قۇجاتتا قىتاي تاراپىنىڭ قازاقستان ۇكىمەتىنىڭ ءوتىنىشى بويىنشا شىعىس قازاقستان وبلىسىنداعى اۋىل شارۋاشىلىعى ونىمدەرىنىڭ ساپاسىن تەكسەرۋ زەرتحاناسىنا قۇنى 11,15 ميلليون يۋان (شامامەن 753,5 ميلليون تەڭگە) قۇرال-جابدىقتار بەرۋگە كەلىسكەنى ايتىلعان.
وسكەمەنگە جابدىقتى تاسىمالداۋ, سونداي-اق جابدىقتى ورناتۋ ءۇشىن تەحنيكالىق مامانداردى جىبەرۋ جانە ولارعا نۇسقاۋ بەرۋ قىتاي تاراپىنا جۇكتەلگەن.
ءوز كەزەگىندە قازاقستاندىق تاراپ زەرتحانانىڭ جوبالاۋ جانە ارلەۋ جۇمىستارىنا جاۋاپ بەرەدى, زەرتحانانىڭ جۇمىسىنا قاجەتتى جاعداي جاسايدى, سونداي-اق كەدەندىك جانە باسقا دا وپەراتسيالاردىڭ شىعىندارىن ءوز موينىنا الادى.
اۋىل شارۋاشىلىعى مينيسترلىگىنىڭ حابارلاۋىنشا, كەلىسىم ەكى مەملەكەت اراسىنداعى دوستىق قارىم-قاتىناس پەن تەحنيكالىق-ەكونوميكالىق ىنتىماقتاستىقتى دامىتۋعا, سونداي-اق قازاقستاندىق اۋىل شارۋاشىلىعى ونىمدەرىن قىتايعا ەكسپورتتاۋعا مۇمكىندىك بەرەدى.
قۇجات 20 جەلتوقسانعا دەيىن «اشىق نقا» سايتىندا ورنالاستىرىلدى.
