ءجۇز ەلۋ مىڭعا تارتا تۇرعىنى بار ەكىباستۇز قالاسى جەر بەتىنە گرەس-2 ستانساسىنداعى ەڭ بيىك قۇبىرىمەن, «بوگاتىردەي» الىپ كومىر كەنىشىمەن ايگىلى, وت جۇرەكتى ادامدارىمەن باعالى. وسىنداي داڭقتى شاھاردىڭ ەڭبەك ادامدارى مەن ولاردىڭ جارقىن دا جاسامپاز ىستەرىن قالامىنا ارقاۋ ەتىپ كەلە جاتقان اقىنداردىڭ ءبىرى – جانارگۇل قادىروۆا. ول ەكىباستۇز قالاسىنداعى جالعىز قازاقتىلدى باسىلىم – «وتارقا» گازەتىنىڭ رەداكتورى, «جەتىنشى قابات», «اكەنىڭ كوزى», «باياندا توسام», «ەر اكەمە ەسكەرتكىش» كىتاپتارىنىڭ اۆتورى. بىرنەشە جىر جيناقتارى تۇرىك, ازەربايجان, قىرعىز تىلدەرىنە اۋدارىلىپ, وسى ەلدەردە جارىق كورگەن قازاق اقىندارى انتولوگيالارىنا كىردى. سونىمەن بىرگە اۆتوردىڭ ءوزى دە ازەربايجان اقىندارى جىرلارىن ءتارجىمالاۋ جوباسىنا قاتىسىپ, فرانتسۋز كلاسسيگى شارل بودلەردىڭ ولەڭدەرىن قازاقشا سويلەتتى.
باياناۋىلدا دۇنيەگە كەلىپ, كەرەكۋدە ءبىلىم العان جانارگۇل ابدىكارىمقىزى ءاردايىم ەكىباستۇزدىڭ ايبىنىن اسقاقتاتىپ كەلەدى. وتتى جىرلارىنىڭ تۋىنا سەبەپشى بولىپ, شابىتىنا قانات بىتىرگەن بۇل قالانى جانارگۇل اقىن الەمگە جىلۋ مەن جارىق سىيلاعان «شام شاھارعا» تەڭەيدى.
«تاستۇعىردا – قازاقتىڭ قارا شالى,
مىناۋ – سونىڭ قالدىرعان
قارا وشاعى.
الەمگە دە ۇلگەرگەن اتى شىعىپ,
شام-شاھاردىڭ ارتادى باعاسى ءالى», – دەيدى الدا قالانى جارقىن بولاشاق كۇتىپ تۇرعانىنا مەڭزەپ.
ءبىر ءسات اقىن ءوزى جان-تانىمەن سۇيەتىن قالانى جۇمات شانين اتىنداعى تۋعان اۋىلىنا دا ۇقساتادى.
«كۇنىڭ كوكتە جايناعان لاعىل قۇساپ,
ىستىق ماعان سەندەگى دابىرلى ءسات.
ەكىباستۇز, تۇراسىڭ جانارىمدا
سول باياعى مەن تۋعان اۋىل
قۇساپ...»
– دەپ قيال قاناتىنا ءمىنىپ, اۋىلىنا دا ساياحات شەگەدى.
جالپى, جانارگۇلدى اقىن رەتىندە تانىتقان – ماحاببات, سۇيىسپەنشىلىك تاقىرىبىنداعى ليريكالىق جىرلارى. ونىڭ «جەتىنشى قابات», «سايگ ۇلىكتەردىڭ پاتشاسى», «باياندا توسام» ولەڭدەرى كوپشىلىككە جاقسى ءمالىم.
قازاقستاننىڭ ەڭبەك سىڭىرگەن قايراتكەرى, تانىمال ءانشى مەرۋەرت تۇسىپباەۆا ورىنداپ جۇرگەن كوپتەگەن ءاننىڭ ءسوزىن جانارگۇل اقىن جازعان. وسى كەشتە ونەر يەسى «ساعان قاراي», «جاراتقان يەم», «جان اعا», «سۇراۋى بار», «ەل تورىنە تارتۋ» اندەرىن شىرقادى. سونىمەن بىرگە جانارگۇل قادىروۆانىڭ سوزىنە جازىلعان «باۋىرىم» ءانىن جەرگىلىكتى ءانشى گۇلميرا الدانوۆا, «جاۋىپ تۇر جاۋىن» ءانىن التىنگۇل باقىتحان, «سايگ ۇلىكتەردىڭ پاتشاسى» ءانىن «قىران» توبى اۋەلەتتى.
كەشتە ەلى اقىن قىزدى ەرەكشە قاستەرلەپ, قوشەمەت كورسەتتى. پاۆلودار وبلىسى مادەنيەت, تىلدەردى دامىتۋ جانە ارحيۆ ءىسى باسقارما باسشىسىنىڭ مىندەتىن اتقارۋشى مەدەت تاۋاسقان وبلىس اكىمىنىڭ قۇتتىقتاۋىن جەتكىزىپ, وڭىرىنە «وبلىس الدىندا سىڭىرگەن ەڭبەگى ءۇشىن» بەلگىسىن تاقتى. ال قازاقستان جازۋشىلار وداعى وڭىرلىك فيليالىنىڭ توراعاسى جارقىنبەك امانتاي ۇلى ازەربايجاننىڭ قازاقستانداعى توتەنشە جانە وكىلەتتى ەلشىسى اتىنان قۇرمەت گراموتاسىن تابىستادى.
پاۆلودار وبلىسى,
ەكىباستۇز قالاسى
