شەتەلدىك مەيماندار استانادا وتكەن «قاقتىعىس ايماقتارىنان قايتارىلعان تۇلعالاردى وڭالتۋ جانە رەينتەگراتسيالاۋ: ورتالىق ازيا ەلدەرىنىڭ تاجىريبەسى» اتتى حالىقارالىق كونفەرەنتسيادا ءوز ويلارىن ورتاعا سالىپ, تاجىريبە الماسۋعا ىنتالى ەكەندەرىن جەتكىزدى.
كونفەرەنتسيادا ءسوز العان اقپارات جانە قوعامدىق دامۋ ءمينيسترى دارحان قىدىرالى بۇۇ, ەۋروپالىق وداق, حالىقارالىق ۇيىم وكىلدەرى, ديپلوماتتار, AQNIET قورى, اقپارات جانە قوعامدىق دامۋ مينيسترلىگى بىرلەسىپ ۇيىمداستىرعان القالى جيىننىڭ ەلىمىز ءۇشىن ماڭىزى اسا زور ەكەنىن ايتتى.
– قازاقستان الەمدە قاقتىعىس ايماقتارى – سيريا سەرگەلدەڭىنەن, شام شىرعالاڭىنان, وتتىڭ ورتاسىنان وتانداستارىن الىپ شىققان از مەملەكەتتەردىڭ ءبىرى. كونفەرەنتسيادا الەمنىڭ بىرنەشە ەلىنەن جانە كورشىلەس ورتالىق ازيا مەملەكەتتەرىنەن كەلگەن عالىمدار مەن ساراپشىلار قازاقستاننىڭ بۇل باعىتتاعى تاجىريبەسىن جوعارى باعالادى. مەملەكەت باسشىسى قاسىم-جومارت توقاەۆتىڭ تاپسىرماسىمەن ازاماتتارىمىزدى قايتارۋ شەشىمنىڭ دۇرىس بولعاندىعىنا قازىر ءبارىمىز كۋا بولىپ وتىرمىز. بۇگىندە ەلگە قايتارىلعان وتانداستارىمىز ءوز ورتالارىنا قوسىلىپ, قوعامىمىزعا قايتا ءسىڭىسىپ, قالىپتى, بەيبىت ءومىر ءسۇرىپ جاتىر. ولارعا بارلىق قولداۋ كورسەتىلىپ وتىر, – دەدى دارحان قىدىرالى.
ايتا كەتۋ كەرەك, بيىل قاراشا ايىندا Human Rights Watch ۇيىمى سيريادان ەلدەرىنە قايتارىلعان بالالار تۋرالى ارنايى ەسەپ جاريالادى. ۇيىم قازاقستان ءوز ازاماتتارىن ەلگە قايتارىپ, ولاردىڭ قوعامعا بەيىمدەلۋىنە جۇيەلى تۇردە جاعداي جاساپ كەلە جاتقان از ەلدىڭ ءبىرى ەكەنىن اتاپ ءوتتى.
جيىنعا قاتىسقان بۇۇ ەسىرتكى جانە قىلمىس بويىنشا ورتالىق ازياداعى وڭىرلىك وكىلى اشيتا ميتتال قازاقستاننىڭ قاقتىعىس ايماقتارىنان قايتارىلعان ادامداردى وڭالتۋ بويىنشا اتقارىپ جاتقان جۇمىسىن جوعارى باعالادى.
– قازاقستان ەكسترەميزمگە قارسى ساۋاتتى, كەشەندى ستراتەگيا قۇرعان. وندا ءارتۇرلى شارالار قاراستىرىلعان. ماسەلەن, تەرروريزم ءورشىپ تۇرعان اۋماققا تۇسكەندەردى ەلگە قايتارۋ شاراسى تۋرالى اتاپ وتۋگە بولادى. دالىرەك ايتساق, «جۋسان» وپەراتسياسى بارىسىندا بالالار مەن ايەلدەر وتانىنا ورالىپ, بۇگىندە ولارعا جان-جاقتى كومەك كورسەتىلىپ جاتىر, – دەدى اشيتا ميتتال.
امەريكالىق ساراپشى, پروفەسسور ستيۆەن ۋەين دە «جۋسان» وپەراتسياسى – قاقتىعىس ايماقتارىنان وتانداستارىن قايتارۋعا تىرىسقان وزگە مەملەكەتتەرگە ۇلگى ەتەرلىك بىردەن-ءبىر جوبا ەكەنىن ەرەكشە اتاپ ءوتتى. ول قازاقستاننىڭ وتانىنا ورالعان ايەلدەر مەن بالالارعا دەگەن الەۋمەتتىك قولداۋىن جوعارى باعالادى.
