگىنىڭ جەڭىمپازى ازامات داۋلەتبەكوۆ (86 كيلو) الەم قۇراماسى ساپىندا كۇرەسەدى. ءار ەلدىڭ تاڭداۋلى بوزكىلەم شەبەرلەرىنەن جاساقتالعان كوماندا ۆ توبىندا اقش جانە قىتاي قۇرامالارىمەن جارتىلاي فينال جولداماسىن ساراپقا سالادى. ال ا توبىندا جاپونيا, ۋكراينا مەن موڭعوليانىڭ بۇرىمدى بالۋاندارى ءوزارا كۇش سىناسادى.
قىتاي قۇراماسى 72 كيلوعا دەيىنگى سالماقتا ءبىر عانا بالۋان – تسيان دەگەنچاگاندى جارىسقا قاتىستىرماق (UWW رەيتينگىندە ول 12-ورىندا تۇر). جارىس قوجايىنى اقش قىركۇيەكتە بەلگرادتا الەم چەمپيونى اتانعان اميت ەلور مەن سكايلار ەلليسون گروتەنى تاڭداپتى. ايتا كەتەيىك, سەربيا استاناسىندا ءجاميلا فينالدا ءدال وسى اميت ەلورعا ەسە جىبەرىپ, كۇمىس جۇلدەگە يە بولعان ەدى.
ءجاميلا بيىل حالىقارالىق كۇرەس فەدەراتسياسى (UWW) بەكىتكەن بارلىق سالماقتاعى الەمدىك رەيتينگتى (72 كيلوعا دەيىنگى سالماقتا) 1-ورىنمەن اياقتايتىنى بارشاعا ءمالىم. ونىڭ ەنشىسىندە 52 000 ۇپاي بار. UWW ەرەجەسى بويىنشا, جىلدى ءبىرىنشى ورىنمەن قورىتىندىلاعانى ءۇشىن وعان حالىقارالىق كۇرەس فەدەراتسياسى 5000 اقش دوللارى كولەمىندە سىياقى بەرەدى. ءجاميلا بيىل بىرقاتار تولايىم تابىسقا قول جەتكىزدى. ماسەلەن, ول الەم چەمپيوناتىندا موينىنا كۇمىس جۇلدەنى ىلگەن بولسا, ازيا بىرىنشىلىگىندە التىننان القا تاقتى. سونداي-اق بولات تۇرلىحانوۆ اتىنداعى گران-پري جارىسىندا دا دارا شىقتى. ال يسلام ويىندارى سايىسىندا قولا جۇلدەنى قاناعات تۇتتى.
ال وتانداسىمىزدىڭ باستى قارسىلاسى – اميت ءبىر جىلدا جاستار, 23 جاسقا دەيىنگىلەر جانە ەرەسەكتەر اراسىندا الەم چەمپيوناتىندا توپ جارعان ءبىرىنشى امەريكالىق بالۋان ەكەنىن اتاپ وتەيىك.
الەم كۋبوگىندە وتانداسىمىزعا كىمدەر قارسىلاس اتانباق؟ موڭعوليا وسى سالماقتاعى بەتكەۇستارى داۆااناسان ەنح امار مەن سارناي باياربااتاردىڭ جولىنا ۇمىتپەن قارايدى. ۋكراينا دا ءوز كوشباسشىسى اناستاسيا الپەەۆاعا سەنىم ارتادى. ول قازىر رەيتينگتە 13-ساتىدا تۇر. 21 جاستاعى بالۋان بيىل يسپانيادا 23 جاسقا دەيىنگىلەر اراسىنداعى الەم چەمپيوناتىندا قولاعا قول جەتكىزگەن.
ءبىر قىزىعى, جاپونيا بۇل سالماقتا ەشكىمدى اپارمايدى. باپكەرلەر وسلوداعى الەم چەمپيوناتىنىڭ جەڭىمپازى ماساكو فۋرۋيچيعا دا, باسقا سپورتشىلارىنا دا دەمالىس بەرۋدى ءجون ساناپتى.
ايتا كەتەيىك, الەم كۋبوگىن جىل سايىن حالىقارالىق كۇرەس فەدەراتسياسى (United World Wrestling) ۇيىمداستىرادى. مۇندا الەم چەمپيوناتىندا جالپى ەسەپتە ۇزدىك شىققان 5 قۇراما مەن الەم قۇراماسى (وزگە قۇرامالارداعى ۇزدىك بالۋانداردان جاساقتالعان) كۇش سىناسادى.
قازاقستاندىق كۇرەس جانكۇيەرلەرى كورالۆيلل قالاسىنداعى تارتىستى بەلدەسۋلەردى حالىقارالىق كۇرەس فەدەراتسياسىنىڭ (United World Wrestling) رەسمي سايتىنىڭ تىكەلەي ەفيرىنەن كورە الادى.
