جاسىراتىنى جوق, پولشا – وسى الەم چەمپيوناتىنىڭ پلەي-وفف كەزەڭىنە شىققان ەڭ ءالسىز قۇرامانىڭ ءبىرى. ءتۋرنيردىڭ توپتىق كەزەڭىندە ساۋد ارابياسىن 2:0 ەسەبىمەن جەڭىپ, مەكسيكامەن تەڭ ويناعان (0:0) پولشا فۋتبولشىلارى ءتورت ۇپايمەن ارەڭ دەگەندە 1/8 فينالعا جولداما الدى. دالىرەگى, قاقپاشى ۆويتسەح شچەنسنيدىڭ جەكە شەبەرلىگى ارقاسىندا پلەي-وففتا ويناۋ باقىتىنا يە بولدى. 30 جاستاعى «يۋۆەنتۋس» كلۋبىنىڭ قاقپاشىسى توپتىق كەزەڭدەگى ءۇش ماتچتا 16 سەيۆ جاساپ, ەكى ماتچتا قاقپاسىنا بىردە-ءبىر گول وتكىزگەن جوق. ءتىپتى مەسسي مەن اد-ءدوۆساريدىڭ پەنالتيدەن تەپكەن دوبىن قايتارا ءبىلدى. فۋتبولدا بارلىق ماتچتىڭ تاعدىرىن ءبىر فۋتبولشى شەشەتىن بولسا, وندا ارگەنتينا كەيىنگى ءتورت الەم چەمپيوناتىندا كۋبوكتان ءۇي تۇرعىزاتىن ەدى.
كەشەگى ماتچتا دا روبەرت لەۆاندوۆسكي باستاعان پولشا جىگىتتەرى وتە ناشار ويىن كورسەتتى. 90 مينۋت بويى ۋگو لوريس قورعاعان قاقپاعا نەبارى ءۇش مارتە ءدال سوققى جاساي الدى. تەك ويىننىڭ سوڭعى مينۋتىندا عانا لەۆاندوۆسكيدىڭ ءبىر پەنالتيدى ەكى رەت تەۋىپ, ەكىنشىسىندە ارەڭ گول سالعانىن ايتپاعاندا.
ال فرانتسيا بولسا, قاتارىنان ەكى دۇركىن الەم چەمپيونى اتانۋ ماقساتىندا تاعى ءبىر ماڭىزدى قادام جاسادى. ءبىرىنشى تايمداعى وليۆە ءجيرۋدىڭ گولى مەن ەكىنشى تايمداعى كيليان مباپپەنىڭ ءدۋبلى فرانتسياعا جەڭىس سىيلادى – 3:1. بيىلعى چەمپيوناتتاعى بەسىنشى گولىن سوققان كيليان سۇرمەرگەندەر كوشىندە 5 گولمەن جەكە-دارا كوش باستادى.
فرانتسيا مەن پولشا فۋتبولشىلارى الەم چەمپيوناتتارىنىڭ تاريحىندا وسىمەن ەكىنشى رەت كەزدەستى. ەڭ العاش 1982 جىلى يسپانيادا وتكەن الەم بىرىنشىلىگىنىڭ ءۇشىنشى ورىن ءۇشىن وتكەن ماتچىندا جولىعىپ, سول جولى پولشالىقتار 3:2 ەسەبىمەن باسىم تۇسكەن بولاتىن. ارادا 40 جىل وتكەندە فرانتسۋزدار پولشادان ەسە قايتاردى.
پلەي-وففتىڭ ءتورتىنشى ماتچىندا سەنەگالدى سەنىمدى تۇردە جەڭگەن انگليا شيرەك فينالدا فرانتسياعا قارسىلاس اتاندى. توپتىق كەزەڭدەگى ەكى ويىندا قارسىلاستارىن ءىرى ەسەپپەن (انگليا – يران 6:2, انگليا – ۋەلس 3:0) تىزە بۇكتىرگەن اعىلشىندار بۇل جولى دا افريكالىقتاردىڭ قاقپاسىنا جاۋاپسىز ءۇش گول سوقتى. كەزدەسۋدىڭ 35-مينۋتىندا دجوردان حەندەرسون بەللينگەمنىڭ پاسىنان كەيىن ماتچتىڭ ەسەبىن اشسا, ءبىرىنشى تايم اياقتالار تۇستا كاپيتان حارري كەين ەسەپتى 2:0-گە جەتكىزدى. كەيننىڭ الاڭداعى نەگىزگى جۇمىسى گول سوعۋ بولسا دا, ول وسى چەمپيوناتتاعى ءتورتىنشى ماتچىندا العاشقى گولىن سوقتى. شابۋىلعا قاراعاندا جارتىلاي قورعانىستا ساۋاتتى ونەر كورسەتەتىن كەين ارىپتەستەرىنە گول سوعاتىن مۇمكىندىك تۋدىرىپ بەرگەندى قۇپ كورەتىن فۋتبولشى.
كەيىنگى ءتورت ماتچتا اعىلشىنداردىڭ ويىنىنان مىناداي ءبىر ەرەكشەلىكتى بايقادىق. ياعني ولار كەز كەلگەن ماتچتىڭ ەسەبىن ءبىرىنشى بولىپ اشادى دا, ەكىنشى گولىن دا جىلدام سوعۋعا تىرىسادى. سەنەگالمەن وتكەن ماتچتا دا سولاي ىستەدى. كەزدەسۋدىڭ ەكىنشى تايمىندا ساكا اعىلشىنداردىڭ ءۇشىنشى گولىن سوقتى – 3:0.
ءسويتىپ, 10 جەلتوقسانعا جوسپارلانعان شيرەك فينالدا ءبىر-بىرىنە لايىقتى قارسىلاس – فرانتسيا مەن انگليا قۇرامالارى كەزدەسەدى. ءدال وسى فينالعا بەرگىسىز ماتچ بيىلعى چەمپيوننىڭ كىم بولاتىنىن انىقتاپ بەرۋى دە عاجاپ ەمەس.
