ايماقتار • 04 جەلتوقسان، 2022

«كۇمبىرلە كۇيىم، ەلىمدە!»

شۋ بويىندا تۋعان بەلگىلى كۇيشى-كومپوزيتور، ايگىلى «ەركە سىلقىم» كۇيىمەن ميلليونداردىڭ جۇرەگىنەن جول تاپقان ءابدىمومىن جەلدىباەۆتىڭ 85 جىلدىق مەرەيتويى وبلىس دەڭگەيىندە اتالىپ ءوتىلدى. بالاساعۇن اتىنداعى ورتالىق كونتسەرت زالعا جينالعان جۇرتشىلىق ابەكەڭنىڭ شىعارماشىلىعىنا ارنالعان «كۇمبىرلە كۇيىم، ەلىمدە!» اتتى كەشتەن رۋحاني ءلاززات الدى.

تابيعات مۇسىلمانقۇل

كۇي كۇمبىرىمەن كومكەرىلگەن كەشتى ءوڭىر باسشىسىنىڭ ءبىرىنشى ورىنباسارى نۇرجان كالەندەروۆ قۇتتىقتاۋ سوزبەن اشىپ، ءابدىمومىن جەلدىباەۆقا وبلىس اكىمى نۇرجان نۇرجىگىتوۆتىڭ قۇتتىقتاۋ حاتىن تابىستادى. قالىپتاسقان ءداستۇر بويىنشا مەرەيتوي يەسىنىڭ يىعىنا زەرلى شاپان جاپتى.

ءىس-شارا بارىسىندا «پاراسات»، «قۇرمەت» وردەندەرىنىڭ يەگەرى، قازاقستاننىڭ ەڭبەك سىڭىرگەن مادەنيەت قايراتكەرى ءابدىمومىن جەلدىباەۆتىڭ شىعارماشىلىعىنان سىر شەرتكەن «سىرلى سازدىڭ سىڭعىرى» اتتى جيناق اۋليەتالىق الەۋمەتكە تانىستىرىلدى.

اۋليەاتا جۇرتى كۇي كۇمبىرىنە ەلىتكەن كەشتە قر مادەنيەت قايراتكەرى، ديريجەر نۇرلان بەكەنوۆ، كەنەن ازىرباەۆ اتىنداعى وبلىستىق فيلارمونيانىڭ انشىلەرى مەن «قازاق وركەسترى» جانە ۇجىمنىڭ كوركەمدىك جەتەكشىسى، ديريجەر دۋلات بايزىلداەۆ ونەرلەرىن ورتاعا سالىپ، مەرەيتوي يەسىنىڭ مەرەيىن تاسىتتى.

جەرگىلىكتى كورەرمەندەردىڭ قوشەمەتىنە بولەنگەن ونەرپازدار ابەكەڭنىڭ «ەركە سىلقىم»، «جەتىسۋ سازى»، «اۋليەاتا»، «كوكشولاق»، «قىزىل ەلىك» سەكىلدى وزگە دە شىعارمالارىن شابىتتانا ورىندادى. ءىس-شارا بارىسىندا ءسوز العان ءا.جەلدىباەۆ جەرگىلىكتى ونەرسۇيەر قاۋىمعا العىسىن جاۋدىردى.

ء«تاڭىر تارتۋ ەتكەن تالانتتىڭ ارقاسىندا كۇيدەن بولەك بىرنەشە ءان جازدىم. ونەر حالىقپەن بىرگە جاسايدى. ونەر ادامىنىڭ مەرەيىن وسىرەتىن دە، وشىرەتىن دە – ەلى. قانداي دا ءبىر تابىستارعا قول جەتكىزگەن بولسام، ءبارى دە حالىقتىڭ ارقاسىندا»، دەدى مەرەيتوي يەسى تولقىپ تۇرىپ.

ءابدىمومىن جەلدىباەۆتىڭ «ەركە سىلقىم كۇيىن» كوپتەگەن ەلدىڭ ونەرسۇيەر قاۋىمى جوعارى باعالاعان. اتالعان تۋىندى اقش-تىڭ ايگىلى نيۋ-يورك شاھارىنداعى سۋبۇرقاقتاردا ءجيى قويىلاتىنىن بىرەۋ بىلسە، بىرەۋ بىلمەس. مۇنىڭ ءوزى ءابدىمومىن ونەرىنىڭ قاي دەڭگەيدە ەكەنىنە ولشەم بولا السا كەرەك.

تاراز