فيلمدە قىتاي كوممۋنيستەرىنىڭ زورلىق-زومبىلىعىنان بوسىپ تيبەت, ءۇندىستان مەن پاكىستان ارقىلى تۇركياعا جەتكەن قانداستار تاعدىرى باياندالادى. فيلم اۆتورى – ازات رىستانبەك. كينوكارتينانى «وتانداستار قورىنىڭ» ۇسىنىسىمەن «Qazaqstan» ۇلتتىق ارناسىنىڭ شىعارماشىلىق توبى تۇركيانىڭ قازاقتار شوعىرلانعان ايماقتارىندا تۇسىرگەن.
تۋىندىدا التايدان انادولىعا اۋعان ون مىڭداعان قازاقتىڭ كوشىنە كۋا بولعان جانداردىڭ ەستەلىكتەرى اسەرلى بەرىلگەن. سونىمەن قاتار تۇرىك عالىمدارىنىڭ قۇندى تاريحي زەرتتەۋلەرى دە قامتىلعان. ودان بولەك, 1952 جىلى 13 ناۋرىزدا تۇركيانىڭ سول كەزدەگى ۇكىمەت باسشىسى ادنان مەندەرەستىڭ باستاماسىمەن قابىلدانعان تاريحي قاۋلى تۋرالى دا كەڭىنەن ايتىلادى. ازاپتى جولدى كوپ ادام شىعىنىمەن ارتقا تاستاپ, 1952 جىلى تۇركياعا اۋپىرىمدەپ جەتكەن 1 852 قازاقتىڭ انادولى جەرىندەگى جاڭا ورتاعا بەيىمدەلۋى, تامىر جايۋى جانە قازىرگى كەزدەگى جاي-كۇيى – كارتينانىڭ نەگىزگى مازمۇنى بولعان. شىعارماشىلىق توپ ءتۇسىرىلىم بارىسىندا قازاقتار العاش قونىستانعان ىستانبۇلدىڭ زەيتىنبۇرنى جانە باعجىلار اۋدانىنا, نيدە ايماعىنداعى التاي اۋىلىنا جانە انكارا, يزمير, ساليحلى قالالارىنا بارىپ, كوش كۋاگەرلەرى زىليحا قامزاقىزى, قاليا ادىلبەكقىزى, ارىستان شادەت ۇلى, مانسۇر ءتايجى جانە ولاردىڭ ۇرپاقتارىمەن تىلدەسىپ قايتقان.
«وتانداستار قورى» كەاق پرەزيدەنتى ابزال ساپاربەك ۇلى مەن «Qazaqstan» ۇلتتىق ارناسىنىڭ باسقارما ءتورايىمى ءلاززات تانىسبايدىڭ ايتۋىنشا, فيلم كەيىنگى بۋىنعا ۇلت تاريحىنداعى ەڭ ۇزاق, ەڭ ازاپتى كوشتىڭ ءمانىن ءتۇسىندىرۋ, قانداستارىمىزعا قۇرمەت ءبىلدىرۋ ماقساتىندا تۇسىرىلگەن.
سونداي-اق كارتينا ۇلت تاريحىنداعى ايتۋلى كوشتىڭ 70 جىلدىعىنا جانە قازاقستان مەن تۇركيا اراسىنداعى ديپلوماتيالىق قارىم-قاتىناستىڭ 30 جىلدىعىنا ارنالعان. دەرەكتى فيلم «Qazaqstan» ۇلتتىق ارناسىنان تاۋەلسىزدىك كۇنى قارساڭىندا كورسەتىلەدى.
