«نەمىس ماشينەسى» جولدا قالدى

قاتارداعى الەم چەمپيوناتىنىڭ توپتىق كەزەڭدەگى سوڭعى تۋر ويىندارىن پلەي-وففقا دەيىنگى پلەي-وفف ماتچتارى دەسە دە بولاتىنداي. ويتكەنى كەيبىر ماتچتاردا جەڭىسكە جەتكەن قۇراما كەلەسى كەزەڭگە شىقسا، جەڭىلگەنى ءوز ەلىنە قايتادى. كەي كەزدەسۋلەردىڭ ءجونى ءتىپتى بولەك. قارسىلاسىن قانشا جەردەن ءىرى ەسەپ­پەن تىزە بۇكتىرسە دە، اتاعى دارداي قۇرا­ما بولسا دا، توپتىق كەزەڭنەن شىعا الماي، جانكۇيەرلەرى الدىندا ماسقارا بولدى. سون­داي قۇرامانىڭ ءبىرى – گەرمانيا.

2014 جىلعى برازيلياداعى دوپ دوداسىنىڭ فينالىندا جارىس قوجايىندارىن 7:1 ەسەبى­مەن جەڭىپ، الەم چەمپيونى اتانعاننان كەيىن «نەمىس ماشينەسىن» قىرسىق شالدى. ولار 2018 جىلعى رەسەيدەگى فۋتبول تويىندا كورەيادان جەڭىلىپ، پلەي-وففتان قۇر قالىپ قويعان بولسا، اراعا ءتورت جىل سالىپ قاتاردا دا سول ستسەناري قايتالاندى. بۇل جولى سوڭعى تۋردا جەڭگەنىمەن، ءبارىبىر توپتان شىعا المادى. سول ارالىقتا گەرمانيا ەكى ەۋروپا بىرىنشىلىگىنە قاتىسىپ، ەكەۋىندە دە فينالعا جەتە المادى.

ءيا، گەرمانيانىڭ سوڭعى تۋردا پلەي-وففقا شىعۋ-شىقپاۋى قاتار وتكەن يسپانيا – جاپونيا ماتچىنا تىكەلەي بايلانىستى ەدى. يسپانيالىقتار سوڭعى تۋردا جاپونيانى جەڭگەندە گەرمانيانى وزدەرىمەن بىرگە كە­لەسى كەزەڭگە الىپ شىعار ەدى. بىراق كۇتپەگەن جەردە كۇنشىعىس ەلىنىڭ وكىلدەرى ايدى اسپانعا ءبىر-اق شىعارىپ، يسپانيانى دا تىزە بۇكتىردى. وسىلايشا، جاپونيالىقتار ءبىر الەم چەمپيوناتىندا ەكى بىردەي مۋنديالدىڭ جەڭىمپازىن جەڭىپ، 1/8 فينالعا شىقتى. ءسويتىپ، ە توبىنان جاپونيا ءبىرىنشى ورىنمەن، يسپانيا ەكىنشى ورىنمەن كەلەسى كەزەڭگە ءوتتى.

F توبىنداعى تورتتىكتە 2018 جىلعى الەم بىرىن­شىلىگىنىڭ قولا جۇلدەگەرى بەلگيا سوڭعى تۋردا حورۆاتيانى جەڭە الماي (0:0)، بيىلعى دودانى ەرتە اياقتاۋعا ءماجبۇر بول­دى. قاتارداعى دوپ دوداسى باستالماي تۇرىپ فۋتبول ماماندارىنان «قاي توپ قۇرامالار توپتان شىعا الماي قالۋى مۇمكىن»، دەپ سۇراۋ سالعاندا، كوپشىلىك پورتۋگاليا مەن فرانتسيانى اتاعان بولاتىن. سەبەبى پور­تۋگاليا رونالدۋدىڭ توڭىرەگىندەگى داۋ-دا­مايعا بايلانىستى ىشكى تارتىپسىزدىككە تاپ كەلسە، فرانتسيا بۇل الەم بىرىنشىلىگىنە نەگىزگى قۇرامنىڭ بىرنەشە فۋتبولشىسىن اكەلە الماعان ەدى. ال بەلگيادان ەشكىم مۇنداي سۇرەڭسىز ويىندى كۇتكەن جوق ەدى. ءسويتىپ، بەل­گيانىڭ 2010 جىلى باستالعان «التىن ءداۋىرى» وسىمەن اياقتالعان سياقتى.

بەلگيانىڭ ساتسىزدىگىن ءتيىمدى پايدالانعان ماروككو سوڭعى تۋردا كانادانى ءبىر دوپ ايىرماسىمەن جەڭىپ (2:1)، 1986 جىلدان كەيىن ءبىرىنشى رەت الەم چەمپيوناتىنىڭ پلەي-وفف كەزەڭىنە جولداما الدى. ءتىپتى افريكا قۇر­لىعىنىڭ وكىلى توپتىق كەزەڭدە بىردە-ءبىر ويىن­دا جەڭىلمەي، جەتى ۇپايمەن ءوز توبىندا كوش باستادى. حورۆاتيا بەس ۇپايمەن ەكىنشى ورىنعا جايعاستى.

G توبىنداعى ەكىنشى جولداماعا ء(بىرىن­شىسىن برازيليا ەكىنشى تۋردا-اق يەلەنىپ قويعان) كامەرۋن، شۆەيتساريا جانە سەر­بيا قۇرامالارى تالاسىپ، شۆەيتساريا فۋتبول­شىلارىنىڭ اسىعى الشىسىنان ءتۇستى. ولار وتە تارتىستى وتكەن سوڭعى تۋردا سەربيانى 3:2 ەسەبىمەن جەڭدى. ال كامەرۋن قۇراماسى 3-تۋردا برازيليادان باسىم تۇسكەنىمەن (1:0)، ءبا­رىبىر توپتىق كەزەڭدە قالىپ قويدى.

H كۆارتەتىنىڭ سوڭعى تۋرىندا پورتۋگاليا كورەيا قۇراماسىنان جەڭىلسە دە، ەكەۋى ءبىر-ءبىرىن 1/8 فينالعا الىپ شىقتى. ءبىر قىزىعى، پورتۋگاليا – كورەيا ماتچىنىڭ 90-مينۋتىنا دەيىن تابلودا 1:1 ەسەبى تىركەلىپ، قاتار ءوتىپ جاتقان ويىندا گانانى 2:0 ەسەبىمەن جەڭىپ جاتقان ۋرۋگۆاي ءبىر اياعىمەن پلەي-وففتا تۇرعان ەدى. الايدا كورەيالىقتار تورەشى قوس­قان قوسىمشا مينۋتتا پورتۋگاليا قاق­پاسىنا ەكىنشى گولىن سوعىپ، ەكىنشى جولدامانى ۋرۋگۆايدان تارتىپ الدى. بار ماسەلەنى ويىننىڭ سوڭىندا سوعىلعان ءبىر عانا گول شەشىپ كەتتى. ويتكەنى كورەيا مەن ۋرۋگۆاي قۇراماسى سوڭعى تۋرداعى جەڭىستەرىنەن كەيىن 4 ۇپايمەن ەكىنشى ورىندى ءوزارا بولىسكەنىمەن، كورەيالىقتار دوپ ايىرماسىنىڭ ارقاسىندا كەلەسى اينالىمعا جولداما الدى. ازيالىقتار ءۇش تۋردا ءتورت گول سوعىپ، ءوز قاقپاسىنا ءتورت گول وتكىزىپ العان بولسا، وڭتۇستىكامەري­كالىق­تار ەكى گول سوعىپ، ەكى گول وتكىزىپ العان ەدى. ءسويتىپ، ۋرۋگۆاي ءۇشىنشى ورىنعا ءتۇسىپ قالدى.

سەنبى كۇنى وتكەن پلەي-وفف ماتچتارىنىڭ العاشقى ەكى ويىنىندا نيدەرلاند پەن ارگەنتينا قۇرامالارى جەڭىسكە جەتىپ، شيرەك فينالدا سىنعا تۇسەتىن ءبىرىنشى جۇپتى انىقتاپ بەردى. «قىزعالداقتار» ەلىنىڭ قۇرا­ماسى 1/8 فينالدا اقش-تى 3:1 ەسەبىمەن تىزە بۇكتىرسە، مەسسي باستاعان ارگەنتينا قۇرا­ماسى ارەڭ دەگەندە اۋستراليا فۋتبولشىلارىنان باسىم ءتۇستى – 2:1. بۇل ويىندا مەرگەندىگىمەن كوزگە تۇسكەن مەسسي ءوزىنىڭ ۇلتتىق قۇراماداعى 1000-ويىنىن وتكىزدى. ني­دەرلاند پەن ارگەنتينا اراسىنداعى شيرەك فينال ماتچى 9 جەلتوقسانعا جوسپارلانعان.